મહેસાણાના મોટપ નજીક ઊભેલા ટ્રેલરને બીજા ટ્રેલરે ટક્કર મારતાં બેનાં કરૂણ મોત

મહેસાણા, મહેસાણા-મોઢેરા રોડ પર મોટપ ચોકડી નજીક શનિવારે રાત્રે એક ટ્રેલરના ચાલક અને મિકેનિક ટાયર રીપેર કરતા હતા ત્યારે પાછળ બીજા ટ્રેલરે ટક્કર મારી દેતાં સર્જાયેલા અકસ્માતમાં બંનેનું મોત નિપજ્યું હતું.

આ બાબતે મોઢેરા પોલીસે ગુનો નોંધી વધુ તપાસ હાથ ધરી છે.મોરબીથી ટાઈલ્સ ભરીને નિકળેલું રાજસ્થાન પાસિંગનું ટ્રેલર શનિવારે રાત્રે દસેક વાગ્યે મોટપ ચોકડીથી મોઢેરા તરફ ૧૦૦ મીટર જેટલું દૂર એગ્રો પાઈપ નામની કંપની આગળ પહોંચ્યું હતું ત્યારે ટાયરની બેરિંગમાં કોઈ ખામી સર્જાતાં ટ્રેલર ઊભુ રાખી ચાલક આસમખાન અને મિકેનિક સંદિપ સમારકામ કરતા હતા.

દરમિયાન પાછળથી આવેલા બીજા રાજસ્થાન પાસિંગના ટ્રેલરના ચાલકે ઊભેલા ટ્રેલરને ટક્કર મારી દેતાં ગમખ્વાર અકસ્માત સર્જાયો હતો. જેમાં સમારકામ કરી રહેલા ચાલક અને મિકેનિકનું મોત નિપજ્યું હતું.

આ અકસ્માતમાં ટ્રેલરમાંથી વેરાયેલા કોલસા નીચે દટાયેલા મૃત ચાલકને કલાકો બાદ બહાર કાઢવામાં આવ્યો હતો. મોઢેરા પોલીસે બંને મૃતદેહોનું મહેસાણા સિવિલ હોસ્પિટલમાં પીએમ કરાવી અકસ્માત બાદ નાસી ગયેલા ટ્રેલરના ચાલક સામે ગુનો નોંધી વધુ તપાસ હાથ ધરી છે.SS1MS