4081 કરોડના ખર્ચે અદાણી 12.9 કિમી લાંબો સોનપ્રયાગ-કેદારનાથ રોપવે બનાવશે
કેદારનાથ ધામ: ૯ કલાકના પગપાળા મુસાફરીનો સમય માત્ર ૩૬ મિનિટમાં ઘટાડતો રોપ-વે તૈયાર કરાશે
केदारनाथ धाम की कठिन चढ़ाई अब आसान होगी।
अदाणी समूह श्रद्धालुओं की यात्रा को सरल और सुरक्षित बनाने के लिए यह रोपवे बना रहा है।इस पुण्य कार्य का हिस्सा बनना हमारे लिए गर्व की बात है।
महादेव सब पर अपनी कृपा बनाए रखें।जय बाबा केदारनाथ!#Adani pic.twitter.com/9f3VIGAWt6
— Gautam Adani (@gautam_adani) October 15, 2025
નવી દિલ્હી, તીર્થયાત્રીઓને કેદારનાથ ધામના દર્શન માટે સરળ અને ઝડપી પ્રવેશ મળી રહે તે માટે અદાણી ગ્રુપ દ્વારા રોપ-વેનું નિર્માણ કરવામાં આવી રહ્યું છે, તેમ ચેરમેન ગૌતમ અદાણીએ બુધવારે જણાવ્યું હતું.
આ રોપ-વે સોનપ્રયાગને કેદારનાથ સાથે જોડશે અને તેનું કુલ રોકાણ રૂ. ૪,૦૮૧ કરોડ છે. એકવાર કાર્યરત થયા પછી, ૧૨.૯ કિલોમીટરનો આ રોપ-વે પ્રોજેક્ટ મુશ્કેલ ૯-કલાકના પગપાળા ચઢાણના સમયને ઘટાડીને માત્ર ૩૬ મિનિટ કરી દેશે, જેનાથી યાત્રા ઘણી સરળ અને સુરક્ષિત બનશે.
ગૌતમ અદાણીએ સોશિયલ મીડિયા પ્લેટફોર્મ X પરની પોસ્ટમાં જણાવ્યું:
“કેદારનાથ ધામનો મુશ્કેલ ચઢાણ હવે સરળ બનશે. અદાણી ગ્રુપ શ્રદ્ધાળુઓ માટે આ યાત્રાને સરળ અને સુરક્ષિત બનાવવા માટે આ રોપ-વેનું નિર્માણ કરી રહ્યું છે.”
તેમણે ઉમેર્યું, “આ પવિત્ર કાર્યમાં ભાગ લેવો અમારા માટે ગર્વની વાત છે. મહાદેવની કૃપા હંમેશા સૌ પર બની રહે. જય બાબા કેદારનાથ!”
રોપ-વે પ્રોજેક્ટની મુખ્ય વિગતો
અદાણી એન્ટરપ્રાઈઝિસ લિમિટેડ (AEL) ને સપ્ટેમ્બરમાં નેશનલ હાઈવેઝ લોજિસ્ટિક્સ મેનેજમેન્ટ લિમિટેડ (NHLML) તરફથી આ પ્રતિષ્ઠિત રોપ-વે પ્રોજેક્ટના નિર્માણ માટે લેટર ઑફ અવૉર્ડ (LoA) પ્રાપ્ત થયો હતો.
- આ કંપનીનો પ્રથમ રોપ-વે પ્રોજેક્ટ છે અને તે છ વર્ષમાં પૂર્ણ થવાની અપેક્ષા છે.
- તેનું અમલ AELના રોડ્સ, મેટ્રો, રેલ અને વોટર (RMRW) ડિવિઝન દ્વારા કરવામાં આવશે.
- આ રોપ-વે પ્રતિ કલાક, પ્રતિ દિશામાં ૧,૮૦૦ મુસાફરો વહન કરવાની ક્ષમતા ધરાવશે, જે દર વર્ષે લાખો શ્રદ્ધાળુઓને સેવા આપશે.
- આ રોપ-વે રાષ્ટ્રીય રોપ-વે વિકાસ કાર્યક્રમ – પર્વતમાલા પરિયોજનાનો એક ભાગ છે.
આ પ્રોજેક્ટ પબ્લિક-પ્રાઇવેટ પાર્ટનરશિપ (PPP) ધોરણે વિકસાવવામાં આવશે. તે પૂર્ણ થતાં છ વર્ષ લાગશે, અને બાંધકામ પછી AEL દ્વારા તેનું સંચાલન ૨૯ વર્ષ સુધી કરવામાં આવશે.
કનેક્ટિવિટી સુધારવા સાથે, આ પ્રોજેક્ટથી પ્રદેશમાં રોજગાર સર્જન અને પર્યટનને પણ વેગ મળવાની અપેક્ષા છે.
ગૌતમ અદાણીએ અગાઉ આ પ્રોજેક્ટને “ભક્તિ અને આધુનિક ઇન્ફ્રાસ્ટ્રક્ચર વચ્ચેનો સેતુ” ગણાવ્યો હતો. તેમણે કહ્યું, “આ પવિત્ર યાત્રાને સુરક્ષિત, ઝડપી અને વધુ સુલભ બનાવીને, અમે લાખો લોકોની આસ્થાનું સન્માન કરીએ છીએ, સાથે જ NHLML અને ઉત્તરાખંડ સરકાર સાથેની અમારી ભાગીદારી દ્વારા ઉત્તરાખંડના લોકો માટે નવી તકો ઊભી કરી રહ્યા છીએ. આ પ્રતિષ્ઠિત પ્રોજેક્ટ રાષ્ટ્રની સેવા કરવા સાથે તેના લોકોનો ઉત્કર્ષ કરવાની અમારી પ્રતિબદ્ધતા દર્શાવે છે.”
વિશ્વના સૌથી લાંબા રોપ-વેની વાત કરીએ તો, બોલિવિયાના લા પાઝ/એલ અલ્ટો શહેરમાં આવેલું ‘મી ટેલિફેરિકો’ નેટવર્ક વિશ્વનું સૌથી લાંબુ અને સૌથી ઊંચું અર્બન કેબલ કાર નેટવર્ક છે. આ નેટવર્ક કુલ ૧૧ લાઇન ધરાવે છે અને તેની લંબાઈ આશરે ૩૦.૫ કિલોમીટર છે. આ પ્રોજેક્ટનું અંદાજિત ખર્ચ (પ્રારંભિક લાઇન માટે) $૨૩૪ મિલિયન થયું હતું.
હાલમાં, આ યાદીમાં બીજા ક્રમે સ્વીડનના મેન્સ્ટ્રેસ્ક–બ્યુરફોર્સમાં આવેલો નોર્સ્જો એરિયલ ટ્રામવે છે, જે ૧૩.૨ કિલોમીટર (૮.૨ માઇલ)ની લંબાઇ સાથે હાલમાં કાર્યરત સૌથી લાંબો પેસેન્જર એરિયલ ટ્રામવે છે.
