૩૦૦૦ કરોડથી વધુનું દાન આપ્યું ભક્તોએ અત્યાર સુધીમાં રામ મંદિરના નિર્માણ માટે

મંદિર સંકુલમાં બાકી રહેલા ચાલુ કાર્ય સહિત કુલ ખર્ચ આશરે રૂ.૧,૮૦૦ કરોડ હોવાનો અંદાજ છે.-અત્યાર સુધી ૧૫૦૦ કરોડ રૂપિયાનો બાંધકામ ખર્ચ થયો -રામ જન્મભૂમિ સંકુલમાં ૨૫ નવેમ્બરના રોજ યોજાનાર ધ્વજારોહન સમારોહની તૈયારીઓ તેજ થઈ ગઈ છે

અયોધ્યા,  તાજેતરમાં, શ્રી રામ જન્મભૂમિ તીર્થ ક્ષેત્ર ટ્રસ્ટે જાહેરાત કરી છે કે, ભગવાન શ્રી રામના ભવ્ય મંદિરનું નિર્માણ સંપૂર્ણપણે પૂર્ણ થઈ ગયું છે. મુખ્ય મંદિરની સાથે, ભગવાન શિવ, ભગવાન ગણેશ, ભગવાન હનુમાન, સૂર્યદેવ, દેવી ભગવતી અને દેવી અન્નપૂર્ણાના મંદિરો પણ તૈયાર થઈ ગયા છે.

આ બધા મંદિરોમાં ધ્વજસ્તંભ અને કળશ સ્થાપિત કરવામાં આવ્યા છે. આ સાથે, રામ જન્મભૂમિ સંકુલમાં ૨૫ નવેમ્બરના રોજ યોજાનાર ધ્વજારોહન સમારોહની તૈયારીઓ તેજ થઈ ગઈ છે. મંદિર નિર્માણ પૂર્ણ થવાના પ્રસંગે શ્રી રામ જન્મભૂમિ તીર્થ ક્ષેત્ર ટ્રસ્ટ દ્વારા આયોજિત ભવ્ય ઉજવણીમાં વડાપ્રધાન નરેન્દ્ર મોદીને આમંત્રણ આપવામાં આવ્યું છે.

આ દરમિયાન, રામ મંદિરના નિર્માણ અંગે મહત્વપૂર્ણ સમાચાર સામે આવ્યા છે. રામ મંદિરના નિર્માણ માટે દાન અભિયાન દરમિયાન, ભારત અને વિદેશના લાખો રામ ભક્તોએ ઉદારતાથી રૂ.૩,૦૦૦ કરોડથી વધુનું યોગદાન આપ્યું છે.

મકાન નિર્માણ સમિતિના અધ્યક્ષના જણાવ્યા અનુસાર, અત્યાર સુધીમાં આશરે રૂ.૧,૫૦૦ કરોડનો ખર્ચ કરવામાં આવ્યો છે, જેનો અર્થ એ છે કે, બાંધકામ કાર્ય પર આટલો ખર્ચ કરવામાં આવ્યો છે. મંદિર સંકુલમાં બાકી રહેલા ચાલુ કાર્ય સહિત કુલ ખર્ચ આશરે રૂ.૧,૮૦૦ કરોડ હોવાનો અંદાજ છે.

અધ્યક્ષે જણાવ્યું હતું કે, શરૂઆતમાં આટલું મોટું નાણાકીય યોગદાન અપેક્ષિત નહોતું, પરંતુ રામ ભક્તોની શ્રદ્ધાને કારણે તે શક્્ય બન્યું છે. તેમણે જણાવ્યું હતું કે, રામ ભક્તોએ જે ભક્તિભાવથી દાન આપ્યું છે, તે પોતાનામાં એક નોંધપાત્ર ઉદાહરણ છે.

આ દરમિયાન, શ્રી રામ જન્મભૂમિ તીર્થ ક્ષેત્ર ટ્રસ્ટે ૨૫ નવેમ્બરના રોજ યોજાનાર એક ખાસ કાર્યક્રમમાં ૮,૦૦૦ થી ૧૦,૦૦૦ મહેમાનોને આમંત્રણ આપ્યું છે. મહત્વનું છે કે, ૨૦૨૨ થી રામ મંદિર નિર્માણમાં દાન આપનારાઓને આમંત્રિત કરવાની યોજનાઓ બનાવવામાં આવી છે.

ભવન નિર્માણ સમિતિએ જણાવ્યું હતું કે, મંદિરના નિર્માણમાં સામેલ તમામ વ્યક્તિઓ, સંગઠનો અને કંપનીઓનું પણ સન્માન કરવામાં આવશે. ૨૫ નવેમ્બર પછી એક ખાસ સન્માન સમારોહ યોજાશે, જ્યાં રામ મંદિરના નિર્માણમાં યોગદાન આપનારા તમામ લોકોને પ્રમાણપત્રોથી સન્માનિત કરવામાં આવશે.