ઇન્ડિયા પોસ્ટ અમેરિકા માટે તમામ ટપાલ સેવાઓ ફરીવાર શરૂ કરશે

પત્રો, પાર્સલ અને એક્સપ્રેસ કન્સાઈનમેન્ટ્‌સ સહિતની સેવાઓ  ૧૫ ઓક્ટોબરથી ફરી શરૂ થશે

(એજન્સી)નવી દિલ્હી, ઈન્ડિયા પોસ્ટ અમેરિકા માટે તમામ કેટેગરીની ટપાલ સેવાઓ ફરી શરૂ કરવા જઈ રહ્યું છે. ડિપાર્ટમેન્ટ ઓફ પોસ્ટે આ અંગે માહિતી આપી હતી કે, લોજિસ્ટિકલ પડકારો અને એર મેઈલ સંચાલનમાં ખામી સર્જાતાં અમેરિકામાં સસ્પેન્ડ કરવામાં આવેલી પત્રો, પાર્સલ અને એક્સપ્રેસ કન્સાઈનમેન્ટ્‌સ સહિતની સેવાઓ ૧૫ ઓક્ટોબર, ૨૦૨૫થી ફરી શરૂ થશે.

ભારત અને અમેરિકા વચ્ચે ફ્લાઈટની મર્યાદાઓ અને સંચાલનમાં પડકારો નડતાં ઘણા મહિનાઓથી બંધ પડેલી ટપાલ સેવાઓ ફરી શરૂ થતાં ગ્રાહકોને ખાનગી કરતાં નીચા દરે પાર્સલ સહિતની ટપાલ સેવાઓનો લાભ મળશે. તમામ કેટેગરીના મેઈલ અને પાર્સલ ફરી એકવાર ઈન્ડિયા પોસ્ટ મારફત અમેરિકા મોકલી શકાશે.

યુએસ વહીવટીતંત્ર દ્વારા જાહેર કરાયેલા એÂક્ઝક્્યુટિવ ઓર્ડર ૧૪૩૨૪ને અનુસરતાં ૨૨ ઓગસ્ટ ૨૦૨૫ના રોજ ઓફિસ મેમોરેન્ડમ દ્વારા અમેરિકા માટે ટપાલ સેવાઓ સ્થગિત કરવામાં આવી હતી. જેણે તમામ પોસ્ટલ શિપમેન્ટ માટે ડી મિનિમિસ ટ્રીટમેન્ટ સ્થગિત કરી હતી. આયાત જકાતના સંગ્રહ અને રેમિટન્સ માટે યુ.એસ. કસ્ટમ્સ એન્ડ બોર્ડર પ્રોટેક્શન દ્વારા રજૂ કરાયેલી નવી નિયમનકારી આવશ્યકતાઓને કારણે આ સસ્પેન્શન જરૂરી બન્યું હતું.

સીબીપી-મંજૂર લાયક પક્ષો સાથે સંકલન તથા દિલ્હી અને મહારાષ્ટ્ર સર્કલમાં સફળ ઓપરેશનલ ટ્રાયલ બાદ ઇન્ડિયા પોસ્ટે હવે ડિલિવરી ડ્યુટી પેઇડ પ્રક્રિયા માટે એક અનુપાલન પદ્ધતિ સ્થાપિત કરી છે.

આ નવી વ્યવસ્થા હેઠળ, યુએસએમાં શિપમેન્ટ પર લાગુ થતી તમામ કસ્ટમ્સ ડ્યુટી બુકિંગ સમયે ભારતમાં અગાઉથી વસૂલવામાં આવશે અને માન્ય લાયક પક્ષો દ્વારા સીધી સીબીપીને મોકલવામાં આવશે. આ સંપૂર્ણ નિયમનકારી પાલન, ઝડપી કસ્ટમ્સ ક્લિયરન્સ અને કોઈપણ વધારાની ડ્યુટી અથવા વિલંબ વિના યુએસએમાં સરનામાંઓને સીમલેસ ડિલિવરી સુનિશ્ચિત કરે છે.

સીબીપી માર્ગદર્શિકા અનુસાર, ભારતથી અમેરિકામાં પોસ્ટલ શિપમેન્ટ પર કસ્ટમ્સ ડ્યુટી આંતરરાષ્ટ્રીય ઇમરજન્સી ઇકોનોમિક પાવર્સ એક્ટ ટેરિફ (મૂળ દેશ ભારત સાથે) હેઠળ જાહેર કરાયેલ એફઓબી મૂલ્યના ૫૦%ના ફ્લેટ દરે લાગુ પડે છે. કુરિયર અથવા કોમર્શિયલ કન્સાઇન્મેન્ટથી વિપરીત પોસ્ટલ વસ્તુઓ પર કોઈ વધારાની બેઝ અથવા ઉત્પાદન-વિશિષ્ટ ડ્યુટી લાદવામાં આવતી નથી.

આ અનુકૂળ ડ્યુટી માળખું નિકાસકારો માટે એકંદર ખર્ચ બોજને નોંધપાત્ર રીતે ઘટાડે છે, જે પોસ્ટલ ચેનલને સ્જીસ્ઈ, કારીગરો, નાના વેપારીઓ અને ઈ-કોમર્સ નિકાસકારો માટે વધુ સસ્તું અને સ્પર્ધાત્મક લોજિસ્ટિક્સ વિકલ્પ બનાવે છે.