વિશાલા સર્કલ પાસે દારૂના નશામાં ચૂર પોલીસકર્મીની કારે રિક્ષાને ટક્કર મારી

અમદાવાદ , વિશાલા સર્કલ નજીક ગઇ મોડી રાતે કાર અને રિક્ષા વચ્ચે અકસ્માત થયો હતો. કારચાલકે પૂરઝડપે આવીને રિક્ષાને ટક્કર મારતા રિક્ષા પલટી જતા રિક્ષાચાલક ઘાયલ થયો હતો. તેને હોસ્પિટલમાં ખસેડવામાં આવ્યો હતો. અકસ્માત બાદ લોકોનું ટોળું ભેગું થતાં કાર ચાલકને ઝડપીને પોલીસને સોંપવામાં આવ્યો હતો. કારચાલક પોલીસકર્મી હોવાનું જણાયું છે.

કારચાલક પણ નશાની હાલતમાં હતો. કારમાંથી બીયરની બોટલ પણ મળી આવી હતી. આ મામલે એમ ડિવિઝન ટ્રાફિક પોલીસે ગુનો નોંધી તપાસ હાથ ધરી છે.વિશાલા સર્કલ પાસે સિટીગેટ બિલ્ડિંગની સામે બરફની ફેક્ટરી નજીક એક કારચાલકે પૂર ઝડપે આવીને રિક્ષાચાલકને ટક્કર મારી હતી જેથી રિક્ષા પલટી ખાઈને પડી ગઈ હતી. રિક્ષાચાલક ઈજાગ્રસ્ત થઈને બેભાન થઈ ગયા હતા.

આસપાસના લોકોએ ભેગા થઈને રિક્ષાચાલકને ૧૦૮ દ્વારા સારવાર માટે સિવિલ હોસ્પિટલ મોકલ્યો હતો. કારચાલકને પકડીને પોલીસને સોંપવામાં આવ્યો હતો. પોલીસે સ્થળ પર પહોંચી તપાસ હાથ ધરી હતી.

પોલીસ તપાસ દરમિયાન અકસ્માત કરનાર પોલીસકર્મી પ્રકાશ રબારી હોવાનું સામે આવ્યું હતું, જે વટવા પોલીસ સ્ટેશનમાં ફરજ બજાવે છે. અકસ્માત કરનાર પોલીસકર્મીની ગાડીમાંથી પોલીસની વર્દી, બીયરની બોટલ અને નંબર પ્લેટ મળી આવી હતી.

પોલીસકર્મી દારૂ પીધેલી હાલતમાં હોવાનું આસપાસના લોકોએ આક્ષેપ કર્યાે હતો. એમ ડિવિઝન ટ્રાફિક પોલીસે સમગ્ર મામલે અકસ્માત કરનાર પોલીસકર્મી વિરુદ્ધ ગુનો નોંધ્યો છે. પોલીસકર્મી દારૂ પીધેલી હાલતમાં હતો કે કેમ તે મામલે પણ પોલીસકર્મીનો બ્લડ રિપોર્ટ લઈને તપાસ કરવામાં આવી રહી છે.SS1MS