જુગાર રમવા બેઠેલા પોલીસને જોઈને ભાગ્યા, બે નદીમાં કુદતા મળ્યું મોત
(એજન્સી)સુરત, સુરતમાં દારૂ જુગારની બદી સામે આવી રહી છે. કોઝ વે નજીક તાપી નદીના કાંઠે ૮થી ૧૦ ઈસમો ઝાડી ઝાંખરામાં જુગાર રમવા બેઠા હતાં. આ દરમિયાન પોલીસના પેટ્રોલિંગની જાણ થતાં તમામ નાસી ગયા હતાં. જેમાંથી બે ઈસમો તાપી નદીમાં કુદી ગયા હતાં. જેઓના મોત નીપજ્યાં હતાં. જેથી મૃતકોના પરિવારજનો દ્વારા આક્ષેપ કરવામાં આવ્યાં હતાં.
કોઝ વેમાંથી ગુલામ નબી ગુલામ મહંમદ સફેદા અને આમીનના મૃતદેહ મળી આવ્યા હતા. ત્યાર બાદ બંનેને નવી સિવિલ હોસ્પિટલમાં ખસેડવામાં આવ્યા હતા. જ્યાં સામે આવ્યું કે, પોલીસને જોઈને જુગારીઓ જુગારધામ છોડીને આમતેમ ભાગવા લાગ્યા હતા. ભાગદોડ દરમિયાન બે ઈસમો પાળી પરથી તાપી નદીમાં કૂદી ગયા હતા. પાણીની ભરતી આવી જતા બંને યુવકો ઊંડા પાણીમાં ગરકાવ થઈ ગયા હતા.
ફાયર વિભાગની ટીમે ઘટનાસ્થળે પહોંચી બંનેના મૃતદેહને બહાર કાઢી લીધા હતા.મરણજનાર ગુલામ નબી સફેદાના સ્વજનોએ જણાવ્યું હતું કે, કોઝવે નજીક જુગાર રમાઈ રહ્યું હતું ત્યારે રાંદેર ડી સ્ટાફ પોલીસ આવી જતા અમારા સ્વજન ગુલામ નબી સફેદા અને અન્ય કેટલાક વ્યક્તિઓ પોલીસને જોઈને ડરને માર્યા આમતેમ ભાગ્વા લાગ્યા હતા.
ત્યારે તેઓ નદીમાં કૂદી ગયા હતા અને પાણીમાં ડૂબી જતાં તેમનું મોત નીપજ્યું હતું. જ્યારે આ બંને ડૂબી રહ્યા હતા ત્યારે પોલીસ ત્યાં હાજર જ હતી. જે બચાવવા જવા ઈચ્છતા હતા તેમને પણ બચાવવા જવા દેવામાં આવ્યા ન હતા અને ત્યારબાદ પોલીસ ભાગી ગઈ હતી. પોલીસ સામે કાર્યવાહી થવી જોઈએ.
