પૂર્વ કોન્ટ્રાક્ટ કર્મચારીએ ગુજરાત યુનિવર્સિટી ઓફિસમાં તોડફોડ કરી

ગુજરાત યુનિવર્સિટીમાં પૂર્વ કોન્ટ્રાક્ટ કર્મચારીએ મચાવ્યો આતંક

(એજન્સી)અમદાવાદ, ગુજરાત યુનિવર્સિટીના બોટની વિભાગમાં સોમવારે બપોરે ભારે તણાવનો માહોલ સર્જાયો હતો. યુનિવર્સિટીના પૂર્વ કોન્ટ્રાક્ટ કર્મચારીએ કથિત રીતે ઓફિસમાં તોડફોડ કરી હતી અને બહાર પાર્ક કરેલા વાહનોને પણ નુકસાન પહોંચાડ્‌યું હતું.

યુનિવર્સિટી કેમ્પસમાં સઘન સુરક્ષા વ્યવસ્થા હોવા છતાં આરોપીએ અંદર ઘૂસીને ઓફિસના ફર્નિચરની તોડફોડ કરી હતી. અધિકારીઓના જણાવ્યા મુજબ, તેણે બહાર પાર્ક કરેલી ગાડીના કાચ પણ તોડી નાખ્યા હતા. આરોપીની ઓળખ તેજસ પટેલ તરીકે થઈ છે, જેણે આશરે ચાર-પાંચ વર્ષ પહેલાં બોટની વિભાગમાં કોન્ટ્રાક્ટ પર કામ કર્યું હતું. તેને કથિત રીતે એક હેરાનગતિના કેસને કારણે નોકરી પરથી દૂર કરવામાં આવ્યો હતો.

યુનિવર્સિટીના સૂત્રોએ જણાવ્યું કે, નોકરીમાંથી છૂટા કરાયા બાદથી તેજસ પટેલ રોષે ભરાયેલો હતો. એક અધિકારીએ જણાવ્યું, ‘આરોપીએ પરિસરમાં પ્રવેશ કરીને ફર્નિચર તોડીને અને સ્ટાફની કારને નુકસાન પહોંચાડીને અરાજકતા ફેલાવી હતી.

સુરક્ષા કર્મચારીઓએ તેને રોકવાનો પ્રયાસ કર્યો, પરંતુ તે ભાગવામાં સફળ રહ્યો હતો.’ ઘટના બાદ પોલીસને જાણ કરવામાં આવી હતી અને હાલ ફરિયાદ નોંધવાની પ્રક્રિયા ચાલી રહી છે. દરમિયાન, યુનિવર્સિટી પ્રશાસને આવી ઘટના ફરી ન બને તે માટે વિભાગની આસપાસ સુરક્ષા વધારી દીધી છે.

આ ઘટનાને કારણે વિદ્યાર્થીઓ અને સ્ટાફમાં કેમ્પસની સુરક્ષા અંગે ચિંતા વધી છે. અધિકારીઓએ જણાવ્યું કે સુરક્ષામાં રહેલી ખામીઓ અને થયેલા નુકસાનનો અંદાજ કાઢવા માટે આંતરિક તપાસ શરૂ કરવામાં આવી છે.