સોનાક્ષી સિંહા અને જ્યોતિકાના કોર્ટરૂમ ડ્રામાનું શૂટિંગ શરૂ થયું

ફિલ્મનું ટાઈટલ કે રિલીઝ ડેટ હજુ જાહેર થયા નથી

શૂટિંગ માટે કોર્ટરૂમ ઉપરાંત માલવાની, મઢ આઈલેન્ડ અને વિલે પાર્લે જેવા વિસ્તારો પણ ઊભા કરવામાં આવ્યા છે

મુંબઈ,સોનાક્ષી સિંહા અને જ્યોતિકા આગામી કોર્ટરૂમ ડ્રામામાં એકબીજાને ટક્કર આપતા જોવા મળશે. અશ્વિની ઐયર તિવારીના ડાયરેક્શનમાં બની રહેલા આ લીગલ ડ્રામાનું આયોજન ઘણાં સમયથી ચાલી રહ્યું હતું. શરૂઆતમાં કરીના કપૂર ખાન અને કિઆરા અડવાણીને લીડ રોલમાં રાખીને ફિલ્મની તૈયારી શરૂ કરાઈ હતી. જો કે આયોજનમાં ફેરફારના કારણે કાસ્ટ પણ બદલાઈ હતી. રિપોટ્‌ર્સ મુજબ, કેટલાક ક્રીએટિવ ડિફરન્સના કારણે આયોજન મુજબ ફિલ્મ આગળ વધી નહીં. આખરે નવેસરથી સ્ક્રિપ્ટની શરૂઆત કરવામાં આવી અને સમગ્ર પ્રોજેક્ટનું ફરી આયોજન કરાયું.

આ પ્રક્રિયામાં વિલંબના કારણે ઓરિજિનલ કાસ્ટમાં નક્કી થયેલા કરીના અને કિઆરાને પણ રીપ્લેસ કરવાની જરૂરિયાત ઊભી થઈ. ફિલ્મને તાત્કાલિક શરૂ કરવાની હતી અને તેથી જાણીતા ચહેરાની શોધ શરૂ થઈ હતી. સોનાક્ષી અને જ્યોતિકા એવા નામ હતા, જેઓ જાણીતા હોવાની સાથે તેમના હાથ પર મોટા પ્રોજેક્ટ પણ નથી.

સોનાક્ષી અને જ્યોતિકાના લૂક ટેસ્ટ બાદ ફાઈનલ કરવામાં આવ્યા હતા. ગત સપ્તાહે મુંબઈ ખાતે સ્ટુડિયોમાં ફિલ્મનું શૂટિંગ શરૂ થયું છે. શૂટિંગ માટે કોર્ટરૂમ ઉપરાંત માલવાની, મઢ આઈલેન્ડ અને વિલે પાર્લે જેવા વિસ્તારો પણ ઊભા કરવામાં આવ્યા છે. ફિલ્મની સ્ટોરી પર્સનલ ટ્રોમા અને સોશિયલ જસ્ટિસ સાથે સંકળાયેલા લીગલ કેસને રજૂ કરે છે. ફિલ્મનું ટાઈટલ કે રિલીઝ ડેટ હજુ જાહેર થયા નથી. SS1