Western Times News

Gujarati News

મીના કુમારીની બાયોપિકમાં કિઆરા લીડ રોલ કરી શકે

કિઆરા હા પાડે તો પ્રેગનેન્સીના બ્રેક પછી તે ટ્રેજેડી ક્વીન બની શકે

આ ફિલ્મ માટે થોડાં વખત પહેલાં કિઆરાને વાર્તા સંભળાવાઈ હતી, જેમાં તેને ઘણો રસ પડ્યો હતો

મુંબઈ,હિન્દી ફિલ્મની દુનિયામાં સૌથી ટ્રેજેડી ક્વીન મીના કુમારીના જીવન પર ફિલ્મ બની રહી છે, ત્યારે કિઆરા અડવાણીનો આ રોલ માટે સંપર્ક કરાયો હોવાના અહેવાલો છે. કિઆરા હાલ તો બ્રેક પર છે પરંતુ જો તે હા કહે તો તેનાં બ્રેક પછી તે આ બાયોપિકમાં જોવા મળી શકે છે. આ ફિલ્મ માટે મીના કુમારીના પતિ કમાલ અમરોહીનો પણ સંપર્ક કરાયો છે અને ફિલ્મમાં તેમની મદદ પણ લેવાઈ છે.આ રોલ માટે ક્રિતિ સેનના રોલની પણ ચર્ચા હતી, કારણ કે સુત્રોનાં મતે આ વિષય ક્રિતિ માટે સૌથી ગમતા વિષયોમાંનો એક હતો.

પરંતુ હવે એવા અહેવાલો છે કે કિઆરા આ રોલ કરવાની તૈયારીમાં છે. સુત્રો દ્વારા મળતી માહિતી અનુસાર કિઆરાનો આ રોલ માટે સંપર્ક કરાયો અને તેને આ ફિલ્મની સ્ક્રીપ્ટ પણ ગમી છે.આ ફિલ્મ માટે થોડાં વખત પહેલાં કિઆરાને વાર્તા સંભળાવાઈ હતી, જેમાં તેને ઘણો રસ પડ્યો હતો. પરંતુ એણે હજુ આ ફિલ્મ સાઇન કરીને તેને કાયદેસર રીતે કામ શરુ કરવાની હા પાડી નથી. પરંતુ ફિલ્મની ટીમને લાગે છે કે આ રોલ માટે કિઆરા તેના દેખાવ અને અભિનય ક્ષમતાના આધારે સૌથી વધુ યોગ્ય છે.મીના કુમારીનું બાળપણનું નામ મહજબીન બાનો હતું, જેઓ પાછળથી હિન્દી ફિલ્મ ઇન્ડસ્ટ્રીના જાણીતાં અભિનેત્રી બન્યાં.

તેઓ સામાન્ય લોકોમાં જેટલાં લોકપ્રિય હતાં એટલાં જ તેમનાં વિવેચકો પણ વખાણ કરતાં હતાં. તેમણે વીસ વર્ષ લાંબી કારકિર્દીમાં ઘણાં દુઃખી અને પીડાદાયક પાત્રો કર્યાં હોવાથી તેઓ ટ્રેજેડી ક્વીન તરીકે ઓળખાતાં થયાં હતાં. તેમણે ‘બૈજુ બાવરા’, ‘પરિણીતા’, ‘સાહિબ બિવી ઔર ગુલામ’, ‘કાજલ’, અને ‘પાકિઝા’ જેવી ફિલ્મમાં યાદગાર ભૂમિકાઓ નીભાવી હતી. ૩૮ વર્ષે તેમનું નિધન થયું એ પહેલાં તેમને બેસ્ટ એક્ટ્રેસ માટેનો ફિલ્મ ફેર એવોર્ડ પણ મળ્યો હતો.

સિદ્ધાર્થ પી. મલ્હાત્રા દ્વારા મીના કુમારીની ફિલ્મ માટેના અધિકારો પરિવાર પાસેથી મેળવવામાં આવ્યાં છે. તેઓ સારેગામા અને અમરોહી પરિવાર સાથે મળીને આ ફિલ્મ બનાવશે. ખાસ વાત તો એ છે કે મીના કુમારીના પતિ અને ફિલ્મ મેકર કમાલ અમરોહી પણ આ ફિલ્મ સાથે જોડાયા છે. કિઆરા હાલ બ્રેક પર છે, આ શિયાળામાં તેને પહેલું બાળક આવશે. પછી તે રિતિક અને જુનિયર એનટીઆર સાથે ‘વાર ૨’ અને પછી યશ સાથે ‘ટોક્સિક’માં જોવા મળશે.SS1


Read News In Hindi

Read News in English

Copyright © All rights reserved. | Newsphere by AF themes.