પત્રકારત્વના સાંપ્રત પ્રવાહો અને માહિતી ખાતા સાથે સુદ્રઢ સંકલન બાબતે ચર્ચા કરવા બેઠક યોજાઈ
અમદાવાદના લઘુ દૈનિક અખબારોના તંત્રીશ્રીઓ, બ્યુરો ચીફ અને ચીફ રિપોર્ટર્સ સાથે માહિતી કચેરીના અધિકારીશ્રીઓ-કર્મચારીઓની સૌજન્ય બેઠક
સરકારની કામગીરી અને યોજનાઓની અમલવારીના મહત્તમ પ્રચાર-પ્રસાર અર્થે અમદાવાદ પ્રાદેશિક માહિતી કચેરી દ્વારા હરહંમેશ નવીનતમ અને અસરકારક પ્રયાસો કરવામાં આવતા હોય છે.
આ શૃંખલાના ભાગરૂપે સરકારી પોલીટેક્નિક કેમ્પસ, આંબાવાડી ખાતે અમદાવાદના લઘુ દૈનિક અખબારોના તંત્રીશ્રીઓ, બ્યુરો ચીફ અને ચીફ રિપોર્ટર્સ સાથે માહિતી કચેરીના અધિકારીશ્રીઓ-કર્મચારીઓની સૌજન્ય મુલાકાત યોજાઇ હતી.
જેમાં વિવિધ અખબારો અને તેમની કામગીરી તથા પત્રકારત્વના સાંપ્રત પ્રવાહો અને માહિતી ખાતા સાથે સુદ્રઢ સંકલન બાબતે ચર્ચા કરાઈ હતી. આ ઉપરાંત માહિતી ખાતા દ્વારા આપવામાં આવતી વિગતો, ફોટોગ્રાફ અને વિડીયો ફૂટેજ સહિતના વિવિધ મુદ્દે સકારાત્મક ચર્ચા કરવામાં આવી હતી.
સાથોસાથ પત્રકારોને જરૂરી સહકાર બાબતે પણ મુક્તમને ચર્ચા-વિચારણા કરવામાં આવી હતી. આમ, પ્રાદેશિક માહિતી કચેરીની આ રચનાત્મક પહેલને દૈનિક અખબારોના તંત્રીશ્રીઓ, બ્યુરો ચીફ અને ચીફ રિપોર્ટર્સ સહિતના ઉપસ્થિત સહુએ વખાણી હતી.
