મોડાસામાં 200 મેટ્રિક ટન પ્રતિ દિવસનું ઉત્પાદન કરતાં ગોપાલ સ્નેક્સનો પ્લાન્ટ શરૂ

ગાંધીનગર, ભારતમાં સંગઠિત પરંપરાગત નાસ્તા ક્ષેત્રે અગ્રણી, ગોપાલ સ્નેક્સ લિમિટેડ કંપનીએ ઉત્તર ગુજરાતના મોડાસા ખાતે આવેલી તેની ઉત્પાદન સુવિધામાં નમકીનનું ઉત્પાદન શરૂ કર્યું છે.

અગાઉથી આ પ્લાન્ટમાં બટાકાની વેફર્સ અને ફાયમનું ઉત્પાદત થતું હતું તેમજ હવે અહીં વિસ્તરણ સાથે નમકીનનું ઉત્પાદન પણ શરૂ કરવામાં આવ્યું છે, જે કંપનીના રાજકોટ તથા નાગપુર પ્લાન્ટની સાથે હાલની ઉત્પાદન ક્ષમતામાં વધારો કરે છે અને સાથે-સાથે કંપનીના સમગ્ર પ્રોડકશન નેટવર્કને મજબુત બનાવે છે.

આ વિસ્તરણ, ગોપાલ સ્નેક્સની સમગ્ર ભારતમાં તેની ઉપસ્થિતિને મજબુત કરવા અને તેના ઉત્પાદન એકમો વચ્ચે પરિચાલન કામગીરી અને તાલમેલ સુધારવાની વ્યાપક વ્યહૂરચનાનો એક ભાગ છે. મોડાસા યુનિટમાં નમકીનનું ઉત્પાદન શરૂ કરવા સાથે કંપનીનો ઉદેશ્ય, પુરવઠા કાર્યક્ષમતા વધારવા, ઉત્તર અને પશ્ચિમી બજારોમા વધતી માંગને પહોંચી વળવા અને વિતરકોને સમયસર ડિલિવરી સુનિશ્ચિત કરવાનો છે.

ગોપાલ સ્નેકસના ડીરેકટર અને સીઈઓ રાજ હડવાણીએ જણાવ્યું હતું કે, “નમકીન ઉત્પાદનની શરૂઆત સાથે મોડાસા પ્લાન્ટનું વિસ્તરણ, એ સપ્લાય ચેઈન કાર્યક્ષમતા સુધારવા અને સમગ્ર ભારતમાં અમારા ઉત્પાદનોની વધતી માંગને પહોંચી વળવા તરફ એક મહત્વપૂર્ણ પગલું છે.

રાજકોટ અને મોડાસા બંને જગ્યાએ અમારા મોટાભાગના નમકીનનું ઉત્પાદન કરીને, અમે અમારા વિતરકોને ઝડપથી સેવા આપી શકીશું. આ ઉપરાંત નવા બજારોમાં અમારી હાજરી મજબુત કરીને અમે અમારા ગ્રાહકોને ઉચ્ચ- ગુણવત્તાવાળા, વિશ્વસનીય ઉત્પાદનો પ્રદાન કરવાનું જારી રાખવા માટે વધુ સક્ષમ બનીશું.” કૃષિની દ્રષ્ટિએ સમૃદ્ધ પ્રદેશ મોડાસામાં સ્થિત આ પ્લાન્ટને બટાકા, મગફળી અને કાળા ચણા જેવા મુખ્ય કાચા માલની ઝડપી સપ્લાયનો લાભ મળે છે,

જે સીધા જ સ્થાનિક ખેડૂતો પાસેથી મેળવવામાં આવે છે. કંપનીએ વર્ષભર દરમિયાન કાચા માલની ઉપલબ્ધતા સુનિશ્ચિત કરવા અને નિરંતર ઉત્પાદન જાળવી રાખવા માટે મોડાસામાં લગભગ ૪૦,૦૦૦ મેટ્રિક ટન કોલ્ડ સ્ટોરેજ સુવિધા પણ સ્થાપિત કરી છે. આ વિસ્તરણ બાદ, મોડાસામાં કુલ ઉત્પાદન ક્ષમતા આશરે ર૦૦ મેટ્રિક ટન પ્રતિ દિવસ થઈ ગઈ છે.