ઈઝરાયેલે ગાઝામાં જહાજ સાથે થનબર્ગની અટકાયત કરી

ફ્રીડમ ફ્લોટિલા સંગઠનનો જહાજમાં રહેલા લોકોને ઈઝરાયેલે કિડનેપ કર્યા હોવાનો આક્ષેપ

ઈઝરાયેલના વિદેશ મંત્રાલયે જણાવ્યું હતું કે, સેલિબ્રિટીઝ સાથેનું આ જહાજ માત્ર એક સ્ટન્ટ છે અને તેને ઈઝરાયેલના કાંઠે લઈ જવામાં આવી રહ્યું છે

નવી દિલ્હી, ગાઝામાં ભૂખમરાનો સામનો કરી રહેલા લોકો માટે માઠા સમાચાર છે. પર્યાવરણ કાર્યકર્તા ગ્રેટા થનબર્ગ તેમજ અન્ય ૧૧ લોકો સાથેનું મેડલીન જહાજ રાહત સામગ્રી સાથે ગાઝામાં પ્રવેશે તે પૂર્વે જ તેને ઈઝરાયેલે અટકાવ્યું છે અને તમામને અટકમાં લઇ લીધા છે. ફ્રીડમ ફ્લોટિલા સંગઠન દ્વારા સંચાલિત આ જહાજને કોઈપણ ભોગે ગાઝામાં નહીં પ્રવેશ આપવા રવિવારે ઈઝરાયેલે જણાવ્યું હતું. ગાઝાથી લગભગ ૨૦૦ કિ.મી.ના અંતરે આંતરરાષ્ટ્રીય જળસીમામાં જ જહાજને અટકાવાયું હતું.

ઈઝરાયેલના વિદેશ મંત્રાલયે જણાવ્યું હતું કે, સેલિબ્રિટીઝ સાથેનું આ જહાજ માત્ર એક સ્ટન્ટ છે અને તેને ઈઝરાયેલના કાંઠે લઈ જવામાં આવી રહ્યું છે. બીજીતરફ ફ્રીડમ ફ્લોટિલા સંગઠને જહાજને ઈઝરાયેલ દ્વારા ગેરકાયદે રોકવાનો અને તેમાં રહેલા કાર્યકરોને કિડનેપ કર્યાનો આક્ષેપ કર્યાે હતો. જહાજમાં રહેલા કાર્યકરોને ઈઝરાયેલના પોર્ટ શહેર અશદોદ ખાતે લઈ જવામાં આવ્યા હોવાની સંભાવના છે.

ઈટાલીના સિસિલીથી ૧ જૂનને રવિવારે મેડલીન નામનું જહાજ રવાના થયું હતું. સ્વીડનની પર્યાવરણ કાર્યકર્તા ગ્રેટા થનબર્ગ સહિત ૧૨ લોકો તેમાં સવાર હતા. આ જહાજ ગાઝામાં ભૂખથી ટળવળતા લોકો માટે અનાજ, ફળો, દવાઓ, બાળકો માટે દૂધ, કૃત્રિમ અંગો તથા વોટર પ્યૂરિફાયર જેવી રાહત સામગ્રી લઈને ગાઝા પહોંચવાનું હતું. ઈઝરાયેલે ત્રણ મહિનાથી ગાઝાના દરેક માર્ગ પર જડબેસલાક નાકાબંધી કરી છે. ઈઝરાયેલના અશદોદ નજીક પરોઢીયે જહાજને રોકીને કાંઠે લાંગર્યા બાદ તમામ કાર્યકરોને ઉતારીને અજ્ઞાત સ્થળે લઈ જવાયા હતા.ઈઝારાયેલના વિદેશી મંત્રીના જણાવ્યા મુજબ, મેડલીન જહાજમાં રહેલા ૧૨ કાર્યકરોને તેમના વતન પરત મોકલવામાં આવશે અને નિર્ધારિત વ્યવસ્થા હેઠળ જ ગાઝામાં રાહત સામગ્રીને પહોંચાડવામાં આવશે. ઈઝરાયેલે સૌપ્રથમ જહાજને ડ્રોન્સથી ઘેરી લીધું હતું. કમાન્ડો જહાજમાં ચઢે તે પૂર્વે ડ્રોનમાંથી સફેદ રંગ જેવો પદાર્થ છાંટવામાં આવ્યો હતો. હું મારા તમામ મિત્રો, પરિવાર અને કોમરેડ્‌સને અમને વહેલી તકે મુક્ત કરવામાં આવે તેવું સ્વીડિશ સરકાર પર દબાણ લાવવા અનુરોધ કરું છું.

ઈઝારેયલ અને ઈજીપ્ત દ્વારા ગાઝા વિરુદ્ધ કડક વલણ અખત્યાર કરાતા ૧૮ વર્ષથી વિવિધ માર્ગાે પર નાકાબંધી કરાઈ છે. ગાઝામાં હથિયારો ના પહોંચે તે સુનિશ્ચિત કરવાના ઈરાદે તમામ રસ્તાઓ બ્લોક કરાયા છે. ૭ ઓક્ટોબર ૨૦૨૩ના આતંકી સંગઠન હમાસે ઈઝરાયેલ ઉપર ઘાતકી હુમલો કર્યાે હતો જેમાં ૧૨૦૦ લોકોના મોત થયા હતા અને ૨૫૧ લોકોને બંધક બનાવ્યા હતા. આ પૈકી કેટલાકના મોત થયા છે અને હજુ ૫૫ જેટલા લોકો હમાસના કબજામાં હોવાનું મનાય છે. છેલ્લા બે વર્ષમાં ઈઝરાયેલે ગાઝા પર કહેર વર્તાવ્યો હતો અને ૫૪,૦૦૦ પેલેસ્ટેનિયનને મોતને ઘાટ ઉતાર્યા હતા જેમાં મોટાપાયે મહિલાઓ અને બાળકોનો સમાવેશ થાય છે. ઈઝરાયેલના ગાઝા પરના હુમલામાં ૧.૨૬ લાખ લોકો ઈજાગ્રસ્ત થયા હતા. SS1