કોઈ પણ શક્તિ ભારતને મોટી તાકાત બનતા રોકી નહીં શકેઃ રાજનાથ સિંહ
(એજન્સી) ભોપાલ, સંરક્ષણ મંત્રી રાજનાથ સિંહે નામ લીધા વિના ટ્રમ્પ પર નિશાન સાધ્યું. તેમણે કહ્યું કે કેટલાક લોકો એવા છે જે ભારતના વિકાસથી ખુશ નથી. તેમને ગમતું નથી કે ભારત વિકાસ કરી રહ્યું છે.
તેમને લાગે છે કે ‘આપણે બધાના બોસ છીએ’, તો પછી ભારત આટલી ઝડપથી કેવી રીતે વિકાસ કરી રહ્યું છે? રાજનાથ સિંહે કહ્યું કે ઘણા લોકો ભારતમાં બનેલી વસ્તુઓને તેમના દેશોમાં બનેલી વસ્તુઓ કરતાં વધુ મોંઘી બનાવવાનો પ્રયાસ કરી રહ્યા છે, જેથી વધુ લોકો તેને ખરીદી ન શકે.
સંરક્ષણ મંત્રીએ કહ્યું કે મને સંપૂર્ણ વિશ્વાસ છે કે આ બધું હોવા છતાં, ભારત એટલી ઝડપથી પ્રગતિ કરી રહ્યું છે કે હવે વિશ્વની કોઈ પણ શક્તિ ભારતને વિશ્વની મહાસત્તા બનતા રોકી શકશે નહીં.
રક્ષા મંત્રીએ કહ્યું કે પહેલા સંરક્ષણ ક્ષેત્રની મોટાભાગની વસ્તુઓ વિદેશમાં બનતી હતી અને તેમની મૂડીનો પણ ઉપયોગ થતો હતો. જ્યારે પણ આપણને તેની જરૂર પડતી ત્યારે આપણે તેને વિશ્વના અન્ય દેશોમાંથી ખરીદતા હતા. આમાં વિમાન, શસ્ત્રો અથવા પ્લેટફોર્મ જેવી વસ્તુઓનો સમાવેશ થાય છે. તેમણે લોકોને કહ્યું કે હવે આમાંની મોટાભાગની વસ્તુઓ ફક્ત ભારતમાં જ નહીં પરંતુ ભારતીયો પોતાના હાથે બનાવી રહ્યા છે અને તે વસ્તુઓ હવે અન્ય દેશોમાં નિકાસ થઈ રહી છે.
રાયસેનમાં રેલ કોચ ફેક્ટરી ‘બ્રહ્મા’ના શિલાન્યાસ કાર્યક્રમમાં રાજનાથ સિંહે જણાવ્યું કે આવનારા સમયમાં મધ્યપ્રદેશ ‘મોડર્ન પ્રદેશ’ તરીકે ઓળખાશે. તેમણે ઉમેર્યું કે આ નવું ઔદ્યોગિક કેન્દ્ર મધ્યપ્રદેશને નવી ઊંચાઈઓ પર લઈ જશે અને રાજ્યના આર્થિક વિકાસમાં મહત્વની ભૂમિકા ભજવશે.
