ખાતર વેચાણના ખોટા બિલ મળ્યા 54 કેન્દ્રો પર: ખેતી નિયામક કચેરીની તપાસ

સાબરકાંઠા જિલ્લાના વડાલીમાં આવેલી મહેતા ઓટોમોબાઈલ્સ નામની પેઢી પર ખેતી વિભાગની ટીમ ત્રાટકી- અનરજિસ્ટર્ડ ૧૧૦૦થી વધુ ખાતરની બેગો મળી આવી હતી

ગુજરાતમાં સબસિડીવાળા ખાતર બારોબાર વેચવાનું કૌભાંડ

તલોદ, ગુજરાતમાં સબસિડીવાળા ખાતરનું કૌભાંડ સામે આવ્યું છે જેના કારણે ખેડૂતોને નુકસાન થયું છે. આ મામલે સાબરકાંઠા જિલ્લાના વડાલીમાં આવેલી મહેતા ઓટોમોબાઈલ્સ નામની પેઢી પર ખેતી વિભાગની ટીમ ત્રાટકી હતી અને અનરજિસ્ટર્ડ ૧૧૦૦થી વધુ ખાતરની બેગો મળી આવી હતી

જે બાદ આ પેઢી સામે ખેતી વિભાગે પોલીસમા અરજી આપી હતી જે બાદ વડાલી પોલીસે પેઢી સામે તપાસ તેજ કરી હોવાનું જાણવા મળે છે. આ કંપની પર સરકારી સબસિડીવાળું ખાતર બારોબાર વેચીને કરોડો રૂપિયાનો નફો કમાવાનો આરોપ મૂકાયો છે.

આ કૌભાંડની વિગતો ત્યારે બહાર આવી જયારે રાજયમાં સબસિડીવાળા ખાતરની અછત સર્જાઈ અને ખેડૂતોને ખરીદીમાં ભારે મુશ્કેલી પડી આ પરિસ્થિતિને ધ્યાનમાં રાખીને સરકારી ખેતી વિભાગ દ્વારા રાજયભરમાં અલગ-અલગ સ્થળો પર રેડ પાડવામાં આવી હતી.

આ રેડ દરમિયાન ઘણા વેપારીઓ દ્વારા ખાતરના બ્લેક માર્કેટિંગનો ખુલાસો થયો હતો. ખેતી નિયામક કચેરીએ કુલ ર૧૪ કેન્દ્રોના સંચાલકોને કારણદર્શક નોટિસો મોકલી હતી. તપાસ દરમિયાન ચોંકાવનારા તથ્યો સામે આવ્યા છે જેમાં પ૪ કેન્દ્રો પર ખાતરના વેચાણના બિલ જ નહોતા અથવા તો ખોટા બિલ બનાવવામાં આવ્યા હતા. ૧૩૮ કેન્દ્રોના સ્ટોક રજિસ્ટરમાં મોટી ગરબડી મળી આવી.

૧૧૭ કેન્દ્રો પર સ્ટોક રજિસ્ટર અને પી.ઓ.એસ. મશીનનો સ્ટોક મેચ નહોતો થયો. ૧૧૯ કેન્દ્રોના રજિસ્ટરમાં નોંધાયેલી ખાતરની થેલીઓ ગાયબ હતી. ૧૦૧ સંચાલકોએ તો તેમના ગોડાઉન ક્યાં છે તેની જાણકારી તપાસ ટીમને આપી નહોતી. અત્યાર સુધીમાં રાજયના ૧૮ જિલ્લાઓમાં કુલ ૯૦૪ કેન્દ્રોની તપાસ પૂર્ણ થઈ છે.

આ કૌભાંડથી એ સ્પષ્ટ થાય છે કે કેટલાક વેપારીઓ ખેડૂતોને મળતી સબસિડીવાળા ખાતરનો ગેરકાયદેસર વેપાર કરીને લાભ ઉઠાવી રહ્યા છે જેના કારણે ખેડૂતોને તકલીફ વેઠવી પડી રહી છે. આ મામલે પોલીસ અને ખેતી વિભાગ દ્વારા વધુ કડક કાર્યવાહી કરવામાં આવે તેવું ખેડૂતો ઈચ્છી રહ્યા છે.