નજીવી બાબતના મનદુઃખથી મિત્રને અડધી રાત્રે બોલાવી હત્યા કરી
પંચમહાલ, બે મિત્રો વચ્ચે સામાન્ય રૂપિયાની બાબતે ખૂની ખેલ ખેલાતા મિત્રએ જ મિત્રનું અડધી રાતે ઢીમ ઢાળી દીધું. ખિસ્સામાંથી પૈસા કાઢી લેવા જેવી સામાન્ય બાબતે મિત્રએ મિત્રની હત્યા કરી છે.
પંચહાલનું હાલોલ ઈન્ડસ્ટ્રીયલ હબ ગણાય છે. હજારો લાખો પરપ્રાંતિયો રોજગારી મેળવવા માટે હાલોલમાં સ્થાયી થયા છે. ત્યારે અહીં વસેલા પરપ્રાંતિય ઈસમોમાં ક્યારેક ધીંગાણું સર્જાતા ખૂની ખેલ ખેલાવાના બનાવો પણ સામે આવતા હોય છે. હાલોલ GIDCમાં રહેતા બે પરપ્રાંતિય મિત્રો વચ્ચે પણ ગત મોડી રાત્રે આવો જ ખૂની ખેલ ખેલાયો હતો. જેમાં એક મિત્રએ પૈસા કાઢી લેવા જેવી સામાન્ય બાબતમાં બીજા મિત્રની ઘાતકી હત્યા કરી નાંખી.
પ્રાપ્ત માહિતી અનુસાર, મૂળ બિહારના વતની રાજદેવ પ્રસાદ અને ભોલા મહંતો હાલોલ GIDCની એક ખાનગી કંપનીમાં કામ કરે છે. બંને યુવકો હાલોલમાં આવેલ પનોરમાં ચોકડી નજીક સાથરોટા રોડ પાસે એક ભાડાના મકાનમાં રહેતા હતા.
જેમાં ગત રોત ભોલાએ રાજદેવ પ્રસાદના ગજવામાંથી ૪૫૦૦ રૂપિયા કાઢી લીધા હતા. જેથી રાજદેવ પ્રસાદે ભોલાને પોતાના રૂપિયા પાછા આપવા ટકોર કરી હતી. આ બાબતને લઈ બંને મિત્રો વચ્ચે બોલાચાલી થઇ હતી. બોલાચાલી વધુ ઉગ્ર બનતા ઉશ્કેરાયેલા ભોલાએ રાજદેવ પ્રસાદના માથાના ભાગે ઉપરાછાપરી લોખંડના સળીયાના ઘા ઝીંકી દીધા હતા.
માથાના ભાગે ગંભીર ઇજાઓ થતાં રાજદેવ પ્રસાદનું ઘટના સ્થળે જ કમકમાટી ભર્યુ મોત નિપજ્યું હતું. આમ, નજીવી બાબતમાં પોતાના સાથી મિત્રની હત્યા કરી આરોપી ઘટના સ્થળેથી ફરાર થઈ ગયો હતો.
સમગ્ર મામલાની જાણ હાલોલ પોલીસ મથકે કરવામાં આવતા હાલોલ પોલીસ ઘટના સ્થળે પહોંચી હતી અને યુવકની લાશ હાલોલ રેફરલ હોસ્પિટલના પીએમ રૂમ ખાતે ખસેડવામા આવી હતી. ત્યારબાદ હાલોલ પોલીસે ભોલા મહંતો સામે હત્યાનો ગુનો નોંધી ફરાર હત્યારાને ઝડપી પાડવાના ચક્રો ગતિમાન કર્યા હતા. જાેકે ગણતરીના કલાકોમાં હાલોલ પોલીસે ચોક્કસ બાતમીના આધારે આરોપી ભોલા મહંતોને ઝડપી પાડ્યો હતો.
