ઝઘડિયા GIDCની કંપનીના નવા પ્લાન્ટ પર પાણી નાંખવાના મુદ્દે વિવાદ

પ્રતિકાત્મક
જીઆઈડીસીમાં પાણી મોકલવાના કોન્ટ્રાક્ટ બાબતે બે જુથો બાખડતા ફરી એકવાર -જીઆઈડીસી સંકુલમાં જુથ અથડામણનો મામલો સામે આવ્યો
(પ્રતિનિધિ) ભરૂચ, ભરૂચ જીલ્લાના ઝઘડિયા સ્થિત જીઆઈડીસીમાં એક કંપનીના નવા પ્લાન્ટમાં પાણી નાંખવાના મુદ્દે બે પક્ષો વચ્ચે થયેલ ઝઘડો મારામારી સુધી પહોંચતા બન્ને પક્ષે સામસામે થયેલ પોલીસ ફરિયાદોમાં કુલ ૮ ઈસમો સામે ગુનો નોંધાયો હતો. આ અંગે સંજયભાઈ મુકેશભાઈ પટેલ રહે.ગામ તલોદરા તા.ઝઘડિયાનાએ ઝઘડિયા પોલીસમાં લખાવેલ ફરિયાદ મુજબ તેઓ કોન્ટ્રાક્ટ અને ટ્રાન્સપોર્ટેશનનો વ્યવસાય કરે છે.
ઝઘડિયા જીઆઈડીસીની ડીસીએમ કંપનીના નવા પ્લાન્ટ પર તેમનો પાણીનો કોન્ટ્રાક્ટ ચાલે છે.તા.૨૪ મીના રોજ પ્લાન્ટ પર પાણીની જરૂર હોવા બાબતનો ફોન આવતા તેમણે તેમના ડ્રાઈવર છત્રસિંગ વસાવાને પાણીનું ટેન્કર લઈને પ્લાન્ટ પર મોકલ્યો હતો.ત્યાર બાદ સાંજના છ વાગ્યાના સમયે ડ્રાઈવરે ફોન કરીને સંજયભાઈને જણાવેલ કે એક ફોર વ્હીલર ગાડીવાળો માણસ પાણી નાંખવાનું ના પાડે છે.
સંજયભાઈ એ પ્લાન્ટ પર જઈને જોતા તે માણસ તલોદરા ગામનો વિવેક કિશનભાઈ યાદવ હતો.વિવેકે સંજયભાઈ ને કહ્યું હતું કે તારે અહિં પાણી નાંખવાનું નહિ.જેથી સંજયભાઈ એ કહેલ કે મને પ્લાન્ટ પરથી એન્જિનિયર ધ્રુવનો ફોન આવતા તેમણે પાણીનું ટેન્કર મોકલ્યું છે.ત્યાર બાદ આ બાબતે ઝઘડો થયો હતો અને વિવેકભાઈ ઝપાઝપી કરવા લાગેલ,તેમજ વિવેકનો ડ્રાઈવર આકાશ દિપુ યાદવ હાથમાં પાવડો લઈને આવ્યો હતો
અને સંજયભાઈને મારવા જતા તેમણે ડાબો હાથ આગળ કરતા ડાબા હાથમાં અને માથામાં અછળતો પાવડાનો પાછળનો ભાગ વાગી ગયો હતો.ત્યાર બાદ સંજયભાઈના સંબંધી અને મિત્ર ત્યાં આવી ગયા હતા તેમજ વિવેકના પિતા કિશનપાલ તથા વિવેકનો ભાઈ ઉમંગ પણ ત્યાં આવી ગયા હતા.આ ઝઘડા દરમ્યાન સંજયભાઈને ચક્કર આવતા તેમને વાલિયા સરકારી દવાખાને સારવાર માટે લઈ જવાયા હતા.
