ભારતીય મૂળના પુલકિત દેસાઈએ ન્યૂ જર્સીના પાર્સિપનીમાં મેયર તરીકે શપથ લીધા

વોશિંગ્ટન: અમેરિકાના ન્યૂ જર્સી રાજ્યના સૌથી મોટા ટાઉનશિપ પૈકીના એક એવા ‘પાર્સિપની’ (Parsippany) માં ભારતીય મૂળના પુલકિત દેસાઈએ મેયર તરીકે શપથ લઈને નવો ઈતિહાસ રચ્યો છે. યુએસ મરીન વેટરન અને ટેકનોલોજી પ્રોફેશનલ પુલકિત દેસાઈ આ ટાઉનશિપના પ્રથમ ભારતીય અમેરિકન મેયર બન્યા છે.

કાંટાની ટક્કરમાં મેળવી જીત ડેમોક્રેટિક પાર્ટીના ઉમેદવાર પુલકિત દેસાઈએ રિપબ્લિકન પક્ષના જેમ્સ બાર્બેરીયો સામે અત્યંત નજીવી સરસાઈથી જીત મેળવી છે. શરૂઆતના વલણોમાં રિપબ્લિકન ઉમેદવાર આગળ હતા, પરંતુ પ્રોવિઝનલ અને વોટ-બાય-મેલ બેલેટ્સની ગણતરી બાદ દેસાઈ વિજેતા જાહેર થયા હતા. આ સાથે જ કાઉન્સિલની બે બેઠકો પણ ડેમોક્રેટ્સે જીતીને ટાઉનશિપ કાઉન્સિલ પર કબજો જમાવ્યો છે.

પારદર્શિતા અને શિક્ષણ પ્રથમ પ્રાથમિકતા મેયર તરીકે શપથ લીધા બાદ પુલકિત દેસાઈએ પોતાની પ્રાથમિકતાઓ સ્પષ્ટ કરી હતી:

• સ્માર્ટ ડેવલપમેન્ટ: તેમણે જણાવ્યું કે પાર્સિપનીમાં વધી રહેલી ગીચતાને રોકવી અને કોમર્શિયલ ક્ષેત્રે સ્માર્ટ ડેવલપમેન્ટ કરી નવા ઉદ્યોગો લાવવા તે તેમની પ્રાથમિકતા છે.
• શિક્ષણ અને સુરક્ષા: શાળાઓ અને શિક્ષણ બોર્ડને પૂરતું ભંડોળ પૂરું પાડવાની સાથે પબ્લિક ઇન્ફ્રાસ્ટ્રક્ચર અને જાહેર સુરક્ષા પર ભાર મૂકવામાં આવશે.
• ભ્રષ્ટાચાર મુક્ત શાસન: તેમણે ભારપૂર્વક કહ્યું કે, “હું પાર્સિપનીના લોકો સાથે પ્રામાણિક રહીશ. વહીવટમાં કોઈ પણ ‘બેકરૂમ ડીલ્સ’ કે છૂપી બાબતો નહીં હોય, સંપૂર્ણ પારદર્શિતા રાખવામાં આવશે.”

મરીન કોર્પ્સથી મેયર સુધીની સફર પુલકિત દેસાઈ ખૂબ જ નાની ઉંમરે અમેરિકા આવ્યા હતા. શિક્ષણ પૂર્ણ કર્યા બાદ તેમણે યુએસ મરીન કોર્પ્સમાં 6 વર્ષ સેવા આપી હતી, જેમાં ‘ડેઝર્ટ સ્ટોર્મ’ ઓપરેશનનો પણ સમાવેશ થાય છે. ત્યારબાદ ત્રણ દાયકા સુધી તેમણે ટેકનોલોજી અને સાયબર સિક્યોરિટી ક્ષેત્રે કામ કર્યું છે.

મતદાનના અધિકાર માટેની લડાઈએ રાજકારણમાં પ્રવેશ કરાવ્યો તેમના રાજકીય પ્રવેશ વિશે વાત કરતા તેમણે જણાવ્યું કે, સ્થાનિક લેક એસોસિએશનના પ્રમુખ તરીકે તેમણે જોયું હતું કે રહેવાસીઓને મતદાન કરવા માટે વધારાની ફી ચૂકવવી પડતી હતી. તેમણે આ ‘પોલ ટેક્સ’ સામે લડત આપી અને નાગરિકોને સમાન હક અપાવ્યો. આ લડાઈએ જ તેમને મેયરની ઓફિસ સુધી પહોંચવાની પ્રેરણા આપી.

પાર્સિપનીમાં ભારતીય અમેરિકનોની વસ્તી મોટી સંખ્યામાં છે. પુલકિત દેસાઈ અને કાઉન્સિલ મેમ્બર દિયા પટેલની પસંદગીને સ્થાનિક મીડિયાએ ‘ઐતિહાસિક સિદ્ધિ’ ગણાવી છે, કારણ કે એશિયન અમેરિકનો હવે આ સમુદાયના સૌથી મોટા વંશીય જૂથ તરીકે ઉભરી આવ્યા છે.