Western Times News

Latest News from Gujarat

કારમાં દારૂની હેરાફેરી કરતો પોલીસ કોન્સ્ટેબલ ઝડપાયો

પ્રતિકાત્મક

પાલનપુર, સાબરકાંઠાના હિંમતનગરમાં એ ડિવિઝન પોલીસ સ્ટેશનમાં તહેનાત લોક રક્ષક દળ કોન્સ્ટેબલની રવિવારે રાતે અરવલ્લી જિલ્લાની ભિલોડા પોલીસે બૂટલેગિંગના આરોપમાં ધરપકડ કરી હતી. પોલીસે એલઆરડી કોન્સ્ટેબલ અતુલ પટેલની ધરપકડ કરી હતી જ્યારે તેનો સાથી, લિસ્ટેડ બુટલેગર મયુર ડામોર તેના મલ્ટી-યુટિલિટી વ્હીકલને મૂકીને નાસી છૂટવામાં સફળ રહ્યો હતો.

ભિલોડા પોલીસના જણાવ્યા પ્રમાણે, અતુલ પટેલ તેના સાથી મયુર ડામોર સાથે મળીને બુટલેગિંગનો ધંધો કરતો હતો. ‘તેઓ જ્યારે એમયુવીમાં દારૂની હેરાફેરી કરી રહ્યા હતા ત્યારે તેની ધરપકડ કરવામાં આવી હતી. બુટલેગર સાથે પોલીસ કોન્સ્ટેબલને જાેવો તે એક આશ્ચર્યજનક હતું’, તેમ ભિલોડા પોલીસ ઈન્સપેક્ટર મનિષ વસાવાએ જણાવ્યું હતું.

મળેલી બાતમીના આધારે કાર્યવાહી કરતા પોલીસે ધનસુર ગામ નજીક રોડ કોર્ડન કરી લીધો હતો અને પસાર થતાં દરેક વાહનોની તપાસ કરવામાં આવી રહી છે. આ સમયે અતુલ પટેલ અને મયુર ડામોર એમયુવીમાં આવ્યા હતા. તપાસ કરતા પોલીસને ૪૬ હજાર રૂપિયાની કિંમતનો ભારતીય બનાવટનો વિદેશી દારૂ મળી આવ્યો હતો.

પોલીસે અતુલ પટેલને ઝડપી પાડ્યો હતો જ્યારે મયુર ડામોર કે જે કાર ચલાવી રહ્યો હતો તે ભાગી જવામાં સફળ રહ્યો હતો. અતુલ પટેલ, મયુર ડામોર અને સાબરકાંઠાના વિજયનગર તાલુકાના અન્ય એક બુટલેગર જુલો કતારિયા સામે પ્રોહિબિશન એક્ટ હેઠળ કેસ નોંધવામાં આવ્યો હતો.SSS

Copyright © All rights reserved. | Developed by Aneri Developers