૨૦૧૩માં ક્રિતિકાએ ધર્માની ફિલ્મથી ડેબ્યુની તક ગુમાવી
મુંબઈ, ક્રિતિકા કામરા હાલ તેની ધર્મા પ્રોડક્શનની ફિલ્મ ‘ગ્યારાહ-ગ્યારાહ’ની રિલીઝની તૈયારી કરી રહી છે. આ તેની કરણ જોહરના પ્રોડક્શન હાઉસ સાથે પહેલી ફિલ્મ છે, પરંતુ ઘણા લોકો જાણતા નથી કે કૃતિકાની પહેલી બોલિવૂડ ફિલ્મ પણ ધર્મા પ્રોડક્શનની જ હતી.
૨૦૧૩માં આ ફિલ્મની જાહેરાત થઈ હતી પરંતુ તે ફિલ્મનું શૂટિંગ શરૂ થાય એ પહેલાં જ ફિલ્મ અટકી ગઈ હતી. તાજેતરનાં એક ઇન્ટરવ્યૂમાં ક્રિતિકાએ આ અંગે ખુલાસો કર્યાે છે. તે ફિલ્મ મીરા નાયરની ‘વેનિટી ફેર’ની હિન્દી રીમેક હતી, જે કરણ જોહર અને એકતા કપૂર સાથે મળીને પ્રોડ્યુસ કરવાના હતા.
આ ફિલ્મ અક્ષય રોય ડિરેક્ટ કરવાના હતા અને આ ફિલ્મ ક્રિતિકા અને ઇમરાન હાશ્મીની પહેલી ફિલ્મ બની ગઈ હોત. તેમાં ક્રિતિકાનો સેકન્ડ લીડ રોલ હતો. ક્રિતિકાએ ૨૦૧૮માં ‘ધ મિત્રો’ સાથે ફિલ્મોમાં ડેબ્યુ કર્યું. ત્યારે હવે ક્રિતિકાએ પહેલી ફિલ્મ વિશે ખુલાસો કરતાં કહ્યું,“મેં સાઇન કરેલી એ પહેલી ફિલ્મ હતી.
અમે તૈયારીઓ કરી લીધી હતી અને બધાનાં સાથે રિડીંગ પણ થઈ ગયાં હતાં. બધાનાં શિડ્યુલ પણ બની ગયાં હતાં. પરંતુ પછી વ્યાપારી કારણોસર ફિલ્મ બની જ નહીં.” ક્રિતિકાએ કબૂલ્યું કે આ ઘટનાથી તે ઘણી નિઃરાશ થઈ ગઈ હતી. કારણ કે એ વખતે તેણે ટીવીમાં કામ કરવાનું છોડી દીધું હતું અને તે ફિલ્મ માટે ઘણા બધાં ઓડિશન આપતી હતી. “ધર્માની ફિલ્મથી તમે ડેબ્યુ કરો એ બહુ મોટી વાત છે.
બધું નક્કી થઈ ગયું, શૂટ શરૂ થવાનું હતું અને અચાનક બધું અટકી ગયું તેનાથી હું બહુ જ નિઃરાશ થઈ ગયો હતો.” જોકે, પછી ક્રિતિકાએ ‘ભીડ’ સહિતની ફિલ્મોમાં કામ કર્યું. ક્રિતિકા કહે છે,“બધું જે પણ રીતે આગળ વધ્યું તેનાથી પણ હું ખુશ જ છું. પરંતુ મારા નસીબમાં ધર્મા સાથે કામ કરવાનું હતું, તેથી મને હવે ‘ગ્યારા ગ્યારા’માં કામ કરવાની તક મળી.
બધું જ યોગ્ય સમયે જ થાય છે. આ શો કરતી વખતે હું ૨૦૧૩ કરતાં વધુ તૈયાર અને સજ્જ હોય એવું લાગે છે.” આ ફિલ્મમાં ક્રિતિકા સાથે રાઘવ જુયાલ, આકાશ દિક્ષિત અને ધૈર્ય કરવા મુખ્ય રોલમાં હશે. આ ફિલ્મ કરણ જોહર અને ગુનીત મોંગા એક સાથે પ્રોડ્યુસ કરી રહ્યાં છે. આ એક ઇન્વેસ્ટિગેટિવ ફેન્ટસી થ્રિલર ફિલ્મ છે, જે ૯ ઓગસ્ટથી ઝી૫ પર જોઈ શકાશે.SS1MS
