૪૪ શાળાઓના ૧૪૦ વિદ્યાર્થીઓએ વિવિધ પ્રોજેક્ટ રજૂ કર્યા: સ્કિલ કોમ્પિટિશનનું આયોજન

સમગ્ર શિક્ષા, ગાંધીનગર અને DEO અમદાવાદ (ગ્રામ્ય) દ્વારા જિલ્લા કક્ષાના ‘કૌશલ્યોત્સવ‘ (સ્કિલ કોમ્પિટિશન)નું સફળ આયોજન

DAV ઇન્ટરનેશનલ સ્કૂલ, મકરબા ખાતે યોજાયેલા કાર્યક્રમમાં વિદ્યાર્થીઓએ વિવિધ કૌશલ્યોનું પ્રદર્શન કર્યું

ગાંધીનગર, સમગ્ર શિક્ષા, ગાંધીનગર અને જિલ્લા શિક્ષણાધિકારી કચેરી, અમદાવાદ (ગ્રામ્ય)ના સંયુક્ત ઉપક્રમે જિલ્લા કક્ષાના કૌશલ્યોત્સવ (સ્કિલ કોમ્પિટિશન) ૨૦૨૫-૨૬નું ભવ્ય આયોજન DAV ઇન્ટરનેશનલ સ્કૂલ, મકરબા ખાતે કરવામાં આવ્યું હતું. આ સ્પર્ધાનો મુખ્ય ઉદ્દેશ વિદ્યાર્થીઓમાં વિવિધ વ્યવસાયલક્ષી કૌશલ્યોનો વિકાસ કરવાનો અને તેમને પ્રોત્સાહિત કરવાનો હતો.

જિલ્લાની કુલ ૪૪ શાળાઓના ૧૪૦ વિદ્યાર્થીઓ અને ૮૦ વોકેશનલ ટ્રેનર્સ દ્વારા ઉત્સાહપૂર્વક ભાગ લેવામાં આવ્યો હતો. વિદ્યાર્થીઓએ ઇલેક્ટ્રોનિક્સ એન્ડ હાર્ડવેર, પ્લમ્બિંગ, ટુરીઝમ એન્ડ હોસ્પિટાલીટી, એગ્રિકલ્ચર, રિટેલ, આઈટી, હેલ્થ કેર, અપરેલ એન્ડ હોમ ફર્નિશિંગ, અને બ્યુટી એન્ડ વેલનેસ જેવા ૧૦ અલગ-અલગ ટ્રેડમાં નૂતન પ્રોજેક્ટ્સ રજૂ કર્યા હતા.

પ્રોજેક્ટ્સના મૂલ્યાંકન માટે પ્રતિષ્ઠિત મહાનુભાવો, જેમાં ડો. વિજયભાઈ પટેલ (કૌશલ્ય – ધ સ્કીલ યુનિવર્સિટી), ડો. ઉદયભાઈ ત્રિવેદી (સરકારી પોલિટેકનિક કોલેજ), અને પ્રીતિબેન મહેતા (ગુજરાત કૃષિ વિજ્ઞાન મંડળ)નો સમાવેશ થાય છે, તેમણે નિર્ણાયક તરીકેની ભૂમિકા ભજવી હતી.

સ્પર્ધાના અંતે વિજેતા શાળાઓની જાહેરાત કરવામાં આવી હતી, જેમાં સરકારી માધ્યમિક અને ઉચ્ચતર માધ્યમિક શાળા, દેવધોલેરા (તા. બાવળા)એ ઇલેક્ટ્રોનિક્સ એન્ડ હાર્ડવેર ટ્રેડમાં “કચરાનું વ્યવસ્થાપન” પ્રોજેક્ટ રજૂ કરીને પ્રથમ સ્થાન મેળવ્યું હતું. દ્વિતીય સ્થાન તલકચંદ ઝબકબા વિસલપુર હાઈસ્કૂલ (તા. દસક્રોઈ)એ એગ્રિકલ્ચર ટ્રેડમાં “બાયો ચારકોલ” પ્રોજેક્ટ માટે મેળવ્યું હતું.

જ્યારે તૃતીય સ્થાન સંયુક્ત રીતે બે શાળાઓએ પ્રાપ્ત કર્યું હતું: શેઠ અમુલખ વિદ્યાલય (તા. સિટી)એ આઇટી-ઇલેક્ટ્રોનિક્સ ટ્રેડમાં “વેસ્ટ પ્લાસ્ટિક ઇલેક્ટ્રિસિટી” પ્રોજેક્ટ માટે અને ઉત્કર્ષ વિદ્યાલય (તા. સિટી)એ આઈટી ટ્રેડમાં “QICS” પ્રોજેક્ટ માટે આ સિદ્ધિ મેળવી હતી. જિલ્લા કક્ષાએ પ્રથમ નંબર પ્રાપ્ત કરનાર સરકારી શાળા હવે રાજ્યકક્ષાની સ્કીલ કોમ્પિટિશનમાં ભાગ લેવા જશે.

આ સમગ્ર કાર્યક્રમનું સફળતાપૂર્વક આયોજન જિલ્લા શિક્ષણાધિકારી ડો. બી.એન. પ્રજાપતિના માર્ગદર્શન હેઠળ કરવામાં આવ્યું હતું, જેમાં યજમાન શાળાના આચાર્યશ્રી ડો. દીપક પુરકરશ્રી, શિક્ષણ નિરીક્ષકશ્રીઓ ચારુશીલાબેન મકવાણા અને ઇન્દુબેન ચાવડા, આચાર્યશ્રી સ્નેહલભાઈ વૈદ્ય, મદદનીશ શિક્ષણ નિરીક્ષકશ્રી અશરફભાઈ પટેલ, યજમાન શાળાના સુપરવાઈઝર હેડ શ્રી અનુભાબેન અને તેમની ટીમ,

જિલ્લા કો-ઓર્ડિનેટર શ્રીમતી કુંજલબેન પ્રજાપતિ અને સમગ્ર શિક્ષાની ટીમે સક્રિય યોગદાન આપ્યું હતું. કાર્યક્રમના અંતે તમામ ૪૪ શાળાઓને પ્રોત્સાહન પારિતોષિક અને વિદ્યાર્થીઓને પ્રમાણપત્રો તેમજ રો-મટિરિયલ કીટનું વિતરણ કરવામાં આવ્યું હતું, સાથે જ વિજેતા શાળાઓને શિલ્ડ અને પ્રમાણપત્ર આપી અભિનંદન પાઠવવામાં આવ્યા હતા.