આ દેશમાંથી ગેરકાયદેસર રીતે અમેરિકામાં ઘૂસી રહ્યા છે લોકો
નિકારાગુઆમાં લેન્ડ થતી ડોંકી ફ્લાઈટ્સને અમેરિકા કેમ નથી અટકાવી શકતું
નિકારાગુઆ અમેરિકાનો સૌથી નજીક આવેલો એક એવો દેશ છે કે જ્યાં વિઝા વિના પહોંચવું પ્રમાણમાં ઘણું સરળ છે, અને એટલે જ આ દેશ હાલ ડોંકી ફ્લાઈટ્સનું એપિસેન્ટર બની રહ્યો છે.
નવી દિલ્હી, દર વર્ષે અમેરિકામાં ઘૂસતા લાખો ગેરકાયદેસર ઈમિગ્રન્ટ્સ મોટાભાગે લેટિન અમેરિકાના દેશોમાં થઈને બોર્ડર સુધી પહોંચતા હોય છે. સેન્ટ્રલ કે સાઉથ અમેરિકાના દેશોમાંથી આવતો માઈગ્રન્ટ્સનો આ પ્રવાહ અટકે તે માટે યુનાઈટેડ સ્ટેટ્સ અનેક પ્રયાસ કરી રહ્યું છે, પરંતુ નિકારાગુઆ જેવા દેશ અમેરિકા માટે ખરા અર્થમાં માથાનો દુઃખાવો બની રહ્યા છે.
અમેરિકામાં ઈલીગલી ઘૂસવા મોટાભાગના લોકોએ ગમે તેમ કરીને મેક્સિકો સુધી પહોંચવું પડે છે, જોકે ડાયરેક્ટ મેક્સિકોમાં લેન્ડ થવું અઘરૂં છે, કારણકે જે દેશોના લોકો અમેરિકામાં ઘૂસણખોરી કરે છે તેમાંના અનેક દેશોને મેક્સિકો વિઝા ઓન અરાઈવલ નથી આપતું, તો બીજી તરફ નિકારાગુઆ એવો દેશ છે કે જ્યાં લેન્ડ થવું કોઈપણ દેશના ઈમિગ્રન્ટ માટે ખૂબ જ આસાન છે.
બીજા શબ્દોમાં કહીએ તો, નિકારાગુઆ અમેરિકાનો સૌથી નજીક આવેલો એક એવો દેશ છે કે જ્યાં વિઝા વિના પહોંચવું પ્રમાણમાં ઘણું સરળ છે, અને એટલે જ આ દેશ હાલ ડોંકી ફ્લાઈટ્સનું એપિસેન્ટર બની રહ્યો છે.
ધ ગાર્ડિયનના એક રિપોર્ટ અનુસાર, અમેરિકાના પ્રેશરમાં આવીને તેની આસપાસના ઘણા દેશોએ અમુક દેશના લોકો માટે વિઝાના નિયમો સખ્ત બનાવી દીધા છે. જોકે, નિકારાગુઆના પ્રેસિડેન્ટ ડેનિયલ ઓર્ટેગા અમેરિકાની હામાં હા કરવા તૈયાર નથી, અને તેમણે પોતાના દેશની વિઝા પોલિસીમાં કોઈ ફેરફાર ના કરીને અમેરિકાની મુશ્કેલી વધારી દીધી છે. તેની પાછળનું કારણ એ છે કે અમેરિકાએ નિકારાગુઆના કેટલાક અધિકારીઓ અને કંપની પર પ્રતિબંધ મૂક્યા છે અને તેમાંના ઘણા નિકારાગુઆના હાલના પ્રેસિડેન્ટના કરીબી છે.
અમેરિકાએ મૂકેલા પ્રતિબંધોનો જાણે બદલો લેતું હોય તેમ નિકારાગુઆ ડોંકી ફ્લાઈટ્સને પોતાની ધરતી પર ઉતરવા દઈ હજારો-લાખો ઈમિગ્રન્ટ્સને અમેરિકા તરફ મોકલી રહ્યું છે. લેટિન અમેરિકન દેશોની બાબતોને લગતા યુએસની સરકારના એક વિભાગ સાથે સંકળાયેલા ડિરેક્ટર એના મારિયા મેન્ડેઝનું કહેવું છે કે નિકારાગુઆ ચાલાકીપૂર્વક અમેરિકા માટે પરેશાની ઉભી કરી રહ્યું છે.
નિકારાગુઆની વિઝા પોલિસી માટે તેમનું એવું પણ કહેવું છે કે આ બાબત અમેરિકાના ઘા પર આલ્કોહોલ રેડવા જેવી છે. અમેરિકા પોતે પણ જાણે છે કે દુનિયાભરમાંથી ઈલીગલ ઈમિગ્રન્ટ્સને લઈને આવતી કેટલીય ચાર્ટર્ડ ફ્લાઈટ્સ નિકારાગુઆમાં લેન્ડ છે, પરંતુ બધુંય જાણતું હોવા છતાંય નિકારાગુઆને અટકાવવામાં અમેરિકાના કોઈ પ્રયાસ સફળ નથી થઈ રહ્યા.
