અમદાવાદમાં અતિભારે વરસાદની આગાહી
(એજન્સી)અમદાવાદ, સિઝનનો પહેલો અને સૌથી જાેરદાર વરસાદ થયા ઠેર-ઠેર પાણી ભરાઈ જવાની, ઘરોમાં અને દુકાનોમાં પાણી ઘૂસી જવાની તથા નુકસાન થવાની ઘટનાઓ બની છે. આવામાં ફરી એકવાર અમદાવાદમાં ગાજવીજ સાથે તોફાની વરસાદ થવાના એંધાણ ઉભા થયા છે.
તારીખ ૧૯મીએ એટલે કે નવા અઠવાડિયાના બીજા જ દિવસે સવારથી અમદાવાદમાં તથા આસપાસના ભાગોમાં વરસાદી માહોલ બનીને બપોરથી સાંજ સુધીમાં સાંબેલાધાર વરસાદ થવાની સંભાવના છે. આવામાં નીચાણવાળા વિસ્તારમાં દુકાન ધરાવતા વેપારી અને રહેવાસીઓને ભારે હાલાકીનો સામનો કરવાનો વારો આવ્યો હતો.
ખાનગી હવામાન અપડેટ્સ આપતી વેબસાઈટ વિન્ડી મુજબ ૧૮મીની મધ્યરાત્રીથી વરસાદમાં વરસાદી માહોલ શરુ થયા બાદ જેમ-જેમ દિવસની શરુઆત થશે તેમ-તેમ વરસાદનું જાેર વધવાની સંભાવના છે. જેમાં સવારના ૧૧ વાગ્યાથી શહેરના પશ્ચિમ ભાગમાં ભારે વરસાદ શરુ થયા બાદ સમગ્ર શહેરમાં તોફાની વરસાદ થવાની શરુઆત થઈ જશે.
અમદાવાદ સહિત ગાંધીનગર, હિંમતનગર, માણસા, કડી, મહેસાણા, મોઢેરા, વિરમગામ, વડોદરા, આણંદ, ડાકોર, ગોધરા સહિતના મધ્ય ગુજરાતના ભાગોમાં વરસાદ તૂટી પડવાની સંભાવના છે. આ સાથે ઉત્તર ગુજરાતના મહેસાણા, પાલનપુર, સિદ્ધપુર, પાટણ, ચાણસમા, હારીજ, મોઢેરા સહિતના ભાગોમાં ભારેથી અતિભારે વરસાદ થવાની સંભાવના છે.
હવામાન વિભાગ દ્વારા રાજ્યમાં આગામી દિવસોમાં ભારે વરસાદ અંગે ચેતવણી આપવામાં આવી નથી પરંતુ નવા અઠવાડિયાના શરુઆતના દિવસોમાં અમદાવાદ અને ગાંધીનગર સહિત આણંદ, અરવલ્લી, દાહોદ, મહિસાગર, પંચમહાલ, અમરેલી, ભાવનગર, બોટાદ દેવભૂમિ દ્વારકા, ગીર-સોમનાથ, જૂનાગઢ, રાજકોટ, સુરેન્દ્રનગરમાં હળવાથી ભારે વરસાદ થવાની આગાહી છે.
પાછલા અઠવાડિયે રાજ્યના દક્ષિણ ગુજરાત સહિત સૌરાષ્ટ્રના ભાગોમાં ભારે વરસાદ તૂટી પડવાના કારણે નદી-નાળા છલકાયા છે.
વલસાડ, છોટા ઉદેપુર નવસારી, પોરબંદર, ગીર સોમનાથ સહિતના જિલ્લાઓમાં ભારેથી અતિભારે વરસાદ થતા લોકોના જનજીવન પર તેની માઠી અસર પડી છે. આગામી દિવસોમાં વરસાદના લીધે થયેલા નુકસાનનું આકલન કરી રાજ્ય સરકાર દ્વારા મોટી આગાહી કરવામાં આવી શકે છે. મુખ્યમંત્રી ભૂપેન્દ્ર પટેલ દ્વારા વરસાદના કારણે સર્જાયેલી તારાજીનું હવાઈ નિરીક્ષણ કર્યું હતું.
