સોમનાથ નજીક દરગાહમાંથી કુહાડી અને તલવાર સહિતના હથિયારો પકડાયાં

(એજન્સી)સોમનાથ, ગીર સોમનાથ જિલ્લાની સ્પેશિયલ આૅપરેશન ગ્રુપ (એસઓજી) ટીમે જિલ્લામાં કાયદો અને વ્યવસ્થા જાળવવાના ભાગરૂપે એક મેગા કોમ્બિંગ ઓપરેશન હાથ ધર્યું હતું. આ કોમ્બિંગ દરમિયાન, ટીમે ચોક્કસ બાતમીના આધારે પ્રભાસ પાટણ નજીક આવેલી ઐતિહાસિક હઝરત કચ્છી પીર બાબાની દરગાહ પર તપાસ શરૂ કરી હતી.

એસઓજીની ટીમે દરગાહના વિવિધ ખૂણાઓ અને રૂમોની ઝીણવટભરી તપાસ કરી હતી, જેમાં તેમને આ ધાર્મિક સ્થળમાંથી ગેરકાયદેસર હથિયારોનો જથ્થો મળી આવ્યો હતો. સુરક્ષાના દ્રષ્ટિકોણથી આ ઘટના અત્યંત ગંભીર માનવામાં આવી રહી છે, કારણ કે ધાર્મિક સ્થાનો પર આ પ્રકારના હથિયારો રાખવા એ કાયદાનું ગંભીર ઉલ્લંઘન છે.

એસઓજી દ્વારા હાથ ધરવામાં આવેલી આ તપાસમાં દરગાહના એક ગુપ્ત ભાગમાંથી કુહાડી અને તલવાર સહિતના દેશી હથિયારો મળી આવ્યા હતા, જેને પોલીસે તાત્કાલિક અસરથી જપ્ત કરી લીધા હતા. આ હથિયારો કયા હેતુથી રાખવામાં આવ્યા હતા અને તેનો ઉપયોગ ક્યાં થવાનો હતો, તે જાણવા માટે એસઓજીની ટીમે તાત્કાલિક ધોરણે પગલાં લીધા છે.

આટલી મોટી સંખ્યામાં હથિયારોનું ધાર્મિક સ્થળેથી મળવું એ અનેક સવાલો ઊભા કરે છે, જેને લઈને સુરક્ષા એજન્સીઓ એલર્ટ મોડ પર આવી ગઈ છે. આ ઘટનાએ સ્થાનિક પોલીસ અને ગુપ્તચર એજન્સીઓ બંનેને ચોંકાવી દીધા છે, અને આ મામલે સઘન તપાસ શરૂ કરવામાં આવી છે. હથિયારો મળી આવ્યા બાદ એસઓજી ટીમે તુરંત જ દરગાહના વહીવટકર્તા, એટલે કે મુંજાવરની અટકાયત કરી અને તેમની સઘન પૂછપરછ શરૂ કરી દીધી છે.

પોલીસ એ જાણવાનો પ્રયાસ કરી રહી છે કે આ હથિયારો કોના દ્વારા અને શા માટે દરગાહમાં રાખવામાં આવ્યા હતા. મુંજાવરના નિવેદનો અને અન્ય પુરાવાઓના આધારે એસઓજી આ મામલાની ઊંડાણપૂર્વક તપાસ કરીને આ હથિયાર નેટવર્કના મૂળ સુધી પહોંચવા માંગે છે.