હું બસ એને હસતી જોવા માગું છું : વિકી કૌશલ

વિકી કૌશલે કેટરીના પ્રત્યે પ્રેમ જાહેર કર્યાે

વિકી માટે પ્રેમ જાહેર કરવા માટે કશું મોટું અને ખર્ચાળ કરવું એ પ્રેમ નથી કે બધી જ સમસ્યાઓનો અંત લાવી દેવો એ પ્રેમ નથી 

મુંબઈ,ફિલ્મ ઇન્ડસ્ટ્રીની છાપ એવી છે કે, ત્યાં સંબંધો બહુ લાંબા ટકતા નથી કે પછી ગમે ત્યારે બદલાઈ જાય છે. તેમાં કેટરીને કૈફ અને વિકી કૌશલ એવા છે કે તેઓ બંને તેમની અંગત પણ રહી શકે છે અને સાથે સાથે અન્યોને પ્રેરણા પણ આપતાં રહ્યાં છે. એક રીતે તેઓ બંને પોતાના અંગત સંબંધને અંગત પણ રાખે છે અને છતાં ક્યારેક તેઓ પોતાના જીવનની ઝલક જાહેરમાં પણ આપતાં રહે છે, ખાસ કરીને વિકી કૌશલ કેટરિના માટેની લાગણીઓ જાહેરમાં વ્યક્ત કરતો રહે છે.

તાજેતરમાં એક પોડકાસ્ટમાં વિકીએ, તેને લગ્ન સંબંધમાં ખરેખર શું મહત્વનું છે તે અંગે વાત કરી હતી. જેમાં તેણે પોતાની એક સરળ અને મૂળભુત ઇચ્છાની વાત કરી હતી – જે છે, તેની પત્નીને ખુશ રાખવી. વિકીએ કહ્યું, “હું બસ તેને હસતી જોવા માગું છું, મારા માટે એ જ સૌથી મહત્વનું છે.”વિકીના આ શબ્દો જ બતાવે છે કે તે કેટરિનાને કેટલો પ્રેમ કરે છે અને બાકીની બધી જ બાબતો ઉપર તે લાગણીઓને મહત્વ આપે છે.

આગળ આ વાતે વધુ સ્પષ્ટતા કરતા વિકીએ એવું પણ કહ્યું કે કેટરિના ક્યાં છે કે શું કરે છે, તે અંગે તેની ચિંતા નથી હોતી પરંતુ તે શું અનુભવી રહી છે, તે મહત્વનું છે. વિકીએ કહ્યું, “તે ગમે ત્યાં હોય કે માનસિક રીતે જે પણ સ્થિતિમાં હોય, હું બસ એટલું જ ઇચ્છું છું કે એ ખુશ રહે. હું બસ ઇચ્છું છું કે એ એવી વ્યક્તિ બની રહે જે બસ મનથી ખુશ હોય.”વિકી માટે પ્રેમ જાહેર કરવા માટે કશું મોટું અને ખર્ચાળ કરવું એ પ્રેમ નથી કે બધી જ સમસ્યાઓનો અંત લાવી દેવો એ પ્રેમ નથી પરંતુ કેટરિનાનો ઉત્સાહ જળવાઈ રહે તે માટે તેનાથી થઈ શકે તે બધું કરવું એ પ્રેમ છે.

વિકી કહે છે, “મને જ્યારે લાગે કે એ મનથી ખુશ નથી, હું ત્યારે બીજી કોઈ બાબત વિશે પરવા કરતો નથી. પછી ભલે હું કોઈ સમસ્યાનું નિરાકરણ ન લાવી શકું પણ હું બસ એટલું જ ઇચ્છું કે એ હસતી રહેવી જોઈએ, બસ – મારા માટે એટલું જ મહત્વનું છે.”વિકીએ એવું પણ કબૂલ્યું કે દરેક વખતે તેને આવું કરવામાં સફળતા ન પણ મળે, પરંતુ તેનો પ્રયત્ન અને તેનો ઇરાદો મહત્વનો છે. “તમે બસ પ્રયત્ન કરતા રહો, હું એટલું જ વિચારું છું. મારા માટે પણ આ બહુ ઇવોલ્વિંગ જર્ની રહી છે.”

દુનિયામાં સામાન્ય રીતે લોકોને દેખાવ અને પર્ફેક્શન મહત્વનાં લાગે છે, ત્યારે વિકી કૌશલના શબ્દો દર્શાવે છે કે સંબંધો કરુણા, પ્રયત્ન અને તમારા પાર્ટનરને ખરેખર ખુશ જોવાની ઇચ્છાથી મજબુત બને છે. કેટરિનાએ ફિલ્મોમાંથી બ્રેક લીધો છે અને પોતાની કોસ્મેટિક કંપની પર ધ્યાન આપી રહી છે. જ્યારે વિકીએ તાજેતરમાં કૅરિઅરની સૌથી સફળ ફિલ્મ આપી છે. હવે તે સંજય લીલા ભણસાલીની લવ એન્ડ વારમાં આલિયા ભટ્ટ અને રણબીર કપૂર સાથે કામ કરી રહ્યો છે.ss1