બિગ બોસના વિજેતા સ્ટેન્ડ-અપ કોમેડિયન મુનાવર ફારુકી વિરૂધ્ધ ફરિયાદ

મુનવર ફારુકીના હફ્તા વસુલી વિરુદ્ધ ફરિયાદ દાખલ-એડવોકેટ અમિતા સચદેવે નવી દિલ્હી પોલીસને એક ઈ-મેલ મોકલીને મુનવર વિરુદ્ધ ફરિયાદ નોંધાવવાની માંગ કરી

મુંબઈ, સમય રૈનાના શો ઇન્ડિયાઝ ગોટ લેટેન્ટ બાદ હવે બિગ બોસના વિજેતા સ્ટેન્ડ-અપ કોમેડિયન મુનાવર ફારુકીના શો હફ્તા વસૂલી સામે ફરિયાદ દાખલ કરવામાં આવી છે. મુનવર પર ધાર્મિક લાગણીઓનું અપમાન કરવાનો અને અશ્લીલતા ફેલાવવાનો આરોપ છે.

એડવોકેટ અમિતા સચદેવે નવી દિલ્હી પોલીસને એક ઈ-મેલ મોકલીને મુનવર ફારુકી વિરુદ્ધ ફરિયાદ નોંધાવવાની માંગ કરી છે. સચદેવે હાસ્ય કલાકાર પર અશ્લીલતા ફેલાવવાનો અને ધાર્મિક લાગણીઓને ઠેસ પહોંચાડવાનો, સાંસ્કૃતિક મૂલ્યોનું ઉલ્લંઘન કરવાનો અને સમાજ અને યુવા મનને પ્રદૂષિત કરવાનો આરોપ લગાવ્યો છે.
સોશિયલ મીડિયા પ્લેટફોર્મના X હેન્ડલ પર ફરિયાદ પત્રની નકલ શેર કરતા એડવોકેટ અમિતા સચદેવે લખ્યું, મેં મુનવર ફારુકી વિરુદ્ધ ફરિયાદ નોંધાવી છે.

મેં મુનવર વિરુદ્ધ તેના શો હફ્તા વસૂલી માટે સત્તાવાર રીતે ફરિયાદ નોંધાવી છે. આ શો જિયો હોટસ્ટાર પર સ્ટ્રીમ થયો. આમાં, ભારતીય દંડ સંહિતાની કલમ ૧૯૬, ૨૯૯ અને ૩૫૩ અને અન્ય સંબંધિત કલમો હેઠળ FIR નોંધવાની વિનંતી કરવામાં આવી છે. અમિતાએ આગળ લખ્યું, મુનવર પર અશ્લીલતાને પ્રોત્સાહન આપવા, ઘણા ધર્મોનું અપમાન કરવા, સાંસ્કૃતિક મૂલ્યોનું ઉલ્લંઘન કરવાનો અને યુવા પેઢીની સાથે સમાજને પ્રદૂષિત કરવાનો આરોપ છે.

તેમણે આગળ લખ્યું, “ફરિયાદ ઇમેઇલ દ્વારા મોકલવામાં આવી છે, જેની હાર્ડ કોપી સોમવારે સ્પીડ-પોસ્ટ કરવામાં આવશે. જો કોઈ કાર્યવાહી નહીં થાય, તો હું ન્યાય સુનિશ્ચિત કરવા માટે કોર્ટનો સંપર્ક કરીશ.

તમને જણાવી દઈએ કે, આ પહેલી વાર નથી જ્યારે મુનવર વિવાદનો સામનો કરી રહ્યો હોય. ગયા વર્ષની શરૂઆતમાં, એક કોમેડી શો દરમિયાન, મુનાવર ફારુકીએ કોંકણી સમુદાય પર વાંધાજનક ટિપ્પણી કરી હતી, જેના કારણે દેશભરમાં આક્રોશ ફેલાયો હતો. વિવાદ વધતો જોઈને, કોમેડિયનએ સોશિયલ મીડિયા પર એક વીડિયો જાહેર કર્યો અને લોકોની માફી માંગી.

મુનવરે વર્ષ ૨૦૨૨ માં કંગના રનૌતના શો લોકઅપ માં ભાગ લીધો હતો અને તે પહેલી સીઝનનો વિજેતા પણ હતો. આ પછી, મુનવર સલમાન ખાનના શો બિગ બોસ ૧૭ માં પહોંચ્યો અને વિજેતા બન્યો.