ઓસ્ટ્રેલિયાએ પ્રથમ ટી૨૦માં વિન્ડિઝને ૩ વિકેટથી હરાવ્યું

કિંગ્સ્ટન, જમૈકાના કિંગ્સ્ટનમાં રમાયેલી પ્રથમ ટી૨૦ મેચમાં ઓસ્ટ્રેલિયાએ વેસ્ટ ઈન્ડિઝને ત્રણ વિકેટથી હરાવ્યું હતું. વેસ્ટ ઈન્ડિઝે પહેલા બેટિંગ કરીને ૨૦ ઓવરમાં આઠ વિકેટ ગુમાવીને ૧૮૯ રન બનાવ્યા હતા. જવાબમાં, કેમેરોન ગ્રીન અને મિશેલ ઓવેનની અડધી સદીની મદદથી ઓસ્ટ્રેલિયાએ ૧૮.૫ ઓવરમાં જીત મેળવી લીધી હતી.

ઓવેનની આ આંતરરાષ્ટ્રીય ક્રિકેટમાં ડેબ્યૂ મેચ હતી. તેણે એક વિકેટ પણ લીધી હતી. આ જીત સાથે ઓસ્ટ્રેલિયાએ પાંચ મેચની ટી૨૦ શ્રેણીમાં વેસ્ટ ઈન્ડિઝ પર ૧-૦થી લીડ મેળવી લીધી છે. શ્રેણીની આગામી મેચ ૨૨ જુલાઈએ આ જ મેદાન પર રમાશે.

ઓવેને ૨૭ બોલમાં છ છગ્ગાની મદદથી ૫૦ રન બનાવ્યા હતા. તેણે કેમેરોન ગ્રીન સાથે પાંચમી વિકેટ માટે ૪૦ બોલમાં ૮૦ રનની ભાગીદારી કરતા ઓસ્ટ્રેલિયાને લક્ષ્ય પ્રાપ્ત કરવામાં મદદ મળી હતી. ગ્રીને ૨૬ બોલમાં બે ચોગ્ગા અને પાંચ છગ્ગાની મદદથી ૫૧ રન બનાવ્યા હતા.

ઓસ્ટ્રેલિયન ટીમે ૧૭ છગ્ગા અને ૬ ચોગ્ગાની સાથે ૧૨૬ રન તો બાઉન્ડ્રી ફટકારીને જ બનાવ્યા હતા. ૩-૦થી ટેસ્ટ શ્રેણી જીતીને ઓસ્ટ્રેલિયાએ પાંચ મેચની ટી-૨૦ શ્રેણીમાં પણ શરૂઆતમાં જ સરસાઈ મેળવી લીધી છે.વેસ્ટ ઈન્ડિઝની શરૂઆત સારી હતી, પરંતુ તે ૨૦૦ રનનો આંકડો પાર કરી શકી ન હતી કારણ કે તેણે છેલ્લા નવ બોલમાં પાંચ રનમાં ચાર વિકેટ ગુમાવી દીધી હતી.

ઓસ્ટ્રેલિયન ફાસ્ટ બોલર બેન દ્વારશુઈસે ૩૬ રનમાં ચાર વિકેટ લઈને પોતાના કરિયરનું શ્રેષ્ઠ પ્રદર્શન આપ્યું હતું. આ દરમિયાન તેણે ચાર બોલમાં ત્રણ વિકેટ લીધી. જોકે, જેસન હોલ્ડરે તેને હેટ્રિક લેવા દીધી નહીં, પરંતુ તે બીજા બોલ પર આઉટ થઈ ગયો હતો.SS1MS