સૌરાષ્ટ્રના ૧૦ જળાશયો છલકાઈ જતાં હાઈ એલર્ટ જાહેર કરાયું

સૌરાષ્ટ્રના વિવિધ વિસ્તારોમાં આજે છૂટોછવાયો વરસાદ

જામનગરનો રણજીતસાગર ડેમ ગઈકાલે મોડી રાત્રે તેની સંપૂર્ણ ક્ષમતાએ ભરાઈને ઓવરફ્લો થયો છે

ભરૂચ,સૌરાષ્ટ્રના વિવિધ વિસ્તારોમાં આજે છૂટોછવાયો વરસાદ નોંધાયો છે, જ્યારે સૌરાષ્ટ્રના કુલ ૧૦ ડેમો છલકાઈ જતાં હાઈ એલર્ટ જાહેર કરવામાં આવ્યું છે. ગીર સોમનાથ જિલ્લાના ઉના શહેરમાં સવારથી ઝરમર વરસાદ જોવા મળ્યો હતો. ગીર જંગલ નજીક આવેલા જામવાળા ગામમાં એક ઇંચથી વધુ વરસાદ નોંધાયો છે.અમરેલી જિલ્લાના રાજુલા, જાફરાબાદ અને ખાંભા પંથકમાં પણ વરસાદ વરસ્યો હતો.ને ગીર પંથકમાં ધોધમાર વરસાદ પડ્યો હતો.ભાવનગર જિલ્લાના દસ તાલુકામાંથી છ તાલુકામાં આજે સવારના ૬ થી ૧૦ કલાક દરમિયાન હળવો વરસાદ નોંધાયો છે.

આ સમયગાળામાં વલ્લભીપુરમાં સૌથી વધુ ૦.૨૮ ઇંચ વરસાદ પડ્યો હતો. અન્ય તાલુકાઓમાં સિહોરમાં ૦.૧૬ ઇંચ, ઉમરાળામાં ૦.૦૮ ઇંચ અને ગારીયાધાર, પાલીતાણા તથા જેસરમાં ૦.૦૪-૦.૦૪ ઇંચ વરસાદ નોંધાયો હતો. અમરેલી જિલ્લાના ધાતરવાડી અને સુરજવાડી, સુરેન્દ્રનગરના વાંસલ, લીમ-ભોગાવો-૧ અને સબુરી, જામનગર જિલ્લાના વાઘડીયા, કચ્છના કલાઘોઘા, ભાવનગરના રોજકી તથા બગડ અને બોટાદ જિલ્લાના ભીમદાદ એમ કુલ ૧૦ જળાશયો સંપૂર્ણ એટલે કે ૧૦૦ ટકા ભરાઈ ગયા છે, જેથી હાઈ એલર્ટ જાહેર કરવામાં આવ્યું છે.

રાજકોટ જિલ્લાના ધોરાજી તાલુકા પાસેનો ભાદર-૨ ડેમ ઓવરફ્લો થતાં ડેમના ૧ દરવાજાને ૦.૩ મીટર ખોલવામાં આવ્યો છે, આથી ડેમના હેઠવાસના ગામોમાં ચેતવણી જાહેર કરવામાં આવી છે.જામનગર પંથકમાં સરેરાશ બે થી સાડા છ ઇંચ જેટલો વરસાદ ખાબક્યો હતો. જામનગરનો રણજીતસાગર ડેમ ગઈકાલે મોડી રાત્રે તેની સંપૂર્ણ ક્ષમતાએ ભરાઈને ઓવરફ્લો થયો છે.ss1