૨૦૨૫માં ભારતીય અર્થતંત્ર થોડું નબળું પડશે: આઈએમએફ

વોશિંગ્ટન, ઇન્ટરનેશનલ મોનેટરી ફંડ (આઇએમએફ)ના મેનેજિંગ ડાયરેક્ટર ક્રિસ્ટાલિના જ્યોર્જિવાએ જણાવ્યું હતું કે સ્થિર વૈશ્વિક વૃદ્ધિ છતાં ૨૦૨૫માં ભારતીય અર્થતંત્ર થોડું નબળું પડવાની ધારણા છે, બીજી તરફ અમેરિકાની ભાવિ વેપાર નીતિને કારણે વિશ્વભરમાં આર્થિક અનિશ્ચિતતામાં વધારો થવાની ધારણા છે.

આ વર્ષે વિશ્વમાં ખાસ કરીને યુએસની વેપાર નીતિની આસપાસ ઘણી અનિશ્ચિતતા ઊભી થઈ શકે છે. શુક્રવારે પત્રકારોના જૂથ સાથેના વાર્ષિક મીડિયા રાઉન્ડટેબલમાં તેમણે જણાવ્યું હતું કે ૨૦૨૫માં વૈશ્વિક વૃદ્ધિદર સ્થિર રહેવાની અપેક્ષા છે, પરંતુ પ્રાદેશિક સ્તરે આર્થિક વૃદ્ધિ અલગ અલગ રહી શકે છે.

૨૦૨૫માં ભારતીય અર્થતંત્ર થોડું નબળું પડવાની ધારણા છે. જોકે તેમણે આ અંગે કોઇ વધુ સ્પષ્ટતા કરી ન હતી. વર્લ્ડ ઇકોનોમી આઉટલુક અપડેટમાં તેના વિશે વધુ વિગતો મળશે. અર્થતંત્રોના ભાવિ અંગે તેમણે જણાવ્યું હતું કે અમારી અગાઉની ધારણા કરતાં અમેરિકાનું અર્થતંત્ર ઘણો સારો દેખાવ કરી રહ્યું છે. યુરોપિયન યુનિયનનું અર્થતંત્ર કંઇ અંશે અટકી ગયું છે. અને ભારત થોડું નબળું છે.

બ્રાઝિલ કંઈક અંશે ઊંચા ફુગાવાનો સામનો કરી રહ્યું છે. વિશ્વના બીજા ક્રમના સૌથી મોટા અર્થતંત્રમાં ડિફ્લેશનરી દબાણ છે અને તે સ્થાનિક માગના પડકારોનો સામનો કરી રહ્યું છે.

જ્યોર્જિવાએ જણાવ્યું હતું કે ઓછી આવક ધરાવતા દેશોએ તમામ પ્રયાસો કર્યા છે, આમ છતાં તેઓ એવી સ્થિતિમાં છે કે જો કોઇ નવો આંચકો આવે તો તેમને ઘણી નકારાત્મક અસર થઈ શકે છે. ૨૦૨૫માં અમને ખાસ કરીને આર્થિક નીતિના સંદર્ભમાં ઘણી બધી અનિશ્ચિતતાની ધારણા છે.

અમેરિકાના અર્થતંત્રનું કદ અને તેની ભૂમિકા ઘણી જ મોટી છે, તેથી આગામી વહીવટીતંત્ર (ટ્રમ્પ) ખાસ કરીને ટેરિફ, ટેક્સ, ડિરેગ્યુલેશન અને સરકારની કાર્યક્ષમતાના સંદર્ભમાં કેવી નીતિઓ અપનાવે છે તેના પર વિશ્વભરની ચાંપતી નજર છે. આ અનિશ્ચિતતા ખાસ કરીને આગામી સમયગાળાની વેપાર નીતિ સંબંધિત છે.

તેનાથી વૈશ્વિક અર્થતંત્ર સામેના અવરોધમાં વધારો થશે. આ અનિશ્ચિતતાથી વૈશ્વિક સપ્લાય ચેઇન સાથે વધુ જોડાયેલા, મધ્યમકદના અર્થતંત્રો ધરાવતા દેશોને વધુ અસર થશે. એક પ્રદેશ તરીકે તેની એશિયાને પણ અસર થશે. આઈએમએફના વડાએ જણાવ્યું હતું કે વૈશ્વિક સ્તરે લાંબા ગાળાના ઊંચા વ્યાજદરોમાં આ અનિશ્ચિતતાનું પ્રતિબંધ પડે છે.

વિશ્વભરમાં ફુગાવામાં ઘટાડો થવાની ધારણા વ્યક્ત કરતાં તેમણે જણાવ્યું હતું કે આપણે જાણીએ છીએ કે ફુગાવા સામે લડત આપવા માટે ઊંચા વ્યાજદર જરૂર છે. ઊંચા વ્યાજદરોથી વૈશ્વિક અર્થતંત્રમાં મંદીમાં ગયું નથી. તેના ઇચ્છિત પરિણામો મળ્યાં છે.

ઊભરતા દેશો કરતાં વિકસિત દેશોમાં ફુગાવો વધુ ઝડપથી તેના ટાર્ગેટ પર પરત આવી રહ્યો છે. તેમણે જણાવ્યું હતું કે વિકસિત દેશોના ચલણો અને ઊભરતા દેશોના ચલણો સામે મજબૂત ડોલરથી ઊભરતા બજારોના અર્થતંત્રો અને ખાસ કરીને નીચી આવક ધરાવતા દેશોમાં ફંડિંગ ખર્ચમાં વધારો થઈ શકે છે. તેમણે ઊભરતા દેશોને નીચી-વૃદ્ધિ અને ઊંચા દેવાની સમસ્યાનો ઉકેલ લાવવાનો અનુરોધ કર્યાે હતો.

દેશોએ ભાવ સ્થિરતાના માર્ગ પર આગળ વધવાની જરૂર છે, દેશોએ તબક્કાવાર ધોરણે નાણાકીય શિસ્ત લાવવાની જરૂર છે. તેઓએ તાત્કાલિક એવા સુધારા અપનાવવાની જરૂર છે જે વૃદ્ધિ તરફી હોય અને ટકાઉ રીતે વૃદ્ધિને વેગ આપે. ટૂંકા ગાળાના દરો નીચે જઈ રહ્યા છે. લાંબા ગાળાની યીલ્ડ વધી રહી છે.SS1MS