ગુજરાતમાં ચોમાસાનો પ્રારંભઃ ભાવનગર અને અમરેલીમાં ધોધમાર વરસાદ

અમરેલીના ઘોબા, પીપરડી અને ફિફાદ જેવા ગામોની શેરીઓમાં નદીઓ જેટલું પાણી વહ્યુંઃ ભાવનગરમાં સાર્વત્રિક વરસાદથી જનજીવન પર અસરઃ ખેડૂતો ખુશખુશાલ

(એજન્સી)અમરેલી, ગુજરાતમાં સમય પ્રમાણે એટલે કે ૧૬ જૂનથી ચોમાસાનો પ્રારંભ થઈ ગયો છે. આજે સવારથી જ રાજ્યના મોટાભાગના વિસ્તારોમાં વાદળછાયા વાતાવરણ વચ્ચે વરસાદ પડવાનો શરૂ થયો છે. દ.ગુજરાતમાં વીજળીના કડાકા ભડાકા સાથે વરસાદ પડયો હતો.

અમરેલી અને ભાવનગર જિલ્લામાં સાર્વત્રિક રીતે ભારે વરસાદ પડતા નદી-નાળા છલકાઈ ગયા હતા. કેટલાક ગામોમાં પણ પાણી ફરી વળ્યા હતા. ભાવનગરના તલગાજરડા ગામે શાળાના ૪૦ જેટલા વિદ્યાર્થીઓ ફસાયા હતા. જોઓને સલામત રીતે ઘરે પહોંચાડવામાં આવ્યા હતા.

ભાવનગર અને અમરેલી જિલ્લામાં આજે એક જ દિવસમાં સરેરાશ પ ઈંચથી વધુ વરસાદ પડતા જનજીવન ઉપર અસર પડી હતી. ચોમાસાનો પ્રારંભ થતાં જ પ્રથમ વરસાદ જ વાવણીલાયક થયો છે. જેનાથી ખેડૂતો ખુશખુશાલ થયા છે.

ગુજરાતમાં આજથી ચોમાસાની ધમાકેદાર શરૂઆત થઈ ગઈ છે. રાજ્યના ૧૦૧ તાલુકાઓમાં છેલ્લા ૮ કલાકમાં વરસાદ નોંધાયો છે, જેમાં અમરેલી જિલ્લો પણ સામેલ છે. અમરેલી જિલ્લામાં સોમવાર, ૧૬ જૂન ૨૦૨૫ના રોજ સવારે ૬ઃ૦૦ વાગ્યાથી શરૂ થયેલા ધોધમાર વરસાદે ગ્રામીણ અને શહેરી વિસ્તારોમાં હાલાકી સર્જી છે.

સાવરકુંડલા, રાજુલા, ખાંભા અને લીલીયા તાલુકાઓમાં ભારે વરસાદને કારણે રોડ-રસ્તાઓ બંધ થયા છે, નદીઓમાં ઘોડાપૂર આવ્યું છે અને ગામોમાં પાણી ભરાયા છે.
સાવરકુંડલા તાલુકાના ગ્રામીણ વિસ્તારોમાં ભારે વરસાદે રસ્તાઓ પર પાણી ફરી વળ્યું છે. છાપરી ગામે આવેલી નદીમાં ઘોડાપૂર આવતાં છાપરી અને વીજપડી ગામને જોડતો પુલ પાણીમાં ગરક થયો છે, જેના કારણે આ રસ્તો બંધ થયો છે.

ઘોબા ગામમાં ભારે વરસાદથી ગોઠણસમા પાણી ભરાયા છે, જેના કારણે ગામની શેરીઓમાં નદી જેવો માહોલ સર્જાયો છે. આ ગામમાં ત્રણથી ચાર ઇંચ વરસાદ નોંધાયો, જેના કારણે ગામમાં પાણી-પાણી જોવા મળી રહ્યું છે.

અમરેલીના ઘોબા ગામની શેરીઓમાં નદી જેવો માહોલ સર્જાયો છે, જેના કારણે રહેવાસીઓને અવરજવરમાં મુશ્કેલી પડી રહી છે. ફિફાદ અને ઘોબા ગામ વચ્ચેના નદી-નાળાઓમાં પાણીનો પ્રવાહ એટલો તેજ બન્યો છે કે, પૂરની સ્થિતિ સર્જાઈ છે, જેના લીધે આ વિસ્તારોમાં ખેતરો અને રસ્તાઓ પર પાણી ફરી વળ્યું છે.

રાજુલા તાલુકાના ચાંચબંદર, સમઢીયાળા, ખેરા, પટવા અને દરિયાઈ ટાપુ વિસ્તારોમાં ધોધમાર વરસાદે રસ્તાઓ પાણીમાં ગરકાવ કર્યા છે. અનેક ગામોમાં રસ્તાઓ બંધ થયા, જેના કારણે લોકોની અવરજવર ખોરવાઈ છે. ખાંભા તાલુકાના ભાવરડી, ડેડાણ અને માલક ગામોમાં ભારે વરસાદથી નદીઓમાં ઘોડાપૂર આવ્યું છે. લીલીયા તાલુકાના ગ્રામીણ અને શહેરી વિસ્તારોમાં પણ ધોધમાર વરસાદના કારણે રસ્તાઓ અને નીચાણવાળા વિસ્તારોમાં પાણી ભરાયા છે.

