લાયસન્સ માટે આરટીઓમાં ડ્રાઈવિંગ ટેસ્ટ નહીં આપવો પડે
નવી દિલ્હી, ડ્રાઈવરો માટે મહત્ત્વપૂર્ણ સમાચાર મળી રહ્યા છે. ડ્રાઇવિંગ લાયસન્સ મેળવવા માટે તમારે હવે પ્રાદેશિક પરિવહન કાર્યાલય (આરટીઓ)ના ચક્કર લગાવવાના, લાંબી લાઈનોમાં ઊભા રહેવાની જરૂર નથી. કેન્દ્ર સરકારે ડ્રાઇવિંગ લાયસન્સ બનાવવાના નિયમો ખૂબ જ સરળ બનાવ્યા છે.
ડ્રાઈવિંગ લાયસન્સ માટેના નિયમોમાં કરાયેલા સુધારા મુજબ હવે તમારે આરટીઓ જઈને કોઈપણ પ્રકારનો ડ્રાઈવિંગ ટેસ્ટ આપવાની જરૂર રહેશે નહીં. કેન્દ્રીય માર્ગ પરિવહન અને હાઈવે મંત્રાલયે આ નિયમો નોટિફાઈ કરી દીધા છે, આ નિયમો લાગૂ પણ થઈ ચૂક્યા છે. જેનાથી ડ્રાઇવિંગ લાયસન્સ માટે આરટીઓ ના વેઇટિંગ લિસ્ટમાં પડ્યા છે, તેમને મોટી રાહત થશે.
મંત્રાલય દ્વારા આપવામાં આવેલી માહિતી અનુસાર, હવે તમારે ડ્રાઇવિંગ લાઇસન્સ મેળવવા માટે આરટીઓમાં ટેસ્ટની રાહ જાેવી પડશે નહીં. તમે કોઈપણ માન્યતા પ્રાપ્ત ડ્રાઇવિંગ ટ્રેનિંગ સ્કૂલમાં ડ્રાઇવિંગ લાયસન્સ માટે પોતાને રજીસ્ટર કરાવી શકો છો. તેઓએ ડ્રાઇવિંગ ટ્રેનિંગ સ્કૂલમાંથી ટ્રેનિંગ લેવાની રહેશે અને ત્યાં ટેસ્ટ પાસ કરવાની રહેશે, સ્કૂલ દ્વારા અરજદારોને પ્રમાણપત્ર આપવામાં આવશે. આ પ્રમાણપત્રના આધારે, અરજદારનું ડ્રાઇવિંગ લાઇસન્સ જાહેર કરવામાં આવશે.
પ્રશિક્ષણ કેન્દ્રો અંગે માર્ગ અને પરિવહન મંત્રાલય તરફથી કેટલીક માર્ગદર્શિકા અને શરતો છે. જેમાં પ્રશિક્ષણ કેન્દ્રોના વિસ્તારથી લઈને ટ્રેનરના શિક્ષણનો સમાવેશ થાય છે.
અધિકૃત એજન્સી તે સુનિશ્ચિત કરશે કે ટુ વ્હીલર, થ્રી વ્હીલર અને લાઇટ મોટર વાહનો માટેના તાલીમ કેન્દ્રો પાસે ઓછામાં ઓછી એક એકર જમીન હોય, મધ્યમ અને ભારે પેસેન્જર માલસામાન વાહનો અથવા ટ્રેઇલર્સ માટેના કેન્દ્રો માટે બે એકર જમીનની જરૂર પડશે.
ટ્રેનર ઓછામાં ઓછો ૧૨મું ધોરણ પાસ હોવો જાેઈએ અને ઓછામાં ઓછો પાંચ વર્ષનો ડ્રાઇવિંગ અનુભવ ધરાવતો હોવો જાેઈએ, ટ્રાફિક નિયમોમાં સારી રીતે વાકેફ હોવો જાેઈએ.
મંત્રાલયે એક શિક્ષણ અભ્યાસક્રમ પણ નિર્ધારિત કર્યો છે. હળવા મોટર વાહનો ચલાવવા માટે, કોર્સનો સમયગાળો મહત્તમ ૪ અઠવાડિયાનો હશે જે ૨૯ કલાક સુધી ચાલશે. આ ડ્રાઇવિંગ સેન્ટરોના અભ્યાસક્રમને ૨ ભાગોમાં વહેંચવામાં આવશે. થિયરી અને પ્રેક્ટિકલ.
લોકોએ પાયાના રસ્તાઓ, ગ્રામીણ રસ્તાઓ, હાઇવે, શહેરના રસ્તાઓ, રિવર્સિંગ અને પાર્કિંગ, ચઢાવ-ઉતાર વગેરે પર ડ્રાઇવિંગ શીખવામાં ૨૧ કલાક પસાર કરવા પડે છે. થિયરી પાર્ટ સમગ્ર કોર્સના ૮ કલાકને આવરી લેશે, તેમાં રોડ શિષ્ટાચાર, રોડ રેજ, ટ્રાફિક એજ્યુકેશન, અકસ્માતોના કારણોને સમજવા, પ્રાથમિક સારવાર અને ડ્રાઇવિંગ ઇંધણ કાર્યક્ષમતાનો સમાવેશ થશે.SSS
