ખેડા જનરલ હોસ્પિટલ ખાતે ચિકિત્સા ઉપકરણોનો વિતરણ કાર્યક્રમ યોજાયો

ઈન્ડિયન ઓઈલ કોર્પોરેશન લિમિટેડ દ્વારા સાંસદ દેવુસિંહ ચૌહાણે સોનોગ્રાફી મશીનનું લોકાર્પણ કર્યુ

(પ્રતિનિધિ) નડિયાદ, ઈન્ડિયન ઓઈલ કોર્પોરેશન લિમિટેડ દ્વારા જનરલ હોસ્પિટલ, ખેડા ખાતે કોર્પોરેટ સામાજિક દાયિત્વ હેઠળ વર્ષ ૨૦૨૫ માટે ચિકિત્સા ઉપકરણોનો વિતરણ કાર્યક્રમ યોજાયો હતો.

જે અન્વયે ખેડા જનરલ હોસ્પિટલ ખાતે સાંસદ દેવુસિંહ ચૌહાણ દ્વારા સોનોગ્રાફી મશીનનું લોકાર્પણ કરવામાં આવ્યુ હતુ. સાંસદશ્રીએ આ આધુનિક સોનોગ્રાફી મશીનની કામગીરી અને વિશેષતાઓની જાણકારી મેળવી હતી.નોંધનીય છે કે, જનરલ હોસ્પિટલ, ખેડા ખાતે લોકોને નિઃશુલ્ક સોનોગ્રાફી મશીનનો લાભ મળશે. ખાસ કરીને ગર્ભવતી મહિલાઓ માટે સોનોગ્રાફી મશીન ખૂબ જ ઉપયોગી સાબિત થશે.

આ પ્રસંગ ખેડા સાંસદ દેવુસિંહ ચૌહાણે ખેડા સબ ડિવિઝનલ હોસ્પિટલને આપવામાં આવેલ સોનોગ્રાફી મશીન બદલ ઈન્ડિયન ઓઇલ કોર્પોરેશનનો આભાર માન્યો હતો. સાંસદે જનરલ હોસ્પિટલ, ખેડાની કામગીરીને બિરદાવી હતી અને ડોક્ટર્સને સેવાના ભાવથી કામગીરી કરવા અપીલ કરી હતી. સાથે જ ઉપસ્થિત અધિકારીઓને પોતાના નિશ્ચિત કાર્યક્ષેત્ર ઉપરાંત અન્ય ઇનોવેટિવ કામગીરી કરવા અનુરોધ કર્યો હતો.

વધુમાં આરોગ્ય વિભાગને મળેલ ઉત્તમ સેવાઓને લોકો દ્વારા સાચવવામાં આવે અને આ રીતે એક સંવેદનશીલ પ્રશાસન તંત્ર નિર્માણ કરવાની કામગીરીમાં સૌને ભાગીદાર થવા સાંસદશ્રીએ અપીલ કરી હતી.ધારાસભ્ય કલ્પેશ પરમારે આવનાર સમયમાં ખેડા જનરલ હોસ્પિટલમાં વધુ અસરકારક સુવિધાઓ ઉપલબ્ધ કરાવવા માટે પૂરતા પ્રયત્નો કરવાની ખાતરી આપી હતી. તથા આયુષ્માન કાર્ડના લાભથી વંચિત લોકોને જરૂરી લાભ અપાવવા સૌને મદદરૂપ થવા અપીલ કરી હતી.

આ અવસરે ખેડા આરએમઓ ડો. ઈમ્તિયાઝ દ્વારા જનરલ હોસ્પિટલ ખેડાની કામગીરીનો પ્રગતિ અહેવાલ રજૂ કરવામાં આવ્યો હતો. અત્રે ઉલ્લેખનીય છે કે, ઈન્ડિયન ઓઇલ કોર્પોરેશન તેના કોર્પોરેટર સામાજિક દાયિત્વ ઝ્રજીઇ પ્રોજેક્ટ અંતર્ગત સમાજના વિકાસ અને કલ્યાણમાં યોગદાન આપવા માટે જનરલ હોસ્પિટલ ખેડામાં સોનોગ્રાફી મશીન

અને ડિસ્ટ્રિક્ટ હોસ્પિટલ નડિયાદમાં સેલ કાઉન્ટર મશીન આપવા માટેનો નિર્ણય લેવામાં આવ્યો છે. અંદાજિત રૂ.૩૦ લાખ રૂપિયાના ખર્ચે આરોગ્યમ પ્રોજેક્ટ હેઠળ આ સેવાઓ પ્રદાન કરવામાં આવી રહી છે.

આ કાર્યક્રમમાં નગરપાલિકા પ્રમુખ જોસનાબેન પટેલ, ખેડા પ્રાંત સુરજ બારોટ,, ચીફ જનરલ મેનેજર આઈઓસીએલ લોકેશજી, ખેડા મામલતદાર સીડીએચઓ ડો. ધ્રુવે, આરસીએચઓ ડો.એ.એ પઠાણ, આરએમમો ડો. ઈમ્તિયાઝ સહિત અન્ય અધિકારીઓ, મેડિકલ સ્ટાફ અને ખેડા નગરજનો ઉપસ્થિત રહ્યા હતા.