TDPના ચંદ્રબાબુ નાયડુએ મોદી સાથે બેઠકમાં હાજરી આપી પણ 6 મોટા મંત્રાલયો માંગ્યા
File Photo
(એજન્સી)નવી દિલ્હી, લોકસભા ચૂંટણીના પરિણામોમાં, ટીડીપી અને જેડીયુ બંને પક્ષો કિંગમેકર તરીકે ઉભરી આવ્યા છે. આવી સ્થિતિમાં તેમના તરફથી મુખ્ય મંત્રાલયો પર દાવા કરવામાં આવી રહ્યા છે. લોકસભા ચૂંટણીના પરિણામો પછી, એનડીએમાં ચંદ્રબાબુ નાયડુની ટીડીપી અને નીતીશ કુમારની જેડીયુ નું મહત્વ ઘણું વધી ગયું છે.
આ જ કારણ છે કે હવે બંને પક્ષો તરફથી મુખ્ય મંત્રાલયોની માંગણી કરવામાં આવી રહી છે. ટીડીપીના સૂત્રોએ જણાવ્યું છે કે પાર્ટીએ એનડીએ સમક્ષ છ મોટા મંત્રાલયોની માંગણી કરી છે. ટીડીપી પણ લોકસભા અધ્યક્ષ પદ ઈચ્છે છે. પાર્ટીના સૂત્રોએ કહ્યું છે કે દરેક બાબત પર ટીડીપીનું વલણ લવચીક છે. ટીડીપીના વડા ચંદ્રબાબુ નાયડુ બુધવારે (૫ જૂન) દિલ્હીમાં એનડીએની બેઠકમાં સામેલ થયા હતા.
આ દરમિયાન વડાપ્રધાન નરેન્દ્ર મોદીની બાજુમાં બેઠેલા તેમની તસવીરો પણ સામે આવી હતી. નીતિશ કુમાર પણ નાયડુની બાજુમાં બેઠા હતા. ટીડીપી હાલમાં એનડીએમાં બીજી સૌથી મોટી પાર્ટી છે. તેણે ૧૬ બેઠકો જીતી છે. આ પછી ત્રીજા નંબરે જેડીયુ આવે છે, જેના ૧૨ સાંસદો છે. એનડીએની સૌથી મોટી પાર્ટી ભાજપ છે, જેણે ૨૪૦ સીટો જીતી છે.
મળતા અહેવાલ મુજબ, પાર્ટીના ટોચના સૂત્રોએ જણાવ્યું કે નાયડુએ સ્પષ્ટ કર્યું છે કે તેઓ મોદી ૩.૦ સરકારમાં મહત્વપૂર્ણ ભૂમિકા ભજવવા માંગે છે. એવું કહેવામાં આવ્યું છે કે તેમણે ભાજપ નેતૃત્વને તેમની માંગણીઓની યાદી આપી છે. જેમાં લોકસભા અધ્યક્ષનું પદ અને ઓછામાં ઓછા પાંચ વિભાગોનો સમાવેશ થાય છે, જેની તેમણે માંગણી કરી છે. ટીડીપીએ નાણા મંત્રાલય, જલ શક્તિ મંત્રાલય જેવા વિભાગોને પણ પોતાના ભાગ તરીકે લેવાની માંગ કરી છે.
