લોસ એન્જેલસમાં લૂંટફાટ શરૂ થતાં કરફ્યુ લાદવો પડ્યો

પ્રમુખ ટ્રમ્પ અને ગવર્નરે સામ-સામા આક્ષેપો કરી રાજકારણ રમવાની તક ઝડપી

ટ્રમ્પે ઈમિગ્રેશનની નીતિમાં ફેરફારની જાહેરાત કર્યા બાદ લોસ એન્જેલસમાં શુક્રવારથી દેખાવો થઈ રહ્યા છે

લોસ એન્જેલસ,લોસ એન્જેલસમાં ભારેલા અગ્નિ જેવી સ્થિતિ પ્રવર્તી રહી છે. સુરક્ષા દળોની કડકાઈ છતાં પ્રદર્શનકારીઓ વધુ આક્રમક થઈ રહ્યા છે. લોસ એન્જેલસમાં દુકાનો-ઓફિસોમાં લૂંટફાટ શરૂ થઈ જતાં કરફ્યુ લાદવાની ફરજ પડી હતી. શુક્રવારથી જે વિસ્તારોમાં સતત દેખાવો થઈ રહ્યા છે તેવા ૨.૫ ચોરસ કિમીમાં આ કરફ્યુ લાદવામાં આવ્યો છે. કરફ્યુના પગલે શહેરમાં તણાવ ઘટવાની આશા મેયર મેકડોનેલે વ્યક્ત કરી છે. લોસ એન્જેલસમાં પ્રદર્શનકારીઓએ હિંસા બાદ લૂંટફાટ શરૂ દેતાં ટ્રમ્પ ફરી મેદાને આવ્યા છે.

ટ્રમ્પે કટોકટીના સમયે યુએસ પ્રમુખની સત્તાનો ઉપયોગ કરી ઈન્સ્યુરેક્શન એક્ટ લાગુ કરવાની વિચારણા હાથ ધરી છે. આ એક્ટ હેઠળ બળવા કે રમખાણ જેવી સ્થિતિમાં સૈન્યને જવાબદારી સોંપવામાં આવે છે. યુએસ આર્મીની ૨૫૦મી જયંતિ નિમિત્તે ફોર્ટ બ્રેગ ખાતે વક્તવ્ય દરમિયાન ટ્રમ્પે દેખાવકારોને વિદેશી શત્‰ અને જાનવર ગણાવ્યા હતા. લોસ એન્જેલસમાં ઊભી થયેલી સ્થિતિને લોકશાહી પર પ્રહાર સમાન ગણાવી ટ્રમ્પે લોસ એન્જેલસમાં ભયંકર માહોલ હોવાનું કહ્યું હતું. કેલિફોર્નિયાના ગવર્નર ન્યૂસમ જૂઠ્ઠાણું ફેલાવતા હોવાનો દાવો પણ ટ્રમ્પે કર્યાે હતો. ગવર્નર ન્યૂસમ પણ ટ્રમ્પ સામે ટક્કર ઝીલવા ખૂબ ઉત્સુક છે.

લોસ એન્જેલસમાં હિંસા ભડકાવવા પ્રયત્ન કરનારા તત્વોને ચેતવણી આપવાની સાથે ન્યૂસમે પ્રમુખ ટ્રમ્પની જોહુકમીનો સામનો કરવા જણાવ્યું હતું. ટ્રમ્પે ઈમિગ્રેશનની નીતિમાં ફેરફારની જાહેરાત કર્યા બાદ લોસ એન્જેલસમાં શુક્રવારથી દેખાવો થઈ રહ્યા છે. અમેરિકાના સીએટલ અને ઓસ્ટિનથી શિકાગો અને વોશિંગ્ટન સહિત અનેક સ્થળે દેખાવો શરૂ થઈ જતાં ટ્રમ્પે નેશનલ ગાર્ડને સાબદાં કરી દીધા છે અને તેમને અલગ-અલગ સ્થળે રવાના કરી દેવાયાં છે.

સાન ફ્રાન્સિસ્કોમાં ઈમિગ્રેશન કોર્ટની બહાર ૨૦૦ જેટલા દેખાવકારો ભેગા થઈ સૂત્રોચ્ચાર કરતા હતા. નજીકની કાર અને ઈમારતોમાં તોડફોડ શરૂ થતાં ૧૫૦ની ધરપકડ કરાઈ હતી. સીએટલમાં લોકોએ પ્રદર્શન કર્યું હતું. ન્યૂયોર્કમાં વિશાળ રેલીનું આયોજન થયું હતું અને ઈમિગ્રેશન કોર્ટની બહાર લોકો ભેગા થયા હતા. શિકાગોમાં ટોળાએ દેખાવો કર્યા હતા. ડેનેવરમાં હજારો લોકો રસ્તા પર ઉતરી આવતા, ટ્રાફિક અટવાયો હતો. SS1