મેં મારી કારકિર્દીના દસ વર્ષ માત્ર મારી જગ્યા બનાવવામાં જ કાઢ્યા : ક્રિતિ ખરબંદા

ક્રિતિ ખરબંદાએ રાણા નાઇડુ સીઝન ૨ વિશે વાત કરી

ક્રિતિએ કહ્યું, મેં હકીકતમાં ફિલ્મની ફૅનથી લઇને એક કાસ્ટ સુધીની સફર ખેડી છે કારણ કે મને પહેલી સીઝન બહુ ગમી હતી

મુંબઈ,તાજેતરમાં જાણીતી એક્ટ્રેસ ક્રિતિ ખરબંદાએ તેની નેટફ્લિક્સ સિરીઝ ‘રાણા નાઇડુ’ અને કૅરીઅર વિશે એક ઇન્ટરવ્યુમાં વિગતે વાતો કરી હતી. છેલ્લાં ઘણા વખતથી એક્ટર અને એક્ટ્રેસ વચ્ચે વળતરના ભેદભાવની ચર્ચાઓ ચાલતી રહે છે. તાજેતરમાં જ્યારે દીપિકાએ ૨૦ કરોડની ફી ઉપરાંત આઠ કલાકના કામ અને વધારાના કામ પર વધારાનું વળતર માગ્યું ત્યારે આ મુદ્દો ફરી ચર્ચામાં આવ્યો. બીજી તરફ હિરો ફીપેઠે અધધ રકમ માગે તેને લોકો સામાન્ય ગણવા માંડ્યા છે.

ત્યારે ક્રિતિએ જેન્ડર બાયસ અને તેણે ઇન્ડસ્ટ્રીમાં સ્વીકૃતિ મેળવવા માટે કેટલો સંઘર્ષ કર્યાે, તે અંગે વાત કરી હતી. હવે ક્રિતી નેટફ્લિક્સના શો રાણા નાઇડુની બીજી સીઝનમાં જોવા મળશે, ત્યારે તેણે તેના અનુભવ વિશે પણ વાત કરી હતી. ક્રિતિએ કહ્યું, “મેં હકીકતમાં ફિલ્મની ફૅનથી લઇને એક કાસ્ટ સુધીની સફર ખેડી છે કારણ કે મને પહેલી સીઝન બહુ ગમી હતી. તેથી મેં જ્યારે મારા પાત્રની સ્ક્રિપ્ટ વાંચી તો સારી વાત એ હતી કે હું બધાને ઓળખતી હતી. જોકે, મને એમાંથી રાણા સિવાય કોઈ સાથે કામ કરવાની તો તક મળી નહોતી.

કારણ કે શોમાં અમારો બંનેનો એક અસ્ત વ્યસ્ત પરિવાર છે, જેનું અમારે બંનેને ધ્યાન રાખવાનું છે, તેમાં રજત કપૂર, તનુજ વિરવાણી અને હું છીએ. હું આલિયા ઓબેરોયનું પાત્ર ભજવું છું અને એ એક આવી છોકરી છે જે બહુ મહત્વાકાંક્ષી છે અને ફિલ્મ બિઝનેસ સાથે જોડાયેલી છે. એ બહુ મહત્વાકાંક્ષી છે અને જીવનમાં ઘણું કરવા માગે છે. તે પણ એક નાની લડત લડી રહી છે. તેને પણ જેન્ડર બાયસનો સામનો કરવો પડે છે. તેને લાગે છે કે, તેને કોઈ ગંભીરતાથી લેતું નથી અથવા તો એક સ્ત્રી છે એટલે તેને મળવો જોઈએ એ શ્રેય મળતો નથી. મને એ પાત્રમાં જે સૌથી વધુ ગમ્યું એ છે, તમે તેને નફરત નહીં કરી શકો.

તમે તેના કામને યોગ્ય ઠેરવવાની કોશિશ કરશો અને તમને પણ તેના માટે દયા આવશે કારણ કે એ એવી જગ્યાએથી આવે છે, જેના સિવાય તેની સામે બીજો કોઈ વિકલ્પ નથી. જો મારે ત્રણ શબ્દોમાં આ પાત્ર વિશે વાત કરવાની હોય તો એ નિરિક્ષક છે, તે પ્રપંચી પણ છે અને વિÎનસંતોષી પણ છે.”જેન્ડર બાયસ અંગે ક્રિતિએ કહ્યું, “આપણે ઇચ્છીએ છીએ કે આપણે લોકોને ગમીએ અને એમાં જ આપણે જીવનનો મોટો સમય કાઢી નાખીએ છીએ. આપણે કોઈ મર્યાદા તોડવા માગતા નથી. છોકરી તરીકે તમારા ઉછેરમાં હંમેશા છોકરી જેવું વર્તવા સમજાવાય છે.

જો તમે વધુ માગણી કરશો તો તમારા પર તમારી સાથે કામ લેવું અઘરું છે એવી છાપ પડી જશે. આપણને શીખવવામાં આવે છે, શું સારું અને શું ખરાબ. તમે જીવનનો મોટો ભાગ તમે બીજાને ગમો અને તમને કોઈ ગમાડે એ આશામાં જ વિતાવી દો છો. પરંતુ આપણે એ પણ સમજવાની જરૂર છે કે કદાચ તમે કોઈને ન ગમો તો પણ કોઈ વાંધો નહીં. મેં મારી કૅરીઅરના દસ વર્ષ લોકો મને સ્વીકારે અને મારી જગ્યા બનાવવામાં જ કાઢી નાખ્યા, એ આશામાં કે લોકો મને ગમાડે અને તો મારી સાથે ભવિષ્યમાં પણ કામ કરશે.”

ક્રિતિએ આગળ કહ્યું, “પછી મને સમજાયું કે હું પણ એ લોકો જેટલી જ પ્રોફેશનલ હતી. હું પણ મેકઅપની ખુરશી પર બે કલાક વિતાવું છું તો હું પણ થાકું છું. મને ઘણું અનુભવાય છે અને હવે હું તેના અંગે અવાજ ઉઠાવતા ડરતી નથી. તમે કોઈની અસહમતીમાં પણ સહમત હોય તો એમાં કંઈ ખોટું નથી. તમે જ્યારે આવું વિચારવાનું શરૂ કરો ત્યારે કામ વધુ સહેલું થઈ જાય છે.”SS1