અમેરીકન કોન્સ્યુલેટ જનરલ ડેવીડ રેંઝએ સાંતલપુરના અગરીયા પરીવારોની મુલાકાત લીધી
પાટણ:અમેરીકન કોન્સ્યુલેટ જનરલ શ્રી ડેવીડ રેંઝએ સાંતલુપર તાલુકાના રાજુસર ગામ નજીક રણ વિસ્તારમાં વસવાટ કરતાં અગરીયા પરિવારની મુલાકાત લીધી હતી. સાથે સાથે મહિલા સશક્તિકરણના ક્ષેત્રમાં કાર્યરત એક સંસ્થાના મહિલા કાર્યકરના ઘરે રાત્રી રોકાણ કરી સાંસ્કૃતિક કાર્યક્રમ નિહાળ્યો હતો.
રાજુસરા ગામ નજીકના રણ વિસ્તારમાં અગરીયા પરિવારોની મુલાકાત દરમ્યાન કોન્સ્યુલેટ જનરલશ્રીએ અગરીયા પરિવારોને મળતી સુવિધાઓ તથા તેમની જીવનશૈલી વિશે માહિતી મેળવી હતી. તેમના રાજદ્વારી પત્નિ ટેલી લીંડ અને પુત્રી યાસ્મિન સાથે વિસ્તારના અગરીયા પરિવારના ઘરે જઈ તેમની રહેણી-કહેણી, પરંપરાઓ અને સંસ્કૃતિ વિશે જાણકારી મેળવી હતી. સાથે જ અગરીયા પરિવારના બાળકોને પ્રાથમિક શિક્ષણ મળી રહે તે માટે કાર્યરત સ્કુલ ઑન વ્હિલ્સ અને ત્યારબાદની શિક્ષણ વ્યવસ્થા તથા આરોગ્ય વિષયક સેવાઓ અંગે ચર્ચા કરી હતી.
સપરિવાર પધારેલા અમેરીકન કોન્સ્યુલેટ જનરલશ્રીએ મીઠાના અગરનું નિરીક્ષણ કરી મીઠાના ઉત્પાદન, તેને લગતા ખર્ચ તથા વેચાણ વ્યવસ્થા સહિતની જાણકારી મેળવી હતી. કપરી પરિસ્થિતીમાં જીવન વ્યતિત કરતા અગરીયા પરિવારોની જિંદાદિલીની પ્રશંસા કરી શક્ય તે મદદ કરવા તૈયારી દર્શાવી હતી.
સાંતલપુર તાલુકાના બકુત્રા ગામે રહેતા અને મહિલા સશક્તિકરણના ક્ષેત્રમાં કાર્યરત એક સંસ્થાના કાર્યકર ગૌરીબેનના ઘરે અમેરીકન કોન્સ્યુલેટ જનરલશ્રીએ સપરિવાર રાત્રીરોકાણ કર્યું હતું. ગામની ૨૫૦ જેટલી મહિલાઓને ભરતકામ સાથે જોડી વધારાની આવક મેળવતી કરનાર ગૌરીબેનના ઘરે ગુજરાતની સંસ્કૃતિની ઓળખ સમા ગરબા સહિતના સાંસ્કૃતિક કાર્યક્રમો નિહાળી, ભોજન પણ લીધું હતું.
