દિવ્યાંગજનોએ વ્હીલચેર સાથે રેલી કાઢી મતદાન કરવાનો મેસેજ આપ્યો
મહેસાણાઃ જિલ્લા પંચાયતથી સરદાર સ્ટેડિયમ સુધી દિવ્યાંગ વ્હીલચેર રેલીનું આયોજન
(માહિતી)મહેસાણા, લોકસભા સામાન્ય ચૂંટણી અન્વયે મહેસાણા જિલ્લામાં દિવ્યાંગ મતદારો સરળતાથી મતદાન કરી શકે માટે તમામ મતદાન મથક સ્થળોએ વ્હીલચેરની સુવિધા ઉપલબ્ધ કરાવવામાં આવી છે.ભારતીય ચૂંટણીપંચના “સમાવેશી ચૂંટણી” ના સૂત્રને સાર્થક કરતા મહેસાણા જિલ્લા ચૂંટણી તંત્ર દ્વારા અનોખી પહેલ કરી છે. મહેસાણા જિલ્લાના ૧૦૩૭ મતદાન મથક સ્થળો પર કાયમી ધોરણે વ્હીલચેરની વ્યવસ્થા કરી આગવી સિધ્ધી જિલ્લા કલેકટર એમ નાગરાજનના માર્ગદર્શનથી જિલ્લા ચૂંટણી તંત્રએ હાંસલ કરી છે.
મહેસાણા લોકસભા સામાન્ય ચૂંટણીઃ ૨૦૨૪ તેમજ ૨૬-વિજાપુર વિધાનસભા મત વિભાગની પેટા ચૂંટણી અંતર્ગત મહેસાણા જિલ્લામાં દિવ્યાંગ મતદારો વધુમાં વધુ મતદાન કરી શકે અને દિવ્યાંગજનોના પ્રયત્નોને અન્ય મતદારો સુધી પહોંચાડી મતદાનના દિવસે અચૂક મતદાન કરાવવાનાશ્ઈં૩૯; પ્રયાસને વધુ સુદ્રઢ બનાવવા માટે મહેસાણા શહેરમાં સુયુક્ત મુખ્ય નિર્વાચન અધિકારી પી.ડી પલસાણાની વિશેષ ઉસ્થિતિમાં જિલ્લા ચૂંટણી તંત્ર દ્વારા દિવ્યાંગજન વ્હીલચેર રેલીનું આયોજન કરવામાં આવ્યું હતું.
આ રેલી જિલ્લા પંચાયત મહેસાણાથી સરદાર પટેલ સ્ટેડીયમ સુધી યોજાઇ હતી જેમાં મતદાન જાગૃતિના વિશેષ પ્રયાસો કરવામાં આવ્યા હતા મહેસાણા જિલ્લામાં આ અનોખા સેવાયજ્ઞમાં સહકાર આપનાર દાતાઓનું સન્માન કરવામાં આવ્યું હતું.મહેસાણા જિલ્લામાં ૧૦૩૭ મતદાન મથકોના સ્થળો પર વ્હીલચેર શિક્ષણ વિભાગને હસ્તાંતરિત કરવામાં આવી હતી.
અત્રે ઉલ્લેખનીય છે કે નોડલ એન.જી.ઓ. ખોડીયાર એજ્યુકેશન ટ્રસ્ટના સહયોગથી જિલ્લાના તમામ મતદાન મથકોએ દિવ્યાંગજનો માટે વ્હીલચેરની વ્યવસ્થા કરવામાં આવી છે. આ કાર્યક્રમ દરમિયાન દિવ્યાંગજનોએ વ્હીલચેર સાથેનો સક્ષમ લોગો બનાવીને અચૂક મતદાન કરીએનો મેસેજ આપ્યો હતો. દિવ્યાંગ મતદારો સુગમતાથી મતાધિકારનો ઉપયોગ કરી શકે, એ માટે જિલ્લા ચૂંટણી તંત્ર કટિબદ્ધ બન્યુ છે.
મહેસાણા જિલ્લાના ૭ વિધાનસભા મતવિસ્તારોમાં દિવ્યાંગ મતદારોની વાત કરીએ તો ખેરાલુ વિધાનસભા મતવિસ્તારમાં ૧૭૩૪, ઊંઝા વિધાનસભા મતવિસ્તારમાં ૯૨૨, વિસનગર વિધાનસભા મત વિસ્તારમાં ૧૪૨૧, બેચરાજી વિધાનસભા મતવિસ્તારમાં ૬૫૯, કડી વિધાનસભા મતવિસ્તારમાં ૯૨૦, મહેસાણા વિધાનસભા મત વિસ્તારમાં ૨૨૯૫ અને વિજાપુર વિધાનસભા મતવિસ્તારમાં ૯૮૯ દિવ્યાંગ મતદારો નોંધાયેલા છે.
