નારોલમાં રહેતા ગીત પ્રોડ્યુસરને રોકાણના નામે ગઠિયાએ ૨૦ લાખનો ચૂનો લગાવ્યો

શેરબજારમાં રોકાણના નામે છેતરપિંડીના કિસ્સામાં વધારો

આ જ પ્રકારની મોડસ ઓપરેન્ડીથી વધુ એક છેતરપિંડી થઇ હોવાની આર્થિક ગુના નિવારણ શાખામાં ફરિયાદ નોંધાઇ છે

અમદાવાદ,શેરબજારમાં રોકાણના નામે છેતરપિંડીના કિસ્સામાં વધારો થઇ રહ્યો છે. તેવામાં આ જ પ્રકારની મોડસ ઓપરેન્ડીથી વધુ એક છેતરપિંડી થઇ હોવાની આર્થિક ગુના નિવારણ શાખામાં ફરિયાદ નોંધાઇ છે. શહેરમાં રહેતા અને પ્રોડ્યુસરનું કામ કરતા યુવક સાથે એક ગઠિયાએ ૨૦ લાખની છેતરપિંડી આચરી છે. આ મામલે પોલીસે ગુનો નોંધી વધુ તપાસ હાથ ધરી છે. નારોલ લાંભામાં રહેતા હિરેનભાઇ ભોઇ પ્રોડ્યુસર છે. વર્ષ ૨૦૨૨માં થલતેજની એક હોટલમાં તેમના એક ગીત રિલિઝના પ્રમોશનની ઇવેન્ટ યોજાઇ હતી. ત્યારે જલજ દવે નામના વ્યક્તિ સાથે મુલાકાત થઇ હતી.

જે બાદ જલજ હિરેનભાઇના ઘરે ગયો હતો. જ્યાં તેણે હિરેનભાઇ તથા તેમના પિતાને શેરબજારમાં રોકાણની લાલચ આપી હતી. જલજે ૨૧ દિવસની સાઇકલમાં નફો આપવાની લાલચ આપી હતી. જેથી હિરેનભાઇ અને તેમના પિતા રોકાણ માટે તૈયાર થયા હતા અને જલજને પાંચ લાખનો ચેક આપ્યો હતો. જલજે પણ સિક્યોરિટી પેટે તેની ફર્મનો ચેક આપ્યો હતો.

થોડા સમય બાદ જલજે નાણાંની જરૂર હોવાનું કહીને હિરેનભાઇ પાસેથી રોકડા પાંચ લાખ તપોવન સર્કલ પાસેના કેફેમાં લીધા હતા. જે બાદ તેણે થોડું ઘણું વળતર આપીને પેમેન્ટ આપવાનું બંધ કરી દીધું હતું. જલજનું એકાઉન્ટ બ્લોક હોવાના કારણે તેણે આપેલો ચેક પણ રિટર્ન થયો હતો. આમ, જલજ ભરતભાઇ દવે (રહે. ગાંધીનગર)એ રોકાણ અને તેના વળતરની લાલચ આપીને ૨૦ લાખની છેતરપિંડી આચરી છે.