પહેલા દિવસે LG ઈલેક્ટ્રોનિક્સના શેરમાં 50%થી વધુનો ઉછાળો
નવી દિલ્હી, LG ઈલેક્ટ્રોનિક્સ ઈન્ડિયાના શેરોએ મંગળવારે ટ્રેડિંગની શરૂઆત થતાંની સાથે જ ૫૦.૪ ટકાનો જબરજસ્ત ઉછાળો નોંધાવ્યો હતો. આ ઉછાળા સાથે કંપનીનું મૂલ્યાંકન $૧૩.૦૭ બિલિયન (અંદાજે રૂ. ૧.૧૫ લાખ કરોડ) પર પહોંચી ગયું છે, જે તેની દક્ષિણ કોરિયાની મૂળ કંપની (પેરન્ટ કંપની)ના લગભગ $૧૦ બિલિયન (રૂ. ૮,૮૦૦ કરોડ)ના માર્કેટ કેપિટલાઇઝેશનને પણ વટાવી ગયું છે.
આ ભારે ઉછાળો દર્શાવે છે કે આઈપીઓ (IPO)માં રોકાણકારોએ આક્રમક રીતે નાણાંનું રોકાણ કર્યું છે, જે તેને ૨૦૦૮ પછીના દેશના સૌથી વધુ માંગ ધરાવતા IPO તરીકે ચિહ્નિત કરે છે.
નેશનલ સ્ટોક એક્સચેન્જ (NSE) પર શેરનો ભાવ ઈશ્યૂ પ્રાઈસ રૂ. ૧,૧૪૦ ની સામે રૂ. ૧,૭૧૦.૧૦ પર ખૂલ્યો હતો અને રૂ. ૧,૭૪૯ની ઊંચી સપાટીને સ્પર્શ્યો હતો. બપોરે ૧૨.૦૮ વાગ્યા સુધીમાં, શેર NSE પર રૂ. ૧,૬૯૫ પર ટ્રેડ થઈ રહ્યો હતો.
ઈશ્યૂ પ્રાઇસ પરનું આ પ્રીમિયમ દર્શાવે છે કે LG ઈલેક્ટ્રોનિક્સ ઈન્ડિયા એ ૨૦૨૧માં ઈટર્નલ બાદ અબજ ડોલરના IPO માટેનું શ્રેષ્ઠ સ્ટોક માર્કેટ ડેબ્યુ છે. આ મજબૂત શરૂઆત, કંપનીના વ્યાપક વિતરણ નેટવર્ક અને પ્રીમિયમ બ્રાન્ડ પોઝિશનિંગમાં રોકાણકારોના વિશ્વાસને રેખાંકિત કરે છે.
બ્રોકરેજ ફર્મ પ્રભુદાસ લીલાધરે આ સ્ટોકને “ખરીદવા” (Buy) નું રેટિંગ આપીને રૂ. ૧,૭૮૦નો ભાવ લક્ષ્યાંક (Price Target) નક્કી કર્યો હતો.
અન્ય બ્રોકિંગ ફર્મ મોતીલાલ ઓસ્વાલ ફાઇનાન્સિયલ સર્વિસીસે પણ “ખરીદવા” નું રેટિંગ આપીને રૂ. ૧,૮૦૦ નો લક્ષ્યાંક ભાવ આપ્યો હતો. મોતીલાલ ઓસ્વાલ ફાઇનાન્સિયલ સર્વિસીસે જણાવ્યું હતું કે, “અમે અપેક્ષા રાખીએ છીએ કે LGEIL (LG ઈલેક્ટ્રોનિક્સ ઈન્ડિયા) ઊંચા મલ્ટીપલ્સ પર ટ્રેડ કરશે, કારણ કે તેના મજબૂત રિટર્ન રેશિયો, ઊંચું OCF કન્વર્ઝન, સ્થાનિકીકરણ પર વ્યૂહાત્મક ફોકસ, ઉચ્ચ-માર્જિન B2B અને AMC આવક પર લક્ષિત વૃદ્ધિ અને મુખ્ય પ્રોડક્ટ કેટેગરીઝમાં નેતૃત્વની સ્થિતિ છે.”
નિષ્ણાતોના મતે, ભારતનું હોમ એપ્લાયન્સિસ અને કન્ઝ્યુમર ઇલેક્ટ્રોનિક્સ માર્કેટ (મોબાઇલ ફોન સિવાય) CY24-29 દરમિયાન ૧૪ ટકાના CAGR (વાર્ષિક સંયુક્ત વૃદ્ધિ દર)થી વધવાનો અંદાજ છે.
બ્રોકરેજે ઉમેર્યું, “LG ઈલેક્ટ્રોનિક્સ ઈન્ડિયા (LGEIL), મુખ્ય પ્રોડક્ટ કેટેગરીઝમાં તેના નેતૃત્વને કારણે, આ વૃદ્ધિની તકનો લાભ લેવા માટે સારી સ્થિતિમાં છે.”
જોકે, LG ઈલેક્ટ્રોનિક્સે એક નિયમનકારી ફાઇલિંગમાં જણાવ્યું હતું કે સપ્ટેમ્બરમાં પૂરા થયેલા ત્રણ મહિના માટે ઓપરેટિંગ પ્રોફિટ અંદાજિત ૬૮૮.૯ બિલિયન વોન ($૪૮૨.૬ મિલિયન) રહ્યો, જે ગયા વર્ષના સમાન સમયગાળા કરતાં ૮.૪ ટકા ઓછો હતો.
