જ્વેલરીનો શો રુમ ધરાવતા વેપારીઓએ કરોડો રૂપિયાની ઠગાઈ કરી
અમદાવાદના વેપારી સાથે લક્ઝુરીયસ ગાડીના બહાને ૯૫ લાખની છેતરપિંડી કરનાર ઝડપાયો-આરોપી વિરુદ્ધ મુંબઈમાં અન્ય ૩ ગુના પણ નોંધાયા હોવાનું સામે આવ્યું છે.
(એજન્સી)અમદાવાદ, શહેરના બોડકદેવના વેપારી સાથે કરોડોની ઠગાઈ મામલે પોલીસે મુંબઈથી જ્વેલર્સની ધરપકડ કરવામાં આવી છે.. આરોપીએ વેપારીને વેચાણ આપેલી ગાડીની લોન ભરપાઈ કરી ન કરીને છેતરપીંડી આચરી હતી. એટલું જ નહીં વેચાણના બહાને એક વાહનના પૈસા લઈને વાહન પણ આપ્યું ન હતું. પોલીસે આ ઘટનામાં આરોપીની મુંબઈથી ધરપકડ કરી છે.
તેમજ અન્ય ફરાર બે આરોપી કેનેડામાં હોવાનું સામે આવતા તેને લઈ વધુ કાર્યવાહી શરુ કરવામાં આવી છે. આરોપી રિષભ પાહુજા બોડકદેવ પોલીસની કસ્ટડીમાં છે. પ્રાપ્ત માહિતી અનુસાર આરોપી રિષભે અમદાવાદના વેપારી ધ્રુવેશ પટેલને કાર વેચાણ આપી હતી, જેમાં લેન્ડ રોવર ડીફેન્ડર, રેન્જ રોવર વોગ અને બીએમડબ્લ્યુ વેચાણ આપી ૩.૯૭ કરોડ મેળવી લીધા હતા. જે રકમ મેળવ્યા બાદ ગાડીની લોન ભરપાઈ ન કરી તેની એનઓસી આપી ન હતી,
ઉપરાંત વધુ એક ગાડી વેચાણ માટે બતાવી તેના પણ રુપિયા ૯૫ લાખ મેળવી લીધા હતા. જે પરત ન કરતા ફરિયાદ નોંધાઈ હતી. જેથી આરોપીની ધરપકડ કરવામાં આવી છે. બોડકદેવ પોલીસે છેતરપિંડીની ફરિયાદ નોંધી તપાસ કરતા રિષભની ધરપકડ કરવામાં આવી છે.
સાથે જ આ ગુનામાં પ્રકાશ પાહુજા અને ચિરાગ પાહુજા ફરાર છે. જેની પોલીસે તપાસ કરતા તે બંને કેનેડા હોવાનું સામે આવ્યું છે. સાથે જ આરોપીઓ મુંબઈમાં ત્રિકમદાસ જ્વેલર્સના નામે શો રુમ ધરાવતા હતા.
જોકે તે બંધ થઈ જતા આરોપીએ આ છેતરપિંડી આચરી હોવાનું સામે આવ્યુ છે. સાથે જ આરોપી વિરુદ્ધ મુંબઈમાં અન્ય ૩ ગુના પણ નોંધાયા હોવાનું સામે આવ્યું છે. મહત્વનું છે કે આરોપી આ પ્રકારની મોડસ ઓપરેન્ડીથી છેતરપિંડી કરવાની ટેવ ધરાવતો હોવાથી આરોપીએ આપેલી ગાડીઓ અંગે પણ પોલીસે તપાસ શરુ કરી છે.
સાથે જ આરોપીએ અન્ય કોઈ સાથે છેતરપિંડી કરી છે કે કેમ તથા ફરાર બે આરોપીની ધરપકડ માટે કાયદાકીય પ્રક્રિયા શરુ કરી છે. ત્યારે પોલીસ તપાસમાં શું હકીકત સામે આવે છે, તે જોવુ મહત્વનું છે.
