આચાર્યની ભરતી માટે ઈન્ટરવ્યૂ: 55 શાળાઓમાં આચાર્ય બનવા માટે કોઈને રસ નથી

રાજ્યની ૫૫ સ્કૂલોમાં આચાર્ય બનવા એક પણ ઉમેદવારે પસંદગી જ ન આપી

અમદાવાદ, રાજ્યની ગ્રાન્ટેડ માધ્યમિક અને ઉચ્ચતર માધ્યમિક શાળાઓમાં આચાર્યની ભરતી માટે હાલમાં ઈન્ટરવ્યૂની પ્રક્રિયા ચાલી રહી છે. જેમાં રાજ્યની ૫૫ જેટલી શાળામાં આચાર્ય થવા માટે એક પણ ઉમેદવારે પસંદગી જ આપી ન હોવાનું સામે આવ્યું છે.

આમ, ઉમેદવારોએ પસંદગી જ આપી ન હોવાથી બીજી વખતની ભરતી પછી પણ આ સ્કૂલોને કાયમી આચાર્ય મળશે નહીં. શિક્ષકમાંથી આચાર્ય બનવામાં કોઈ જ ફાયદો થતો ન હોવાના પગલે આચાર્ય બનવા જોઈએ તેટલા ઉમેદવારો તૈયાર થયા નથી. મોટાભાગે વતનનો લાભ લેવા જ આચાર્ય બનવા પર પસંદગી ઉતારવામાં આવતી હોય છે.

પ્રાપ્ત માહિતી અનુસાર, રાજ્યની માધ્યમિક અને ઉચ્ચતર માધ્યમિક ગ્રાન્ટેડ શાળાઓમાં આચાર્યની અંદાજે ૯૦૦ જેટલી જગ્યાની ભરતી માટે શુક્રવારથી ઈન્ટરવ્યૂ પ્રક્રિયા શરૂ કરવામાં આવી છે. આચાર્યના ઈન્ટરવ્યૂ એક માસ કરતા પણ વધુ સમય સુધી ચાલશે અને છેલ્લે ૧૩ ફેબ્રુઆરીના રોજ ઈન્ટરવ્યૂ પૂર્ણ થશે. આચાર્યની ભરતીના ફાઈનલ મેરિટમાં કુલ ૧૧૨૯ ઉમેદવારોનો સમાવેશ કરાયો હતો.

મેરિટમાં સમવિષ્ટ ઉમેદવારોને ૭ ડિસેમ્બર સુધી શાળા પસંદગી કરવાની તક આપવામાં આવી હતી, જેમાં એક ઉમેદવારને મહત્તમ ૭ જેટલી સ્કૂલોની પસંદગી કરવા માટે જણાવાયું હતું.

આમ, શાળા પસંદગીની પ્રક્રિયા પૂર્ણ થયા બાદ શુક્રવારથી ભરતી માટે ઈન્ટરવ્યૂની પ્રક્રિયા શરૂ કરવામાં આવી છે. શાળા પસંદગીની પ્રક્રિયા દરમિયાન ૧૧૨૯ ઉમેદવારો પૈકી રાજ્યની ૫૫ સ્કૂલોમાં આચાર્ય બનવા માટે એક પણ ઉમેદવાર દ્વારા પસંદગી આપવામાં આવી ન હોવાનું જાણવા મળે છે.

આમ, ઉમેદવારોએ આ ૫૫ સ્કૂલો પર પસંદગી જ ઉતારી ન હોવાની વિગતો સામે આવી છે. જેથી ભરતી પ્રક્રિયા પૂર્ણ થયા તે પહેલા જ રાજ્યની આ ૫૫ સ્કૂલોમાં ઉમેદવારોની પસંદગીના અભાવે આચાર્યની જગ્યા ખાલી પડી છે.

જે શાળામાં આચાર્યની જગ્યા ખાલી પડી છે તેમાં અમરેલી જિલ્લાની ૮, અરવલ્લીની ૧, ભરૂચની ૧, ભાવનગરની ૧, બોટાદની ૧, છોટા ઉદેપુરની ૩, દેવભુમિ દ્વારકાની ૨, દાહોદની ૮, જૂનાગઢની ૬, કચ્છની ૩, ખેડાની ૧, મહિસાગરની ૩, મોરબીની ૧, નર્મદાની ૧, પંચમહાલની ૧, પાટણની ૨, પોરબંદરની ૪, રાજકોટની ૪, સાબરકાંઠાની ૨ અને સુરેન્દ્રનગરની ૨ સ્કૂલને આચાર્ય માટે ઉમેદવાર જ મળ્યો ન હોવાનું જાણવા મળે છે.SS1MS