સરકારે તેલ પરનો ઇમ્પોર્ટ ટેક્સ ઘટાડ્યોઃ ખાદ્ય તેલના ભાવ ઘટશે
પ્રતિકાત્મક
કેન્દ્ર સરકારે ક્રૂડ પામ તેલ, ક્રૂડ સોયાબીન તેલ અને ક્રૂડ સૂર્યમુખી તેલ પરની કસ્ટમ ડ્યુટી ઘટાડીને ૧૦ ટકા કરી દીધી છે.-ગૃહિણીઓને રસોડાના ખર્ચમાં મોટી રાહત : સરકારે કાચા ખાદ્ય તેલ પરના મૂળભૂત આયાત કરમાં ૧૦ ટકાનો ઘટાડો કર્યો
નવી દિલ્હી, ખાદ્ય તેલના ભાવને નિયંત્રિત કરવા માટે કેન્દ્ર સરકારે શુક્રવારે કાચા ખાદ્ય તેલ પરના મૂળભૂત આયાત કરમાં ૧૦ ટકાનો ઘટાડો કર્યો છે. સરકારે એક સૂચનામાં આ માહિતી આપી છે. સૂચના અનુસાર, આ ફેરફાર ૩૧ મેથી અમલમાં આવશે. આયાત કરમાં ઘટાડાને કારણે, વિદેશી બજારોમાંથી આવતું તેલ હવે સસ્તું થશે, જેના કારણે સ્થાનિક બજારમાં કિંમતો નિયંત્રણમાં રહેવાની અપેક્ષા છે.
કેન્દ્ર સરકારે ક્રૂડ પામ તેલ, ક્રૂડ સોયાબીન તેલ અને ક્રૂડ સૂર્યમુખી તેલ પરની કસ્ટમ ડ્યુટી ઘટાડીને ૧૦ ટકા કરી દીધી છે. નાણા મંત્રાલયના આ નિર્ણયનો ઉદ્દેશ્ય ખાદ્ય તેલના છૂટક ભાવ ઘટાડવાનો અને ખાદ્ય તેલનો વેપાર કરતા સ્થાનિક વેપારીઓના હિતોનું રક્ષણ કરવાનો છે. અગાઉ આ ત્રણેય કાચા ખાદ્ય તેલ પર ડ્યુટી ૨૦ ટકા હતી. તમને જણાવી દઈએ કે ભારત તેની સ્થાનિક ખાદ્ય તેલની જરૂરિયાતના ૫૦ ટકાથી વધુ આયાત કરે છે.
ભાવ ઘટાડાથી ગ્રાહકોને ફાયદો થશે.આ નિર્ણય પછી, ઉદ્યોગ સંસ્થા સોલવન્ટ એક્સટ્રેક્ટર્સ એસોસિએશન ઓફ ઈન્ડિયા (SEA) ના પ્રમુખ સંજીવ અસ્થાનાએ જણાવ્યું હતું કે ક્રૂડ ઓઈલ પર ડ્યુટીમાં ઘટાડો સ્થાનિક ભાવ ઘટાડવામાં મદદ કરશે, જેનો ગ્રાહકોને ફાયદો થશે.
કેન્દ્રીય ખાદ્ય સચિવ સંજીવ ચોપરાએ આ નિર્ણયની પુષ્ટિ કરી હતી. નાણા મંત્રાલયે શુક્રવારે તાત્કાલિક અસરથી એક સૂચના જારી કરીને ખાદ્ય તેલ પર આયાત ડ્યુટી ઘટાડવાના નિર્ણયની માહિતી આપી હતી. સમાચાર એજન્સી પીટીઆઈ અનુસાર, કેન્દ્રીય ખાદ્ય સચિવ સંજીવ ચોપરાએ જણાવ્યું હતું કે સરકારે ક્રૂડ ખાદ્ય તેલ પરની મૂળભૂત કસ્ટમ ડ્યુટી ૨૦ ટકાથી ઘટાડીને ૧૦ ટકા કરી છે.
તાજેતરના નિર્ણય પછી કેટલી રાહત આપવામાં આવશે?
આ નિર્ણય અંગે, ઉદ્યોગ સંસ્થા સોલવન્ટ એક્સટ્રેક્ટર્સ એસોસિએશન ઓફ ઈન્ડિયા (SEA) ના એક્ઝિકયુટિવ ડિરેક્ટર બી.વી. મહેતાએ જણાવ્યું હતું કે, ‘‘ક્રૂડ પામ ઓઈલ, ક્રૂડ સોયાબીન ઓઈલ અને ક્રૂડ સૂર્યમુખી ઓઈલ પરની મૂળભૂત કસ્ટમ ડ્યુટી ઘટાડીને ૧૦ ટકા કરવામાં આવી છે. આ ત્રણેય ઉત્પાદનો પર અસરકારક આયાત ડ્યુટી (મૂળભૂત કસ્ટમ ડ્યુટી અને અન્ય ડ્યુટી સહિત) હવે ૧૬.૫ ટકા રહેશે. અગાઉ, આયાત ડ્યુટી ૨૭.૫ ટકા હતી. તેમણે કહ્યું કે, તાજેતરમાં રિફાઈન્ડ પામ ઓઈલની આયાતમાં વધારો થયો છે કારણ કે તે ક્રૂડ પામ ઓઈલ કરતાં સસ્તું છે.”
