અમેરિકાની ફાર્માસ્યુટિકલ ઉત્પાદનો પર ૨૫૦ ટકા ટેરિફ લાદવાની ધમકી

ભારત પર કુલ ૫૦ ટકા ટેરિફ લગાવ્યો-

(એજન્સી)વોશિંગ્ટન, અમેરિકાના રાષ્ટ્રપતિ ટ્રમ્પે ભારત પર ૨૫% વધારાની ટેરિફ લાદવાની જાહેરાત કરી છે. તેમણે ગુરુવારે આ સંબંધિત એક એક્ઝિક્યુટિવ ઓર્ડર પર હસ્તાક્ષર કર્યા હતા. આ ઓર્ડર ૨૭ ઓગસ્ટથી અમલમાં આવશે. અગાઉ, તેમણે ૩૦ જુલાઈના રોજ ૨૫% ટેરિફ લાદવાની જાહેરાત કરી હતી. અત્યાર સુધી, અમેરિકા દ્વારા ભારત પર કુલ ૫૦% ટેરિફ લાદવામાં આવશે.

ટ્રમ્પે રશિયન તેલ ખરીદવાને કારણે ભારત પર આ કાર્યવાહી કરી છે. તેમણે એક દિવસ પહેલા કહ્યું હતું કે ભારત રશિયન તેલ ખરીદીને યુક્રેન યુદ્ધ ચાલુ રાખવામાં રશિયાને મદદ કરી રહ્યું છે. આ કારણે, અમેરિકા ભારત પર કાર્યવાહી કરશે.

ટ્રમ્પે આજના એક્ઝિક્યુટિવ ઓર્ડરમાં લખ્યું છે – ભારત સરકાર રશિયા પાસેથી સીધી કે આડકતરી રીતે તેલ આયાત કરી રહી છે. આવી સ્થિતિમાં, અમેરિકામાં પ્રવેશતા ભારતીય માલ પર ૨૫% વધારાની ટેરિફ લાગુ થશે. આ ડ્‌યુટી ૨૧ દિવસ પછી લાગુ થશે.

જો કે, આ ટેરિફમાંથી મુક્તિ ચોક્કસ પરિસ્થિતિઓમાં પણ આપવામાં આવશે જેમ કે જો કોઈ માલ પહેલાથી જ સમુદ્રમાં લોડ થઈ ગયો હોય અને રસ્તામાં હોય, અથવા જો તે ચોક્કસ તારીખ પહેલા અમેરિકા પહોંચી ગયો હોય.

માર્ચ ૨૦૨૨ની શરૂઆતમાં, અમેરિકાએ એક આદેશ જારી કરીને તેના દેશમાં રશિયન તેલ અને સંબંધિત ઉત્પાદનોની આયાત પર સંપૂર્ણપણે પ્રતિબંધ મૂક્યો હતો. હવે ટ્રમ્પ વહીવટીતંત્રને જાણવા મળ્યું છે કે ભારત તે રશિયન તેલ ખરીદી રહ્યું છે, જે રશિયાને આર્થિક મદદ પૂરી પાડી રહ્યું છે. આ કારણે, હવે અમેરિકાએ ભારત પર આ નવો ટેરિફ લાદવાનો નિર્ણય લીધો છે.

અગાઉ, ટ્રમ્પે સોમવારે ભારત પર ‘વધુ ટેરિફ’ લાદવાની ધમકી આપી હતી, ત્યારબાદ ભારતે પહેલીવાર અમેરિકાનું નામ લઈને ખુલ્લેઆમ પ્રતિક્રિયા આપી હતી.
ડોનાલ્ડ ટ્રમ્પે સોમવારે સોશિયલ મીડિયા પર લખ્યું હતું કે ભારતને રશિયાના હુમલામાં કેટલા લોકો માર્યા જાય છે તેની પરવા નથી. તેથી, હું ભારત પર ટેરિફ વધારવા જઈ રહ્યો છું.

અમેરિકાના રાષ્ટ્રપતિ ડોનાલ્ડ ટ્રમ્પે ફાર્માસ્યુટિકલ ઉત્પાદનો પર ૨૫૦% ટેરિફ લાદવાની ધમકી આપી છે. ટ્રમ્પે સીએનબીસીને આપેલા ઇન્ટરવ્યુમાં કહ્યું હતું કે તેઓ શરૂઆતમાં ફાર્માસ્યુટિકલ્સ પર નાનો ટેરિફ લાદશે, પરંતુ પછી તેને એકથી દોઢ વર્ષમાં ૧૫૦% અને પછી ૨૫૦% સુધી વધારી દેશે.

ટ્રમ્પે કહ્યું કે અમે ઇચ્છીએ છીએ કે દવાઓ આપણા દેશમાં જ બને. તેમનું માનવું છે કે અમેરિકા ફાર્મા ઉત્પાદનો માટે વિદેશી દેશો પર ખૂબ નિર્ભર છે, ખાસ કરીને ભારત અને ચીન. આ ટેરિફ ભારતીય ફાર્મા ક્ષેત્ર પર ખરાબ અસર કરી શકે છે.

અમેરિકા ભારત પાસેથી જેનેરિક દવાઓ, રસીઓ અને સક્રિય ઘટકો ખરીદે છે. ૨૦૨૫માં ભારતની અમેરિકામાં ફાર્માસ્યુટિકલ નિકાસ ૨૦૨૫માં ૭.૫ અબજ ડોલર (લગભગ ૬૫ હજાર કરોડ રૂપિયા)થી વધુ હતી. યુએસ ફૂડ એન્ડ ડ્રગ એડમિનિસ્ટ્રેશન અનુસાર, યુએસમાં વપરાતી તમામ જેનેરિક દવાઓમાંથી લગભગ ૪૦% ભારતમાંથી આવે છે.