આ સંદર્ભે સંજયભાઇ પટેલ રહે.ગામ તલોદરાનાએ વિવેક કિશનપાલ યાદવ,આકાશ દિપુ યાદવ,કિશનપાલ યાદવ તમામ રહે.ગામ તલોદરા તા.ઝઘડિયા જી.ભરૂચના વિરુધ્ધ ઝઘડિયા પોલીસમાં ફરિયાદ લખાવી હતી.જ્યારે સામા પક્ષે કિશનપાલ નંદકિશોર યાદવ રહે.ગામ તલોદરા તા.ઝઘડિયાનાએ ઝઘડિયા પોલીસમાં લખાવેલ ફરિયાદ મુજબ તા.૨૪ મીના રોજ સાંજના છ વાગ્યાના અરસામાં તેમના છોકરા ઉમંગભાઈએ તેમને જણાવેલ કે
તેમના પાણીના ટેન્કરો લઈને ડ્રાઈવરો ડીસીએમ કંપનીના નવા પ્લાન્ટ પર ગયા હતા ત્યારે પ્લાન્ટ બહાર તલોદરાના સંજય પટેલ અને તેનો ભાઈ મનોજ પટેલ ઝઘડો કરે છે.આ સાંભળીને કિશનપાલ તેમના છોકરા ઉમંગ સાથે કંપનીના પ્લાન્ટ પર ગયા હતા.ત્યારે સંજયભાઈ પટેલ તેમનો ભાઈ મનોજભાઈ પટેલ તેમજ સેલોદ ગામના ધવલભાઈ પટેલ ત્યાં હાજર હતા.
સંજયભાઈના હાથમાં લાકડાનો સપાટો હતો અને મનોજભાઈના હાથમાં લોખંડનો સળિયો હતો તેમજ ધવલભાઈના હાથમાં પાવડો હતો. ત્યાર બાદ સંજય પટેલે કિશનપાલને ડાબા હાથના ભાગે તેમજ બરડા પર સપાટા મારી દીધા હતા.આ ઝઘડાની ખબર કિશનપાલના છોકરા વિવેકને થતા તે પણ ત્યાં આવતા તેને પણ સપાટા મારવામાં આવ્યા હતા.
કિશનપાલના ટેન્કર ડ્રાઈવરને પણ સળિયાથી જમણા હાથે ઈજા થઈ હતી.થોડીવાર બાદ સેલોદના શાહરૂખ કાલુ અને તેનો ભાઇ ગનો કાલુ પણ ત્યાં આવી ગયા હતા અને ઝઘડામાં સામેલ થયા હતા.ઝઘડામાં ઈજાગ્રસ્ત થયેલાઓને સારવાર માટે ભરૂચ સિવિલ હોસ્પિટલ ખાતે લઈ જવાયા હતા.
એક મહિના અગાઉ પણ ડીસીએમ કંપનીના નવા પ્લાન્ટ પર પાણીનું ટેન્કર લઈ જવા બાબતે બન્ને પક્ષો વચ્ચે ઝઘડો થયો હતો.આ અંગે કિશનપાલ યાદવ રહે.ગામ તલોદરા તા.ઝઘડિયાનાએ સંજય મુકેશભાઈ પટેલ અને મનોજ મુકેશભાઈ પટેલ બન્ને રહે.ગામ તલોદરા તા.ઝઘડિયા તેમજ ધવલ નવનીતભાઈ પટેલ,શાહરુખ કાલુ અને ગનો કાલુ ત્રણેય રહે.ગામ સેલોદ તા.ઝઘડિયાના વિરુધ્ધ ઝઘડિયા પોલીસમાં ફરિયાદ લખાવી હતી.
ઝઘડિયા જીઆઈડીસીની એક કંપનીના પ્લાન્ટમાં પાણી નાંખવાના કોન્ટ્રાક્ટ બાબતે બે પક્ષો વચ્ચે થયેલ ઝઘડાને લઈને ઝઘડિયા જીઆઈડીસી વિસ્તારમાં ફરી એકવાર જુથ અથડામણ જેવો મામલો સામે આવ્યો છે.ત્યારે જીઆઈડીસી વિસ્તારમાં છાસવારે થતાં ઝઘડાઓ અટકાવવા તંત્ર કડક પગલા ભરે તે ઈચ્છનીય છે