પાનના ગલ્લે સ્કૂટર પાર્ક કરવાની સામાન્ય બાબતમાં તકરાર થઈ
પ્રતિકાત્મક
(પ્રતિનિધિ) અમદાવાદ, શહેરમાં દિવસેને દિવસે ગુનાખોરીનું પ્રમાણ વધી રહ્યું છે. સામાન્ય બાબતોમાં હુમલો કરવો અને તિક્ષ્ણ હથિયારના ઘા ઝીંકી દેવાની અનેક ઘટનાઓ સામે આવી ચૂકી છે. ત્યારે સ્કૂટર પાર્ક કરવાની સામાન્ય બાબતમાં એક યુવકને બે શખસોએ છરી મારી દીધી હતી.
પાનના ગલ્લાની બહાર ૨૮ વર્ષીય કુમાર પરમારને સ્કૂટર પાર્ક કરવાની નજીવી બાબતમાં ચિરાગ મકવાણા અને મેહુલ ચૌહાણ નામના શખસે છરી મારી દીધી હતી. ત્યારે આ મામલે સ્થાનિક પોલીસે ગુનો નોંધીને આગળની કાર્યવાહી હાથ ધરી છે.
શાહીબાગ વિસ્તારમાં રહેતા કુમાર પરમારે નોંધાવેલી ફરિયાદમાં એવા આક્ષેપો કર્યા છે કે, શુક્રવારની રાત્રે તે પ્રિતમપુરા સ્કૂલ વિસ્તારમાં ગરબા જાેવા માટે ગયા હતા. આ સમયે તેઓ એક પાનના ગલ્લા પાસે ઊભા રહ્યા હતા અને પોતાનું સ્કૂટર પાન પાર્લર બહાર ઉભુ રાખ્યું હતું. ત્યારે ચિરાગ મકાવાણા અને મેહુલ ચૌહણ તેની પાસે આવ્યા હતા અને કહ્યું હતું કે, સ્કૂટર કેમ અહીં પાર્ક કર્યું છે.
આ દરમિયાન બંને શખસોએ તેમની સાથે માથાકૂટ કરી હતી અને અપશબ્દો કહ્યા હતા. બાદમાં ચિરાગ મકવાણાએ તેને છરી મારી દીધી હતી. આ દરમિયાન કુમાર પરમારે મદદ માટે બૂમો પાડતા આસપાસના લોકો એકત્ર થઈ ગયા હતા. લોકોનું ટોળુ એકત્ર થઈ જતા બંને શખસો ત્યાંથી ભાગી ગયા હતા.
જતા જતા બંને શખસોએ કુમાર પરમારને ધમકી આપી હતી કે જાે તે તેમના વિસ્તારમાં દેખાશે તો જાનથી મારી નાખશે. જાે કે, આ હિંસક હુમલામાં કુમાર પરમારને ઈજા થતા સારવાર માટે સિવિલ હોસ્પિટલમાં ખસેડવામાં આવ્યા હતા. બનાવની જાણ થતા પોલીસ પણ ત્યાં પહોંચી હતી.
બાદમાં કુમાર પરમારે બંને શખસો વિરુદ્ધ ફરિયાદ નોંધાવી હતી. ત્યારે પોલીસે પણ આ મામલે ગુનો નોંધીને આગળની કાર્યવાહી હાથ ધરી હતી. મહત્વનું છે કે, હાલ નવરાત્રીનો તહેવાર ચાલી રહ્યો છે. ત્યારે કેટલાંક શખસો પોતાની સાથે આવા પ્રકારના હથિયારો લઈને ફરતા હોય છે.