જિલ્લાના ગ્રામીણ વિસ્તારોમાં બે ઇંચથી વધુ વરસાદ નોંધાયો, જેના કારણે તમામ નદીઓમાં ઘોડાપૂરની સ્થિતિ સર્જાઈ છે. આ વરસાદે ખેડૂતો માટે રાહત લાવી હોવા છતાં, રસ્તાઓ બંધ થવા અને પાણી ભરાવાને કારણે ગ્રામજનોને હાલાકીનો સામનો કરવો પડી રહ્યો છે. સ્થાનિક વહીવટી તંત્ર દ્વારા પરિસ્થિતિ પર નજર રાખવામાં આવી રહી છે, અને લોકોને નદીઓની નજીક ન જવા તેમજ સાવચેતી રાખવા અપીલ કરવામાં આવી છે.

અમરેલી જિલ્લાના અનેક વિસ્તારોમાં ચોમાસાનો પ્રારંભ ભવ્ય રીતે થયો છે. રાજ્યના ૧૦૧ તાલુકાઓમાં છેલ્લા ૮ કલાકમાં વરસાદ નોંધાયો છે, જેમાં અમરેલી જિલ્લો પણ સામેલ છે. ખાસ કરીને જેસરમાં ૯ ઇંચથી વધુ વરસાદ નોંધાયો, જ્યારે પાલિતાણામાં ૭ ઇંચથી વધુ અને મહુવામાં પણ ૭ ઇંચ વરસાદ વરસ્યો છે. આ ઉપરાંત, તળાજામાં ૩.૫ ઇંચ અને ગારિયાધારમાં ૩ ઇંચ વરસાદ નોંધાયો છે. આ ભારે વરસાદે ખેતરોને ભીંજવી દીધા છે, જે ખેડૂતો માટે રાહતના સમાચાર છે.

આ ભારે વરસાદે જ્યાં એક તરફ નુકસાન કર્યું છે, ત્યાં બીજી તરફ ખેડૂતો માટે આનંદનું કારણ બન્યો છે. લાંબા સમયથી વરસાદની રાહ જોતા ખેડૂતોને આ ધોધમાર વરસાદે વાવણી માટે અનુકૂળ પરિસ્થિતિ પૂરી પાડી છે. પાકો માટે જરૂરી ભેજ મળતાં ખેડૂતોમાં ઉત્સાહનો માહોલ છે. ખાસ કરીને કપાસ, મગફળી અને અન્ય પાકોની વાવણી માટે આ વરસાદ ખૂબ જ ફાયદાકારક સાબિત થશે.

હવામાન વિભાગની આગાહી પ્રમાણે ભાવનગર જિલ્લામાં ઘોઘા, તળાજા, મહુવા, પાલીતાણા, સિહોર સહીત મોટાભાગના તાલુકા પંથકમાં વરસાદ નોંધાયો હતો, જેના પગલે ગઈ સાંજે મેઘરાજાની ધમાકેદાર એન્ટ્રી થઈ હતી.

વીજળીના કડાકા ભડાકા સાથે વરસાદ થતા શહેર જિલ્લામાં બે સ્થળો પર વીજળી પડવાના બનાવમાં એક મહિલા સહીત ૪ લોકોને ઇજા પહોંચતા શહેરની સિવિલ હોસ્પિટલ ખાતે સારવાર માટે ખસેડવામાં આવ્યા છે, જયારે આજે વહેલી સવારે પણ વરસાદનું ધમાકેદાર આગમન થયું હતુ જેમાં જિલ્લાના તમામ ૧૦ તાલુકા પંથકમાં હળવો ભારે વરસાદ વરસી ગયો હતો, પાલીતાણામાં ૪ ઇંચ, સિહોરમાં ૨ ઇંચ, તળાજામાં ૨ ઇંચ, મહુવામાં ૨ ઇંચ જયારે જેસર પંથકમાં ૨.૫ ઇંચ વરસાદ વરસી ગયો હતો.

ભારે વરસાદના કારણે રસ્તાઓ જાણે નદીઓ બની ગયા હોય તેવો માહોલ ઉભો થયો હતો. ધોધમાર વરસાદ થતા નદીમાં પાણી વહેતા થયાં હતા. સારો વાવણી લાયક વરસાદ થઈ જતા ખેડૂતોમાં ખુશીની લહેર દોડી ગઈ હતી. વરસાદ થતાં લોકોને ગરમીથી રાહત મળી હતી.

ગુજરાતના હવામાન વિભાગ દ્વારા સારા સમાચાર આપવામાં આવ્યા છે. હવામાન વિભાગે જણાવ્યું કે ગુજરાતમાં ચોમાસાનું આગમન થઈ ગયું છે. વેરાવળ, ભાવનગર અને વડોદરાથી ચોમાસાનું ગુજરાતમાં આગમન થયું છે. રાજ્યમાં વરસાદી માહોલ છવાયો છે. ગત ૨૪ કલાકમાં રાજ્યના ૧૩૦ તાલુકામાં વરસાદ નોંધાયો છે.

રાજ્યના ૩૦ તાલુકામાં ૧ ઈંચથી વધુ વરસાદ નોંધાયો. તો વડોદરાના ડભોઈમાં ૬ ઈંચથી વધારે વરસાદ નોંધાયો. છોટાઉદેપુરના સંખેડામાં ૫ ઈંચ વરસાદ રહ્યો. આ ઉપરાંત સુરત, વલસાડ, ડાંગ, ભાવનગર, અમરેલી, જૂનાગઢ, બનાસકાંઠા, મહેસાણા, સાબરકાંઠામાં પણ વરસાદ વરસ્યો.