જમ્મુ-કાશ્મીરના કઠુઆમાં ત્રણ આતંકવાદીઓ ઠાર

(એજન્સી)કઠુઆ, જમ્મુ-કાશ્મીરમાં વિધાનસભા ચૂંટણી પહેલા સેના અને પોલીસે સંયુક્ત રીતે એક મોટું ઓપરેશન હાથ ધર્યું છે. કઠુઆ જિલ્લામાં આજે ભારતીય સેનાના વિશેષ દળો અને જમ્મુ-કાશ્મીર પોલીસ દ્વારા સફળ ઓપરેશનમાં ત્રણ આતંકવાદીઓને ઠાર કરવામાં આવ્યા હતા. સૂત્રોના જણાવ્યા અનુસાર આ ઓપરેશન હજુ પણ ચાલુ છે.

આ ઓપરેશનમાં ભારતીય સેનાની ૧ પેરાશૂટ બટાલિયન, ૨૨ ગઢવાલ રાઈફલ્સ અને જમ્મુ-કાશ્મીર પોલીસનું સ્પેશિયલ ઓપરેશન ગ્રુપ સામેલ છે. સુરક્ષા દળોએ આતંકીઓ વિરુદ્ધ કાર્યવાહી કરી અને આ દરમિયાન ત્રણ આતંકીઓ માર્યા ગયા. ઉલ્લેખનીય છે કે જમ્મુ-કાશ્મીરમાં વિધાનસભાની ચૂંટણી ત્રણ તબક્કામાં યોજાશે. જે ૧૮ સપ્ટેમ્બરથી શરૂ થશે. સુરક્ષા દળોએ ચૂંટણી પહેલા વિસ્તારમાં સુરક્ષા સુનિશ્ચિત કરવા માટે આ ઓપરેશન હાથ ધર્યું છે.

ગયા મહિને, જમ્મુ અને કાશ્મીર પોલીસે ચાર આતંકવાદીઓના સ્કેચ જાહેર કર્યા હતા જેઓ કઠુઆ જિલ્લાના ઉચ્ચ પ્રદેશોમાં ‘ધોક્સ’ (માટીના મકાનો) માં જોવા મળ્યા હતા. પોલીસે તેના વિશે વિશ્વસનીય માહિતી આપનારને ૨૦ લાખ રૂપિયાના રોકડ ઈનામની જાહેરાત કરી હતી.તમને જણાવી દઈએ કે ૮ જુલાઈના રોજ કઠુઆ જિલ્લાના માચેડીના દૂરના જંગલ વિસ્તારમાં સેનાના પેટ્રોલિંગ પર આતંકવાદીઓ દ્વારા ઘાતક હુમલો કરવામાં આવ્યો હતો. આ હુમલામાં એક જુનિયર કમિશન્ડ ઓફિસર સહિત પાંચ જવાનો શહીદ થયા હતા.

વ્યાપક સર્ચ ઓપરેશન છતાં પાકિસ્તાન સ્થિત જૈશ-એ-મોહમ્મદ સંગઠન સાથે જોડાયેલા કાશ્મીર ટાઈગર્સના આતંકવાદીઓ હજુ સુધી પકડાયા નથી. તેઓ પાકિસ્તાનમાંથી ભારતમાં ઘૂસણખોરી કરી આવ્યા હતા. Âટ્‌વટર પર એક પોસ્ટમાં પોલીસે ચાર આતંકવાદીઓના સ્કેચ જાહેર કર્યા છે. તેઓ છેલ્લે જિલ્લાના ઉપરના વિસ્તારોમાં મલ્હાર, બાની અને સોજધાર જંગલોના ‘ધોક’માં જોવા મળ્યા હતા.

માહિતી શેર કરતા, કઠુઆના વરિષ્ઠ પોલીસ અધિક્ષક અનાયત અલીએ કહ્યું કે પોલીસે ચાર આતંકવાદીઓના સ્કેચ જાહેર કર્યા છે, જેઓ છેલ્લે મલ્હાર, બાની અને સીઓજધરમાં જોવા મળ્યા હતા. કઠુઆ પોલીસે તેની પોસ્ટમાં કહ્યું, “કાર્યવાહી યોગ્ય માહિતી માટે દરેક આતંકવાદી પર ૫ લાખ રૂપિયાનું ઈનામ છે. આતંકવાદીઓ વિશે વિશ્વસનીય માહિતી આપનારને યોગ્ય ઈનામ પણ આપવામાં આવશે.