ઉસ્માનપુરા અંડરપાસ પાસે ડ્રેનેજમાં પડી જતા યુવકનું મૃત્યુ
મ્યુનિ.કોર્પોરેશન દ્વારા રી-હેબની કામગીરી કરવામાં આવતી હતી
(પ્રતિનિધિ) અમદાવાદ, અમદાવાદના ઉસ્માનપુરા અંડર પાસ પાસે મ્યુનિસિપલ કોર્પોરેશન દ્વારા ગટર લાઈનના રિહેબની કામગીરી ચાલી રહી છે. ગટરની આસપાસ પતરાની આડાશ મૂકી અને કામગીરી કરવામાં આવી રહી છે ત્યારે ગટરમાં એક યુવકનું પડી જતા મૃત્યુ થયું છે.
ફાયર બ્રિગેડની ટીમને જાણ કરવામાં આવતા ફાયરની ટીમ દ્વારા યુવકની લાશને બહાર કાઢવામાં આવી છે. સ્થાનિક પોલીસને જાણ કરવામાં આવતા પોલીસ પણ ઘટના સ્થળે પહોંચી છે. હાલ યુવકના મૃતદેહને બહાર કાઢીને પોસ્ટમોર્ટમ અર્થે મોકલવાની કાર્યવાહી કરવામાં આવી રહી છે. સ્થાનિક સૂત્રો પાસેથી મળતી માહિતી મુજબ ગટર લાઈનની સફાઈ કામગીરી કરતો હતો તે દરમિયાનમાં ગટરમાં પડી ગયો હતો.
મ્યુનિસિપલ કોર્પોરેશનના ડ્રેનેજ પ્રોજેક્ટ વિભાગના અધિકારીના જણાવ્યા મુજબ ઉસ્માનપુરા અંડરપાસ ખાતે ડ્રેનેજ પ્રોજેક્ટની કામગીરી ચાલી રહી છે. ગટરના રિહેબિલિટેશનની કામગીરી રાત્રે ચાલતી હતી. જે કામગીરી દિવસે બંધ હતી. રિહેબના પીટમાં તેઓના કામમાં દિવસે કામ કરતી કોન્ટ્રાક્ટ એજન્સીનો દેખરેખ રાખી રહેલો યુવક અકસ્માતે પડી જતા મોત થયું હોવાનું સામે આવ્યું છે.
કેપિટલ એન્જિનિયરિંગ નામની કંપનીને ગટર રીહેબિલિટેશનની કામગીરી સોંપવામાં આવી છે. દિવસ દરમિયાન બેથી ત્રણ માણસો જગ્યા પર ધ્યાન રાખવા માટે મૂકવામાં આવતા હોય છે ત્યારે સવારથી યુવક ગુમ થયો હતો
જે અંગેની ફરિયાદ કરવામાં આવી હતી અને ત્યારબાદ ગટરમાં પડી ગયો હોવાની શંકાના આધારે પોલીસને અને ફાયરને જાણ કરવામાં આવતા ગટરમાં તપાસ કરતા યુવકનું મૃતદેહ મળી આવ્યો હતો. મૃતક મૂળ ઉત્તર પ્રદેશનો રહેવાસી છે અને તેનું નામ અભિષેક હોવાનું જાણવા મળ્યું છે. હાલ આ સમગ્ર મામલે વધુ તપાસ ચાલુ છે.
