કલ્કિ અને રાઝીનું કોમ્બિનેશન આલિયાની નારી કેન્દ્રિત ફિલ્મ

મુંબઈ, પ્રભાસ અને અમિતાભ બચ્ચનની બ્લોકબસ્ટર ફિલ્મ કલ્કિ ૨૮૯૮ એડીના ડાયરેક્ટર નાગ અશ્વિને નારી કેન્દ્રિત ફિલ્મ બનાવવાનું વિચાર્યું છે. તેમાં લીડ રોલ માટે આલિયા ભટ્ટ ફાઈનલ થાય તેવી શક્યતા છે.

‘રાઝી’ અને ‘ગંગુબાઈ કાઠિયાવાડી’ જેવી નારી કેન્દ્રિત ફિલ્મોમાં પોતાની ટેલેન્ટ પુરવાર કરી ચૂકેલી આલિયા ભટ્ટ પણ નાગ અશ્વિન સાથે કામ કરવા ઉત્સુક હોવાનું કહેવાય છે.

એક્ટર અને ડાયરેક્ટર વચ્ચે આ અંગે વાટાઘાટો ચાલી રહી છે. નાગ અશ્વિનની નારી કેન્દ્રિત ફિલ્મ અંગે ખાસ વિગતો બહાર આવી નથી, પરંતુ તેમાં લીડ રોલ માટે આલિયા પરફેક્ટ ચોઈસ હોવાનું અનુમાન છે.

રિપોર્ટ મુજબ, નાગ અશ્વિન પાન ઈન્ડિયા ફિલ્મ બનાવવા માગે છે અને તેના માટે બજેટ પણ મોટું રખાયું છે. મહાભારતની કથામાંથી પ્રેરણા લઈને નાગ અશ્વિને બિગ બજેટ કલ્કિ બનાવતાં પહેલાં નારી કેન્દ્રિત ફિલ્મ મહંતી રિલીઝ કરી હતી. આ ફિલ્મમાં કિર્તિ સુરેશની દમદાર એક્ટિંગના વખાણ થયા હતા.

‘મહંતી’ની પાન ઈન્ડિયા રિલીઝ શક્ય બની ન હતી, પરંતુ હવે નાગ અશ્વિનને મોટા ફલક પર જ ફિલ્મો બનાવવી અને રિલીઝ કરવી છે. તેના માટે આલિયાનું સ્ટારડમ તેમને જરૂરી લાગ્યું છે. આલિયાને બોલિવૂડમાં લોકપ્રિયતા મળેલી છે, જ્યારે આરઆરઆરના કારણે સાઉથનું ઓડિયન્સ પણ આલિયાને ઓળખતું થયું છે.

તાજેતરમાં રિલીઝ થયેલી આલિયાની ‘જિગરા’ બોક્સઓફિસ પર ઊંધા માથે પછડાઈ છે, પરંતુ આલિયાની એક્ટિંગના વખાણ થયા છે. ફિલ્મની નિષ્ફળતા માટે કોઈ રીતે આલિયાને જવાબદાર મનાતી નથી. નાગ અશ્વિનનો સમય અત્યારે સારો ચાલે છે અને તેઓ જે ફિલ્મ હાથમાં લે છે, તે હિટ બને છે. નાગ અશ્વિન પોતાની ફિલ્મના પાત્રોને ભવ્ય અને જાજરમાન બનાવવા માટે જાણીતા છે.

આલિયાની ટેલેન્ટને જોતાં તે દરેક પ્રકારના રોલમાં ફિટ બેસી શકે છે. આલિયા અને નાગ અશ્વિન ભેગા હોય તો રિલીઝ ટાણે બોલિવૂડ અથવા સાઉથમાંથી મોટી સ્પર્ધા થવાની આશંકા હળવી બને છે. એકંદરે કલ્કિ અને રાઝીનું આ કોમ્બિનેશન બંને માટે લાભદાયી છે.

આ ફિલ્મને સાઉથના પ્રોડક્શન હાઉસ વૈજયંતિ ફિલ્મ્સ દ્વારા બનાવવામાં આવશે. આલિયાએ સાઉથની છેલ્લી ફિલ્મ આરઆરઆર કરી હતી. વર્ષાે પછી સાઉથના ડાયરેક્ટર અને પ્રોડ્યુસર સાથે આલિયા નવો પ્રોજેક્ટ શરૂ કરે તેવી શક્યતા છે. આ ફિલ્મની સ્ક્રિપ્ટ હજુ ફાઈનલ થઈ નથી. વળી, આલિયા અત્યારે ‘લવ એન્ડ વોર’ તથા ‘આલ્ફા’માં રોકાયેલી છે.

નાગ અશ્વિન પણ ૬-૮ મહિના સુધી નવો પ્રોજેક્ટ શરૂ કરી શકે તેમ નથી. એકંદરે ૨૦૨૫માં જુલાઈ મહિના આસપાસ નાગ અશ્વિન અને આલિયાની ફિલ્મ ફ્લોર પર પહોંચે તેવી શક્યતા છે.SS1MS