પૂર્વ તલાટીએ રૂ.૭૦ લાખના ૪૪ સરકારી પ્લોટ બોગસ દસ્તાવેજથી વેચી માર્યા

૬૨૦૦ ચોરસ મીટર જગ્યા પર ૪૪ પ્લોટ માટે બનાવટી દસ્તાવેજ બનાવાયા

રાજકોટ, રાજકોટ જિલ્લાના ગોંડલ તાલુકાના ત્રાકુડા ગ્રામ પંચાયતના પૂર્વ તલાટી કમ-મંત્રી ધર્મેશ રત્નાભાઈ હાપલીયા સામે ૭૦ લાખની કિંમતના ૪૪ પ્લોટના ગેરકાયદે દસ્તાવેજો બનાવીને છેતરપિંડી કરવા બદલ ફરિયાદ દાખલ કરવામાં આવી છે. વર્તમાન તલાટી મંત્રી ભાવેશભા અમૃતલાલ ઉદેશીએ ગોંડલ તાલુકા પોલીસ સ્ટેશનમાં આ ફરિયાદ નોંધાવી છે.

ધર્મેશ હાપલિયાએ ૧૬-૧૦-૨૦૨૧થી ૩૧-૦૭-૨૦૨૪ દરમિયાન ત્રાકુડા ગ્રામ પંચાયતમાં તલાટી કમ મંત્રી તરીકે ફરજ બજાવતી વખતે પોતાના હોદ્દાનો દુરૂપયોગ કર્યો હતો. તેમણે તાલુકા વિકાસ અધિકારી ગોંડલ અને સર્કલ ઈન્સેપકટર તાલુકા પંચાયત ગોંડલના ખોટા સહી સિક્કા કરીને બનાવટી સરકારી દસ્તાવેજો બનાવ્યા હતા. આ બનાવટી દસ્તાવેજોનો ઉપયોગ કરીને તેમણે ૩૧ વ્યક્તિઓને ગેરકાયદેસર રીતે ૪૪ પ્લોટ વેચી દીધા હતા.

આ કૌભાંડમાં ત્રાકુડા ગામના કુલ ૪૪ પ્લોટનો સમાવેશ થાય છે. જેનું કુલ ક્ષેત્રફેળ આશરે ૬૨૬૦ ચોરસ મીટર છે. પ્રતિ ચોરસ મીટરનો અંદાજીત ભાવ ૧૧૦૦ ગણતાં તેની કુલ કિંમત આશરે ૭૦ લાખ થાય છે. તાલુકા વિકાસ અધિકારી, ગોંડલની લેખિત સુચના બાદ ત્રાકુડા ગામે નવા ગમતળની જમીનના પ્લોટોના વેચાણ બાબતે થયેલી ગેરરિતી અંગે ફોજદારી કાર્યવાહી હાથ ધરવામાં આવી હતી.

તા.૧૫-૦૭-૨૦૨૫ના રોજ ગ્રામ પંચાયત તપાસતા, ક્રમ નંબર૭૧૩થી ૭૪૪ સુધીની નોંધમાં મંજુરીના હુકમમાં અધિકારીનો હોદ્દો અને હુકમ નંબર લખેલા હતા. પરંતુતારીખ લખેલી ન હતી. તેમજ રેકોર્ડ ફાઈલમાં ગામ નમૂના આઉટ પ્લાન પણ નહોતો, જેનાં કારણે શંકા ઉપજી હતી.

આ બાબતે નાયબ જિલ્લા વિકાસ અધિકારી, જિલ્લા પંચાયત રાજકોટને તપાસવા પત્ર મોકલાયો હતો. તા.૧૯-૦૭-૨૦૨૫ના રોજ વડી કચેરીએ ગ્રામ પંચાયત ત્રાકુડાના રેકોર્ડની ચકાસણી કરતા સામે આવ્યું કે ત્રાકુડા ગામે સર્વે નંબર ૯૧ પૈકીની જમીનમાં ૨૦૦૮માં પ્રાંત અધિકારી ગોંડલ દ્વારા ૧૦૦ ચોરસ વાર મફત રહેણાંક હેતુ માટે પ્લોટ ફાળવવા કુલ ૫૦૦ ગુઠાનું નવુ ગામતળ નક્કી થયુ નવા ગામતળની જમીનમાં ૧૦૦ ચોરસ વાર મફત રહેણાંક હેતુના પ્લોટ માટેનો લે-આઉટ પ્લાન મંજુર કરાયો નહોતો.

તેમ છતાં, પૂર્વ તલાટી કમ મંત્રી ધર્મેશ હાપલીયાએ ગોંડલના તાલુકા વિકાસ અધિકારી અને સર્કલ ઈન્સ્પેકટર, તાલુકા પંચાયત ગોંડલની નબાવટી સહિઓ કરી તેમજ અધિકારી કર્મચારીના સ્ટેમ્પ અને કચેરીના રાઉન્ડ સીલ અનઅધિકૃત રીતે લગાવી તમામ વ્યક્તિઓ વેચી માર્યા હતા.