ચિલીમાં જંગલોમાં ભીષણ આગ લાગતા ૯૯ લોકોના મોત થયા

નવી દિલ્હી, દક્ષિણ અમેરિકન દેશ ચિલીના જંગલોમાં આગ લાગવાથી ૯૯ લોકોના મોત થયા છે, જ્યારે ૧૧૦૦થી વધુ મકાનો બળીને ખાખ થઈ ગયા છે. ન્યૂઝ એજન્સી એએફપીએ આ જાણકારી આપી હતી. ઇમરજન્સી સેવા વિભાગ હેલિકોપ્ટર અને ટ્રકની મદદથી શહેરી વિસ્તારોમાં લાગેલી આગને ઓલવવાનો પ્રયાસ કરી રહ્યું છે. મોટી સંખ્યામાં લોકો દાઝી ગયા છે, જેના કારણે મૃત્યુઆંક વધી શકે છે.

લગભગ ૧ મિલિયનની વસ્તી ધરાવતા મધ્ય ચિલીના વાલપરાઇસો પ્રદેશના ઘણા ભાગોને કાળા ધુમાડાએ ઢાંકી દીધા હતા. દરિયાકાંઠાના શહેર વિના ડેલ મારની આસપાસના વિસ્તારો સૌથી વધુ પ્રભાવિત થયા છે.

ગૃહ પ્રધાન કેરોલિના તોહાએ કહ્યું કે વાલપરાઈસોમાં સ્થિતિ સૌથી ગંભીર છે. રસ્તાઓ પર લોકોના મૃતદેહો પણ જોવા મળી રહ્યા છે. ૨૦૧૦ના ભૂકંપ બાદ ચિલીમાં આ સૌથી મોટી દુર્ઘટના છે.

ભૂકંપના કારણે લગભગ ૫૦૦ લોકો માર્યા ગયા હતા. રાષ્ટ્રપતિ ગેબ્રિયલ બોરીકે એક ટેલિવિઝન સંબોધનમાં કહ્યું કે પરિસ્થિતિ ખૂબ જ મુશ્કેલ છે. હાલ આગ ૪૩ હજાર હેક્ટરમાં ફેલાઈ ગઈ છે.

રિપોર્ટ અનુસાર, ભીષણ આગે શહેરના પહાડી વિસ્તાર વિલા ઈન્ડિપેન્ડેનિયાને પણ લપેટમાં લીધું છે. સળગી ગયેલી કાર રસ્તા પર જોવા મળે છે. મધ્ય અને દક્ષિણ પ્રદેશોમાં ૯૨ જંગલોમાં આગ છે.

સૌથી મોટી ચિંતા એ છે કે આગ ગીચ વસ્તીવાળા વિસ્તારોમાં ફેલાઈ રહી છે. જેના કારણે લોકો, ઘરો અને સુવિધાઓને અસર થવાની સંભાવના છે. નોંધનીય છે કે ચિલીમાં ઉનાળામાં જંગલમાં આગ લાગવી સામાન્ય બાબત છે. ગયા વર્ષે અહીં વિક્રમી ગરમી દરમિયાન ફાટી નીકળેલી આગમાં ૨૭ લોકોના મોત થયા હતા અને ૪૦૦,૦૦૦ હેક્ટરથી વધુ જમીનને અસર થઈ હતી.SS1MS