સરકારે એક બોલ્ડ નિર્ણય લીધો
શુક્રવારે મોડી રાત્રે જારી કરાયેલા એક નિવેદનમાં, SEA ના પ્રમુખ સંજીવ અસ્થાનાએ જણાવ્યું હતું કે,‘‘સરકારે યોગ્ય સમયે એક બોલ્ડ નિર્ણય લીધો છે કે ક્રૂડ અને રિફાઈન્ડ ઓઈલ વચ્ચેનો ડ્યુટી તફાવત ૮.૨૫ ટકાથી વધારીને ૧૯.૨૫ ટકા કરવામાં આવશે. હવે રિફાઈન્ડ પામ ઓઈલની આયાત ઘટાડવામાં આવશે.” ક્રૂડ પામ ઓઇલની માંગમાં વધારો થવાથી ઘરેલુ રિફાઇનિંગ ક્ષેત્રને નવું જીવન મળશે. આ તેલ પર કોઈ રાહત નહીં મળે
૩૦ મેના રોજ નાણા મંત્રાલય દ્વારા જારી કરાયેલા નોટિફિકેશન પછી પણ, રિફાઇન્ડ ઓઇલ પરની મૂળભૂત કસ્ટમ ડ્યુટી ૩૨.૫ ટકા પર રહેશે. એટલે કે, તેમાં કોઈ ફેરફાર કરવામાં આવ્યો નથી. હાલમાં, રિફાઇન્ડ ઓઇલ પર અસરકારક ડ્યુટી ૩૫.૭૫ ટકા છે. આવી સ્થિતિમાં, આ તેલનો ઉપયોગ કરતા લોકોને કોઈ રાહત મળશે નહીં.
IVPA એ પણ સરકારના નિર્ણયનું સ્વાગત કર્યુ, ઉદ્યોગ સંસ્થા લ્ચ્ખ્ અને ભારતીય વનસ્પતિ તેલ ઉત્પાદક સંગઠન (IVPA) એ પણ સરકારના નિર્ણયનું સ્વાગત કર્યું છે. સ્થાનિક વેપારીઓ અને ખાદ્ય તેલની પ્રક્રિયા કરતા લોકોને બચાવવા માટે ક્રૂડ અને રિફાઇન્ડ ખાદ્ય તેલ વચ્ચે ડ્યુટીમાં તફાવત વધારવાની લાંબા સમયથી માંગ કરવામાં આવી રહી છે.
ભારત તેની વનસ્પતિ તેલની માંગના ૭૦ ટકાથી વધુ આયાત દ્વારા પૂર્ણ કરે છે. તે મુખ્યત્વે ઇન્ડોનેશિયા, મલેશિયા અને થાઇલેન્ડથી પામ તેલ ખરીદે છે, જ્યારે આર્જેન્ટિના, બ્રાઝિલ, રશિયા અને યુક્રેનથી સોયાબીન તેલ અને સૂર્યમુખી તેલની આયાત કરે છે.
હવે કેટલો કર વસૂલવામાં આવશે?
અગાઉ, સરકારે કાચા પામ તેલ, કાચા સોયાબીન તેલ અને કાચા સૂર્યમુખી તેલ પરની મૂળભૂત કસ્ટમ ડ્યુટી ૨૦ ટકાથી ઘટાડીને ૧૦ ટકા કરી હતી. આ નવા ઘટાડા પછી, આ ત્રણેય તેલ પરની કુલ આયાત ડ્યુટી ૨૭.૫ ટકાથી ઘટીને ૧૬.૫ ટકા થઈ જશે. આનું કારણ એ છે કે ભારતના કળષિ માળખાગત અને વિકાસ ઉપકર અને સમાજ કલ્યાણ સરચાર્જ પણ તેમના પર લાદવામાં આવે છે.
આ પહેલા કરમાં ફેરફાર કયારે કરવામાં આવ્યા હતા?
સપ્ટેમ્બર ૨૦૨૪માં ભારતે ક્રૂડ અને રિફાઇન્ડ વનસ્પતિ તેલ પર ૨૦ ટકાની મૂળભૂત કસ્ટમ ડ્યુટી લાદી હતી. તે ફેરફાર પછી કાચા પામ તેલ, કાચા સોયાબીન તેલ અને કાચા સૂર્યમુખી તેલ પર ૨૭.૫ ટકા આયાત ડ્યુટી લાગે છે, જ્યારે આ પહેલાં તે ૫.૫ ટકા હતી. આ ત્રણેય તેલના રિફાઇન્ડ ગ્રેડ પર હવે ૩૫.૭૫ ટકા આયાત કર લાગે છે.(૩૮.૪)