અમેરિકાએ ૨૧ નવેમ્બરના રોજ આવી ડોંકી ફ્લાઈટ્સને અટકાવવા માટે તેમના માલિક, એÂક્ઝક્યુટિવ્સ તેમજ સિનિયર ઓફિસર્સ માટેની વિઝા પોલિસીને પણ ખૂબ જ આકરી બનાવી દીધી હતી. અમેરિકાના આ પગલાં બાદ ઘણી ચાર્ટર કંપનીઓએ ડોંકી ફ્લાઈટ્સ માટે પોતાના એરક્રાફ્ટ ભાડે આપવાનું બંધ કરી દીધું હતું, પરંતુ હજુય કેટલીક કંપનીઓ આ ધંધામાં સંડોવાયેલી છે, જેમાં રોમાનિયા સ્થિત લિજેન્ડ એરલાઈન્સનો પણ સમાવેશ થાય છે.
લિજેન્ડ એરલાઈન્સે થોડા દિવસો પહેલા જ વર્ષો બાદ યુરોપથી નિકારાગુઆની ડાયરેક્ટ ફ્લાઈટ મોકલી હતી, અને તેની જ એક ફ્લાઈટ ફ્રાંસમાં પકડાઈ પણ હતી જેમાં ૩૦૩ ભારતીય પેસેન્જર્સ સવાર હતા.
ઈલીગલી અમેરિકા જવા માગતા કોઈ વ્યક્તિને જો સીધા નિકારાગુઆ જવાનો મેળ પડી જાય તો તેનો સૌથી મોટો ફાયદો એ વાતનો રહે છે કે તેને સૌથી ભયાનક જંગલ વિસ્તાર તરીકે ઓળખાતા ડેરિયન ગેપને ક્રોસ નથી કરવો પડતો.
ડેરિયન ગેપમાં દર વર્ષે લાખો લોકો અમેરિકા પહોંચવાની ગણતરી સાથે પસાર થાય છે, અને તેમાં સેંકડો લોકોના મોત પણ થાય છે. કોઈપણને પણ ઘૂંટણીયે પાડી દે તેવી ખતરનાક ભૌગોલિક સ્થિતિ ઉપરાંત ડેરિયન ગેપમાં જંગલી પ્રાણીઓ અને જીવજંતુઓનો પણ ડર રહે છે, આટલું ઓછું હોય તેમ આ જંગલોમાં પણ માફિયાની અનેક ગેંગ્સ એક્ટિવ છે, જે પૈસા માટે ગમે તેની હત્યા કરી શકે છે તેમજ ડેરિયન ગેપમાં માઈગ્રન્ટ્સને બંધક બનાવી તેમના અંગોનો વેપાર કરાતો હોવાની વાત પણ ઘણી વાર બહાર આવી ચૂકી છે.
નિકારાગુઆની હાલની વિઝા પોલિસીને કારણે ઈન્ડિયામાં ઓપરેટ કરતાં એજન્ટોને જાણે ફાવતું મળી ગયું હોય તેવી સ્થિતિ સર્જાઈ હતી. આ એજન્ટો પોતાના પેસેન્જર્સને પહેલા તો દુબઈ કે પછી જ્યાં ઈન્ડિયન્સને સરળતાથી વિઝા મળતા હોય તેવા દેશમાં પહોંચાડી દે છે, અને ત્યાંથી જ ચાર્ટર્ડ ફ્લાઈટ ઉપાડીને તેમને નિકારાગુઆ લઈ જવામાં આવે છે, જેનાથી ૧૫ દિવસ કે ક્યારેક તો બે-ચાર મહિનામાં પૂરો થતો પ્રવાસ ફક્ત એકાદ-બે દિવસમાં જ પૂરો થઈ જાય છે.
નિકારાગુઆમાં એજન્ટ્સના મજબૂત સેટિંગ્સ છે, અને ત્યાંથી પેસેન્જર્સને મેક્સિકો લઈ જતાં વધુમાં વધુ એક અઠવાડિયું લાગે છે. કોઈપણ પેસેન્જર મેક્સિકો પહોંચી જાય તે સાથે એજન્ટનું ૯૦ ટકા કામ પૂરૂં થઈ જાય છે. મેક્સિકોમાં પણ જોખમ ઘણા છે, પરંતુ ત્યાં પૈસા આપો એટલે બધું જ મેનેજ થઈ જતું હોય છે, અને એજન્ટો પણ પેસેન્જર્સને ૪૦૦-૫૦૦ ડોલર્સ આપીને ક્યાં કેટલો વહીવટ કરવાનો છે તેની બધીય માહિતી આપી દેતા હોય છે.SS1MS
