Western Times News

Latest News from Gujarat

યુવકને હિનાની મોહજાળમાં ફસાવી રૂપિયા ખંખેર્યા

ગાંધીનગર, અમદાવાદના વેપારી મહેન્દ્રસિંહ સિસોદિયાને મળવા માટે વાવોલના સ્વર્ણિમ પેરેડાઈઝ ખાતે બોલાવીને હિના રાવ અને અરવિંદસિંહે તેને ચાર દિવસ સુધી ગોંધી રાખ્યો હતો. આ કેસમાં આરોપી હિના રાણાવત પોતાની ઘરે હોવાની વિગતો મળતા પોલીસે તેને ઝડપી લીધી હતી.

ઉપરાંત પોલીસ તરીકે ઓળખ આપનાર મુખ્ય સૂત્રધાર અરવિંદસિંહ રાવ અને તેના સાગરીતને પણ શનિવારે ઝડપી લેવાયા હતા. જેમાં પૂછપરછ દરમિયાન ચોંકાવનારા ખુલાસા થયા છે. પ્રાપ્ત માહિતી અનુસાર રિમાન્ડ દરમિયાન પોલીસને જાણવા મળ્યું કે, અમદાવાદના વેપારીને ચાર દિવસ સુધી ગોંધી રાખીને પાંચ લાખની ખંડણી ઉઘરાવવાનું કાવતરું રચનાર મુખ્ય સૂત્રધાર અરવિંદસિંહે હિનાને પ્રેમજાળમાં ફસાવવા માટે બનાવટી ઓળખ ઉભી કરી હતી.

સોશિયલ મીડિયા પર ખુશ્બુ નામની યુવતીનું ફેક આઈડી બનાવીને તેણે હિનાને પ્રેમજાળમાં ફસાવી હતી અને બાદમાં ઉદેપુરના યુવકને બોલાવી બળાત્કારના કેસમાં ફસાવીને ખંડણી ઉઘરાવી હતી. પોલીસ પાસેથી પ્રાપ્ત માહિતી અનુસાર ધોરણ-૫ પાસ હિનાનો પતિ કુવૈત નોકરી કરતો હતો.

દરમિયાન ફેસબૂક પર ખુશ્બુ નામની યુવતીની ફ્રેન્ડ રિકવેસ્ટ આવી હતી. જેમાં યૂટ્યૂબ પર વિડીયો મૂકીને રૂપિયા કમાવાની લાલચ આપીને અરવિંદસિંહનો સંપર્ક કરવા માટે જણાવ્યું હતું. પતિ કુવૈત રહેતો હોવાથી હિના ઘરેથી નોકરી પર જવાનું કહીને ગાંધીનગર આવતી અને અરવિંદસિંહ સાથે સંબંધ બાંધ્યા હતા.

જેથી તેને ૩ મહિનાનો ગર્ભ પણ હોવાનું બહાર આવ્યું છે. એકવાર સફળતા મળ્યા પછી અરવિંદસિંહે હિના મારફતે અમદાવાદના મહેન્દ્રસિંહને પણ મોહજાળમાં ફસાવી સમગ્ર કાવતરાને અંજામ આપ્યો હતો. જાે કે મહેન્દ્રસિંહે હિંમત કરીને પોલીસ ફરિયાદ કરતા સમગ્ર પ્રકરણ બહાર આવ્યું છે. ત્યારે પોલીસને અરવિંદસિંહ પાસેથી આસિસ્ટન્ટ સબ ઇન્સ્પેકટરનો ડ્રેસ તેમજ ચાઈનીઝ રિવોલ્વર ટાઈપનું લાઈટર પણ મળી આવ્યું છે. હાલ સમગ્ર મામલે વધુ તપાસ ચાલી રહી છે.SSS

Copyright © All rights reserved. | Developed by Aneri Developers