કપાસની આડમાં ગાંજાનું મસમોટું વાવેતર ઝડપાયું
(એજન્સી)સુરેન્દ્રનગર, એસઓજી પોલીસે સાયલા તાલુકાના ખીટલા ગામની સીમમાં કપાસની આડમાં ગાંજાનું મસમોટું વાવેતર ઝડપી પાડ્યું છે. ખીટલા ગામની સીમમાંથી કપાસની આડમાં વાવેલા લીલા ગાંજાના ૧૮૦ છોડ, જેનું વજન ૫૫૯ કિલો અને કિંમત રૂપિયા ૨૭,૯૮,૫૦૦૦ના મુદ્દામાલ સાથે વાડી માલિકને ઝડપી લઈ ધજાળા પોલીસ મથકે ગુનો નોંધી કાયદેસર કાર્યવાહી હાથ ધરી હતી.
સુરેન્દ્રનગર જિલ્લામાંથી અવારનવાર ગાંજો, અફીણ સહિતના માદક દ્રવ્યો ઝડપાય છે ત્યારે વધુ એક વાર આવા માદક દ્રવ્યોનો કાળો કારોબાર ઝડપાયો છે. સાયલા તાલુકાના ખીટલા ગામના રાજેશભાઇ ઉર્ફે રાજુભાઇ ભૂપતભાઈ ખવડએ ખીટલા ગામની પામર નામની સીમમાં આવેલ પોતાની વાડીમાં કપાસની આડમાં ગાંજાનું વાવેતર કર્યું હોવાની બાતમીના આધારે સુરેન્દ્રનગર એસઓજી પોલીસે દરોડો કર્યો હતો.
પોલીસે સ્થળ પર તપાસ કરતા કપાસની આડમાં મોટા પ્રમાણમાં ગાંજાનું વાવેતર જોવા મળતા પોલીસ પણ ચોંકી ઉઠી હતી. પોલીસે વાડીમાં કપાસની આડમાં વાવેલા લીલા ગાંજાના ૧૮૦ છોડ, જેનું કુલ વજન ૫૫૯ કિલો અને ૭૦૦ ગ્રામ કબજે કર્યા હતા જેની કુલ કિંમત રૂપિયા ૨૭,૯૮,૫૦૦૦ જેટલી થાય છે.
આટલી મોટી માત્રામાં ગાંજો ઝડપાયા બાદ પોલીસ દ્વારા ખેતરમાંથી તમામ ગાંજો ઉખાડવા માટે ૧૨ જીઆરડી જવાનની મદદ લેવામાં આવી હતી અને અંદાજે ૧૯ કલાકની જહેમત બાદ કબજે કરવામાં આવેલ તમામ ગાંજો એક ટ્રેકટરમાં ભરવામાં આવ્યો હતો. ગાંજાના છોડની લંબાઈ એટલી વધી ગઈ હતી કે આ લીલા છોડ ભરવા માટે કોથળા પણ ટૂંકા પડ્યા હતા.
